ZEPHANIAH 1 - LEKHARABU INTHENG (BSI)

¹ Amon sapa Josiah khan Judah hei reng achanglai Zephaniah hnenga Rōngpu tapek ṭong kha hi kae. (Zephaniah pa kha Kushi, ama pa kha Gedaliah, ama pa kha Amariah, ama pa khan Reng Hezekiah kae. Zephaniah hi Reng Hezekiah sōn leh pâr kae.)

Rōngpu Ṭong tanna Kani

² Rōngpu’n ati, “Ke’n raleichunga aka-om rakip kaman hmangpet sik,

³ mihring, ranhring, nga leh va ankhenga. Mikaṭhamak-hei tlâksukna katlo sik. Mihring inti rakip kasuk manhmang sik khana akahringa inkhatbek um damak ning. Rōngpu ke’n kahri jo kae.

⁴ “Jerusalem leh Judah mi rakip kakarâk sik hei. Baal kamukna kha a’nchaina sik a kasuk manhmang sik, khava razenna kanei thempuhei kha tûte inkhat in mandonsōt mak jo hei ning.

⁵ Innphu chunga akakea kani leh thla khana ârsihei kamukna akaneihei kha kamanhmang sik hei. Kei inmuk hei khana kei kajui sik a intepna kaneihei, tâk-kha Molech pathen rahminga intepna kaneihei kha’m kamanhmang sik hei.

⁶ Keia inphut akasesōt khana kakahnung kajuimak hei, kahnenga akahongmak hei khana anhlam keipekna sik a ani kader mak hei kha kasuk manhmang sik hei.”

⁷ Rōngpu kha ṭongtan hmun a a’n-ong sik kani kha kahnai jo; khava jâra ama hmaikunga sip ti una om ruh. Rōngpu’n amihei kha inthoina tōk sik a intluk jo khana Judah kavōk-khōi sik a inrepuihei kha abek jo hei.

⁸ Rōngpu’n ati, “Khava mithatna kani ning khan ṭōnpui karônhei, reng sapahei khana ram hlop mihei omchen kalo rakip kha karâkna kapek sik hei.

⁹ Jât-hlop hei kapōa kamukna kaneihei, khana ankapupa inn mansipna sik a mi inruhei leh mikathat-hei kha kakarâk sik hei.

¹⁰ Rōngpu’n ati, “Khava ning Jerusalema Nga Kekot a mi kaṭap rasa nanthei sik. Khōpui ather insak ṭhen shunga mi inkōi rasa khana tlâng heia invōk-inthat rasa nanthei sik.

¹¹ Hiva rasa hi nanthei pha khōpui daptinga aka-om nangni inkōi ruh, ṭap ruh, ajârchu invei katlohei rakip kathipet sik jo hei!

¹² “Khava pha khan thaihmei kakut a kamatua ke’n Jerusalem kajong sik. Binga tlaina kaneihei leh inngamna kaneihei, anbinga ‘Rōngpu’n ahlam inkhat achangmak leh inkhat a ṭōn heite tlomak,’ tia akahrile hei chunga karâkna kapek sik hei.

¹³ Annei ansum mi’n anchom sik khana an-innhei sukmathlek sik hei kae. An-inn sakna shunga khan anmani om tor mak hei ning khana anvomhrui lingna rahōnna inphut theitui inmak hei ning.”

¹⁴ Rōngpu kani kha hong kahnai jo, kahnai hêr jo, inrangtak a kajōng jo! Khavakha kani kakha kachang sik, ajârchu remi kahrânghei kapha’m inrimtak a kaṭap sik hei!

¹⁵ Khavakha hnuk natna kani kachang sik, inreng khōdeng theina kani, inhmangna leh sukkhōina kani, inthim leh inrimna kani, khō jingna leh sumphai makhuna kani,

¹⁶ re intukna pengkun rasa khana rekur tukkhum khōpui leh inn inshâng hei akabuhlu remihei ông rasa sipna kani kha kachang sik.

¹⁷ Rōngpu’n ati, “Khava kapō insuksetna kha mihringhei chunga kahei rôn sik, khachu mi rakip in hmitkachohei kapōa ankahmeia kalôn sik hei. Anmani kei dōina setna antlo jo, tûnchu anthisen tui nibun kapōa inbun sik khana ankathi kalōng raleia kaṭop sik.”

¹⁸ Rōngpu’n ahnuknat amalâr ning khan, ansana dangkahei kha’num anmani huk tor mak hei ning. Ahnuk natna hmei khan raleichung pumpui asuk manhmang sik. Raleichunga aka-om rakip hei sik a achaina, manhret manloa abângna amanchang sik.