ZECHARIAH 4 - LEKHARABU INTHENG (BSI)

Thaihmei Matungna Hmangtalâr

¹ Kahnenga ṭongkahri ngeva kha kahong nôk a kei kha akaje mi inkhat kapōtak a amathō eng.

² Ama’n ader eng, “Nang in heimo nahmu?” Ke’n kamasôn, “Sana vânga ansyem thaihmei matungna inkhat, alêra thaitui hapna kōklei inkhat ka-om. Thaihmei kunga khan thaihmei 7 ka-om, thaihmei rakip a hmeihrui sari et indo.

³ Thaihmei kung sak leh thlanga olive kung 2 ka-om hei.”

⁴ Khana ke’n ngeva hneng kader, “Oja, hihei hin heitina mo?”

⁵ Ama’n ader eng, “Manhret mak che mo?” Ke’n kamasôn, “Oja manhret mak eng.”

^10b Ngeva khan kahnenga ati, “Thaihmei 7 hei kha raleichung pumpui kahmu tor Rōngpu hmit 7 hei kae.”

¹¹ Khava sōa ke’n ahnenga kader, “Thaihmei kung sak leh thlanga olive kung 2 hei hin heitina mo?

¹² Khana olive thai jōng tlâkna sana utông 2 hnenga ka-om olive thing bâk 2 hei son hei manhretna mo?”

¹³ Ama’n ader eng, “Nang manhret mak che mo?” Ke’n kamasôn, “Oja, kei manhret mak eng.”

¹⁴ Khava sōa ama’n ati, “Ralei pumpui Rōngpu, ama inzen sik a thai kanosa kadeisōt mi 2 hei kha hihei hi kae.”

Zerubbabel hneng Pathen Ṭongtep

⁶ Rōngpua inphut Zerubbabel hneng pek sik ṭong hi ngeva khan amanthei eng: “Retorna nanei sik, remihei rathahrat jâra changmak, nang ratha neina jâra changmak, tâk kei rathla vânga kae.

⁷ Tlânghei kapōa khârna kha nahmai kunga inhmang sik jo hei. Bek-inn avea nasak nôk sik, nang in nasak a atorna hlung nadatak leh mipui he’n, ‘Kaṭha-e, kaṭha-e’ tia aka-ông sik hei kae.”

⁸ Rōngpua inphut ṭonghlop inkhat kajōng nôk.

⁹ Ama’n ati, “Zerubbabel in Bek-inn hmun asyem jo, ama’n asaksō sik jo. Hivahi asōk jo pha, kami he’n nang anhnenga akatir kha kei eng kae tia anmanhret sik jo.

^10a Ṭōn kha hma asethei mak jâra anmani kha malung hōimakna annei jo. Tâk-kha Zerubbabel in Bek-inn asak manjôn kha anhmu sik, khana anmani inpâk sik hei.”