ZECHARIAH 10 - LEKHARABU INTHENG (BSI)

Huksōt sik a Rōngpu Intepna

¹ Kum shunga zerkhōa sûrtui atlâkna sik Rōngpu hneng der ruh. Mi rakip hleipuk a sabō man-êmna akasyem, khō sumtuk leh khō rahme aheikatir kha Rōngpu kae.

² Mihe’n limhei leh tla kasânhei hneng ṭong ander hei, tâk-kha masônna antahmu khachu maleisei ṭong leh aje omlo rōk kae. Mi ṭhahrep in rahmanghei anmalesōt, tâk hlamle rōk a anṭhōi chei, anmani lungngamna pekna chei kha heite hnemmak. Khava jâra mipuihei kha kemōng hlam invai kapōa kalôn jo hei. Anmani hlamkakei annei mak jâra inrengna anthōk jo.

³ Rōngpu’n ahri, “Kamihei chunga vaikarôn jât-hlop hei chunga kei kahnuk kana, khana karâkna kapek sik hei. Judah mihei kha kamihei kae, khana Chunghnung Rōngpu ke’n anmani kahrung sik hei. Anmani kha ratha kaneitak kei shakor kamanchang sik hei.

⁴ Anmani kâra inphut ram vaikarôn, hlamkakei, khana kamihei vai karôn sik a rehlam kakeihei hong kasōk sik hei.

⁵ Remi he’n an-indōipui hei hlamlena dôp shunga antachōn manbek hei kapōa Judah mipuihei khan re antor sik. Rōngpu’n anmani a’nṭhōipui hei jâra anmani’n re antlo sik, khana an-indōipui hei shakor remihei kapha’m antor sik hei.

⁶ “Ke’n Judah mihei kamanhrat sik hei; ke’n Israel mihei kahuksōt sik hei. Ke’n anchunga lungsetna kanei sik hei, ankhenga innting kaheiṭhōi male sik hei. Anmani kha ke’n kahlonsōt hêrmak hei kapōa ka-om sik hei. Kei anmani Pathen Rōngpu eng kha kae. Anmani derna kamasôn pek sik jo hei.

⁷ Israel mihei kha remi kapōa kahrat sik hei, ju ka-in mihei kapōa inpâk sik jo hei. Ansōn leh pâr he’n hiva retorna hi anhong mandonsōt sik, khana Rōngpu ṭōn leitlo jâra khan inpâk sik hei.

⁸ “Kamihei ke’n kabeksōt sik hei, kamanchun sik hei. Ke’n anmani kahuksōt sik hei, anmija aleitam kapōa kamanpung sik jo hei.

⁹ Ke’n anmani jât-hei kâra kachai kathek jo he’num, ram kahlatak a inphut anhei mandonsōt sik eng. Anmani leh ansahei kahring sik hei, khana inna inlesap sik hei.

¹⁰ Egypt leh Assyrianheia inphut innting kaheiṭhōi sik hei anrama khō kamansyem sik hei. Gilead leh Lebanon kha’num khō kamathlâk sik hei; ram pumpui kha mi kasip sik hei.

¹¹ Anmani’n inrengna tuipui anrakan pha, Rōngpu ke’n tuipui in-nông kha kavōk sik, Nile tui inthûk kha hong kakang sik. A’nlensak Assyria suk manhnem sik kae, ratha kanei Egypt ahratna hong inhmang sik jo.

¹² Kamihei kamanhrat sik hei; kei ankamuk sik eng khana kaṭong anjui sik jo.” Rōngpu’n ahri jo.