ZECHARIAH 11 - LEKHARABU INTHENG (BSI)

Ning leh hnōma Vaikarônhei

¹ Lebanon, nakot-hei mahlâng roh, nang cedar thingkung rakip hmei in akângsōna sik!

² Cypress thingkunghei ṭajai sui jo ruh, cedarhei kapûr jo hei; khava akalûrhêr thing rakip inhmangsō jo hei! Bashana sasōkung hei, ṭajai sui jo ruh, ratu kabittak kha anheiphûrsō jo!

³ Vaikarôn he’n inrengtak a kaṭap jo hei; anmani lûrna kha inhmangsō jo! Shabakkaihei inhrung rasa rangei ruh; Jordan dung panga an-omna ratu karam jo!

Kemōng Kakhem Inhnihei

⁴ Rōngpu ka-Pathen in kei hneng ahri, “Tha sik a a’nkei kemōng rup-hei kakhempa kapōa nang in tlo roh.

⁵ Ankapu he’n anmani antha hei, tûte’n karâkna pek mak hei. Antak ravōi kha anjōr khana anti, ‘Rōngpu kha manpâk a om rasoh! Keini kahao jo ung! Ankakhem he’num anchunga lungsetna neimak hei.” (

⁶ Rōngpu’n ati, “Raleichunga tûte chunga lungsetna neimak jo ning. Mi rakip anvai karônhei thōia kei khet in kada sik jo hei. Khava vaikarônhei khan ralei hi ansuk manset sik jo, khana anmani ratha neina inphut a huksōt mak jo hei ning.”)

⁷ That sik akemōng heikakeia akajōrhei khan kei hi kemōng kakhem sik a anmanchang jo eng. Ke’n khōnghre 2 kachoi, inkhat kha, “lungset” tia kaphō, khana ahlop inkhat nôk kha “Pum khat” tia kaphō. Kemōnghei kha kakhem jo hei.

⁸ Kei ani kahōt kemōng kakhem ahlop 3 hei kha detor mak jo hei eng, khana thla khat shunga khan inthloppui makna sik katlo jo.

⁹ Khana kemōng rup-hei hneng ke’n kahri jo, “Kei hi nangni kemōng kakhem changmak jo ning. Akathi sik khan thi jo ruh. Suk manhmang sik khan insuk inhmang jo ruh. Akathimak hei seng khan khat leh khat inthat jo hei rasoh.”

¹⁰ Khava pha “Lungset” inti khōnghre kha kahrut a kasuk thlek jo, ralei jât rakip leh Rōngpu ṭongkamna kha manbângna kachang jo.

¹¹ Khava jâra khava kani ninga inphut, ṭongkamna kha kakōi jo. Kemōng rachôk leh jōr katlo mihei khan an-ensui eng, khana kei tatlo ṭōnna inphut Rōngpu’n ṭong ahri kae tia anmanhret jo.

¹² Ke’n anhnenga kahri, “Nangni’n nanpek hnōm eng inchu, karatha man apek ruh. Nanpek hnōm mak eng tâk leh eipeda ruh.” Anmani’n karatha man dangka 30 lim anipek eng.

¹³ Rōngpu’n kahnenga ati, “Bek-inn karōi bukna da hei roh.” Khava jâra dangka 30 kha kalo jo, khava kei rathaman pekdôr kasōk sêr katamtak inkhat a antamandon kha, bek-inn karōi manbukna khan kada jo.

¹⁴ Khava sōa 2 tlukna khōnghre kha kasuk thlek, “Pum khat” inti kha, khana Judah leh Israel kâra inmatna hrui kha intan jo.

¹⁵ Hivasōa Rōngpu’n kahnenga ati, “Vōi khat nôk kemōng kakhem inkhat kapōa tlo nôk roh, tuna chunga hinchu akahnem mak inkhat ang jo roh.

¹⁶ Ke’n kakemōng rup kha akakhem inkhat hneng kangense jo, tâk-kha ama’n kemōng inhmang sik kha inthōpui mak hei; a’nhmanghei kha’m jongsōt mak hei khana natbi karônhei kha’m andamna sik tlopek mak, khana akadam hei kha’m veimak hei. Khava kanek a, kemōng kathai hei kha anhme asâk a khana anke matin avōk mankhokpek heia kae.

¹⁷ Khava kemōng kakhem kahnem makpa kha inhmangreng jo! Ama’n akemōng rup kha adahlon jo. Re shunga ama ratha neina kha suk manhmang sik kae. Akut kangōi sik jo, ahmit changting kacho sik a kae.”