ZECHARIAH 8 - LEKHARABU INTHENG (BSI)

Rōngpu ’n Jerusalem Syem manther sik A’ntep

¹ Chunghnung Rōngpu’n Zechariah hneng hiva ṭong hi ajōng pek:

² “Jerusalem kha amihei hi kalungset hêr hei jâra ka’nthōpui hnōm jo, hiva lungset hin akadōihei chunga kahnuk amannat a kae.

³ Kakhōpui intheng, Jerusalema kei inle sik eng, khana khan ka-om sik eng. Hivahi taksenthei khōpui, Akahratpen Rōngpu hmebung, khana hmebung intheng tia inhret sik.

⁴ Ave nôk a khōnghre inde kater pase leh nuhmei he’n khōpui rakir heia in-ong sik hei.

⁵ Hlamlaia nuhngâk leh retherhei kasip a indei sik hei.

⁶ “Tûnna dahlona ka-om jât-hei sik a akae theimak a inhmu sik, tâk kei hneng chu akae theimak changmak.

⁷ Kamihei rehringa leiṭhōisōtna ramheia inphut kahuksōt sik hei,

⁸ Jerusalema aka-om sik hei ke’n avea nisō tlaitlâk a inphut kaheiṭhōi male nôk sik hei. Anmani kami kachang sik hei khana kei an-Pathen kachang sik eng khana ke’n anchunga taksen theitak leh kadik a vai karôn sik hei.

⁹ “Inngamna nei ruh! Kabek-inn sak mantherna innhmun denglaia sânkathemhei ṭonghri kha leh in-anghrep a tûnhin nangni nanthei sik jo.

¹⁰ Khava pha amak hma khan chu tu mo inkhat in mi achangmak leh ranhei ṭōn mantlotor mak hei, tûte’num a’nrepui heia inphut inhukna neimak hei. Ke’n mi inkhat leh inkhat kamandōi heia kae.

¹¹ Tâk-kha tûnchu hiva jât alakahring senghei hichu ahlopdet a karazen sik jo hei.

¹² Malung kamōnga anhmuchi bechi anvor sik jo. Anvomhrui thei inra sik; ralei in kara amanpung sik jo, khana pui katluk a khō kasûr sik jo. Hiva mahâmṭhatna rakip hi alakahring kamihei chunga kapek sik jo hei.

¹³ Eh Judah leh Israel mihei! Akathlengsa pha khan ramlak mihe’n inkhat leh inkhat khōmâk insântō heia, ‘Judah leh Israelhei chunga inhmangna akatla kapōa nangni chunga tlung rasoh!’ inti hei. Tâk-kha ke’n kahuk sik jo chei, khana jât-hlop hei khan khat leh khat, ‘Judah leh Israel he’n mahâmṭhat antachen kapōa nantachen chang rasoh!’ inti sik jo hei. Khava jâra inngamna nei ruh khana ṭitna neimak ruh.”

¹⁴ Chunghnung Rōngpu’n ati, “Nanpusōn he’n kahnuk anmannat eng pha, anmani chunga inhmangna kamantluk, kamalung thlengmak eng, tâk kamantlukna kha katlosōt a kae.

¹⁵ Tâk-kha tûnchu Jerusalem leh Judah mihei mahâmṭhat pek sik a intluk jo eng. Khava jâra ṭitmak ruh.

¹⁶ Nangni tatlo sik khachu hivahi kae: inkhat leh inkhat kadik a inbe ruh. Ṭongtan hmun a inchamna ahei karôn sōt sik akadik kha hri ruh.

¹⁷ Inkhat in inkhat inhmangna sik a intlo mak ruh. Akadik mak a inhâksêr mak ruh. Maleisei, akadik mak, innâk-inse ke’n kahōt.”

¹⁸ Chunghnung Rōngpu’n Zecha-riah hneng hiva ṭong hi apek:

¹⁹ “Thla manlina, rangana, sarina; khana sômna heia buhngōina kha Judah hei sik a hōina leh inpâkna revei kachang sik jo. Nangni akadik leh lungmōng kha nanta madu sik kae.”

²⁰ Chunghnung Rōngpu’n ati, “Khōpui katamtak a inphut mihei Jerusalema anhongna sik pha kha kahong jo.

²¹ Khōpui hlop a mi inkhat in khōpui hlop a mi inkhat hneng ahri sik, “Chunghnung Rōngpu inmuk sik a leh ama vângpek kader sik a keini kase ung, hong roh keini leh vase rih!’

²² Mi katamtak leh jât kahrat hei kha’m Chunghnung Rōngpu inmuk sik leh ama vângpekna kader sik a Jerusalema kahong sik hei.

²³ Khava pha khan chu jât-hlop mi sôm he’n Jehudi mi inkhat hneng kahong heia hing’hin anti sik, ‘Nangni jât hlam hrona inveisa rung, ajârchu Pathen in nangni a-ompui chei ti hi keini kanthei jo.’”