ZECHARIAH 6 - LEKHARABU INTHENG (BSI)

Shakor Gâri 4 Hmangtalâr

¹ Ke’n hmangtalâr ahlop inkhat kaleihmu nôk. Hiva pha hinchu sum-êng tlâng 2 hei kâra shakor gâri 4 kahmu hei.

² Ahma kakeipen gâri kha shakor kasen he’n ankei, 2na kha akadum he’n ankei,

³ 3na kha akabang he’n ankei, 4na kha akaṭe shakor he’n ankei.

⁴ Khava sōa ngeva hneng khan kader, “Apu, hiva shakor gârihei hi heitina mo?”

⁵ Ama’n amasôn eng, “Hihei hi thlihrui 4 hei kae; anmani hi raleichung pumpuia Rōngpu hnenga inphut akajōng hei kae.”

⁶ Shakor gâri, shakor kadum hei takei kha sak ting Babylona kase hei, akabang shakor takei kha tlaitlâk ting kase hei, khana akaṭe shakor he’n thlang tinga ram a kase heia kae.

⁷ Akaṭe shakorhei anheisōk pha, se sik a leh ralei ensui sik kha hngâktor mak jo hei. Ngeva khan ati, “Se ruh khana raleichung va-en jo ruh!” khanga anmani kase jo hei.

⁸ Khava sōa ngeva khan kei hneng hong ka-ông, “Sak tinga Babylona akase shakorhei khan Rōngpu hnuk natna kha anmandai jo.”

Joshua Lenlukhu Mankhuna Ṭongpek

⁹ Rōngpu’n hiva ṭong thangkōi hi apek enga kae.

¹⁰ Ama’n ahri, “Rehringa akase Heldai, Tobija, khana Jedaiah hei, tahei pek kutchoihei kha lo inna inranga Zephaniah sapa Josiah inna vase roh. Hiva mihei seng hi Babylon rehring surna inphut ajōng inle hei kae.

¹¹ Anmani tapek sana dangka seng vânga lenlukhu inkhat syem roh, khavakha Thempu Kalen, Jehozadak sapa Joshua luchunga mankhu roh.

¹² Chunghnung Rōngpu’n hing’hin ahri tia manthei roh, ‘Thing bâk tia inhret mi khan a-omna inphut hong kakhangtou sik khana Rōngpu Bek-inn asak manther sik.

¹³ Khava kasak sik leh reng inkhat changna kajana kachen sik kha ama kha kae, khana ama’n amihei vai arôn sik hei. Ama reng in-ongna hnenga thempu inkhat kangir sik, khana anmani kamōnga injentak a ṭōn antlosōm sik.’

¹⁴ Lenlukhu kha Heldai, Tobija, Jedaiah, khana Josiah hei mandonsōtna sik Rōngpu Bek-inna aka-om sik kae.”

¹⁵ Ram kahlatak a mihei kahong sik heia kha Rōngpu Bek-inn kha anhong sakpui sik. Khavakha ansak sōtō leh kei hi Chunghnung Rōngpu’n nanhnenga ahei tir eng kae ti hi nanmanhret sik. Hiva rakip hei hi nangni’n Rōngpu nan-Pathen ṭongpek kha pui katluk a nanjui inchu ahei kasōk pet sik kae.