ZECHARIAH 1 - LEKHARABU INTHENG (BSI)

Rōngpu ’n Amihei ahnenga Anho’nlena sik Abek

¹ Darius in Persia rengkalen achang kum 2 tlukna thla 8 changna Iddo tupa, Berechiah sapa Zechariah hneng Rōngpu’n hiva ṭong hi aleipek.

² Chunghnung Rōngpu’n mipuihei hnenga hri sik kha Zechariah hneng amanthei, “Rōngpu kei hi nanpu sōnhei chunga kahnuk kana hêr,

³ tâk-kha tûnchu ke’n nanhnenga kahri kae, ‘Kei hneng he’nle ruh khana kei nangni hneng he’nle sik eng.

⁴ Nanpu sōnhei kapō angmak ruh. Tenlaia inphut kaṭong kha sânkathem he’n antamanthei jo hei kae, ṭōnse tlopuma an-om makna sik, setna ṭōntloa anhring nôk makna sik a anmanthei hei. Tâk-kha anmani’n kaṭong arangei mak hei khana ajuimak hei.

⁵ Nanpu sōnhei leh khava sânkathemhei kha hringmak jo hei.

⁶ Kasōk sânkathem heia inphut, nanpu sōnhei hneng ṭongpek leh gîkna kapek jo hei, tâk heitea lomak hei khava kara inrengna kha anthōk joa kae. Khava sōa anmalung anthlenga Chunghnung Rōngpu kei in anmani chenhlam kasōk karâkna kapek hei kae khana tlo sik a ka’ntlukna kha katlo kae ti hi anhong manhret jo.’”

Sânkathem in Shakorhei Hmangtalâra Ahmu

⁷ Darius in rengkalen achangna kum 2 tlukna (Shebat inti thla) Pheva thla, kani 24 ning jân a hmangtalâr vânga Rōngpu’n ṭong apek eng.

⁸ Mi inkhat in shakor kasen inkhat aheichōng. Ama kha phaichama reikung hei kâra kangir jo, khana akahnunga shakor ahlek ka-om hei, khahei kha akasen, akabang, khana mêrchîkna akaṭe kabek hei kha kae.

⁹ Ke’n ahnenga kader, “Oja, hiva shakorhei hi heitina mo?” Ama’n amasôn eng, “Anmani hi heitina mo kamanthei sik che.

¹⁰ Rōngpu’n raleichung aka-ensui sik a ajōngtir hei kae.”

¹¹ Anmani hin ngevahei hneng thang ankōi, “Keini raleichung pumpuia kase jo unga vânhnōi raleichung kha atloje om mak jo, nam mathlak a ka-om jo.”

¹² Khava sōa ngeva khan ahri, “Chunghnung Rōngpu, nang Jerusalem leh Judah khōpuihei chunga tûn hi kum 70 nahnuk hongkana jo. Anmani chunga lungset maritna narôn sik pha kha heija mo alakasôt sik?”

¹³ Rōngpu’n ngeva hneng lungngamna ṭong vânga amasôn,

¹⁴ ngeva khan Chunghnung Rōngpu ṭong ahrisōt kha kaphôngsōtna sik a amanthei jo eng: “Kei khōpui intheng, Jerusalem chunga lungset inhnaktak leh lungkhamna kanei,

¹⁵ Jât-hlop hei kadai hngera leh kamōng tak a aka-om hei chunga kahnuk kana hêr. Ajârchu kamihei chunga kahnuk natna kha kakei male pha, khava jât-hei khan kamihei chunga inrengna kha anman hnakdet a kae.

¹⁶ Khava khōpui kalen chunga lungsetna malârna sik a kei Jerusalema hong inle jo eng. Kabek-inn syem manther sik kae, khana khōpui kha sakmanther sik kae.”

¹⁷ Ngeva kha’num hivahi phôngsōtna sik a amanthei eng: “Chunghnung Rōngpu’n ahria ama khōpuihei kha alakakhang sōt sik hei kae khana Jerusalem kha ala’nthōpui nôk sik khana khōpui kha ama ta achangna sik a alatlo sik kae.”

Serakihei Hmangtalâr

¹⁸ Hmangtalâr inkhat a sehratche raki 4 kahmu.

¹⁹ Kei hneng ṭong aleikahri ngeva hneng ke’n kader, “Hiva serakihei hi heitina mo?” Ama’n amasôn eng, “Anmani hi Judah, Israel leh Jerusalem mihei chai kathekna katlo vânhnōi ratha kaneihei kha kae.”

²⁰ Hivasōa Rōngpu’n hembung intu ṭōnkatlo pase 4 amanhmu eng.

²¹ Ke’n kader, “Anmani hin heimo antatlo sik?” Ama’n amasôn eng, “Judah ram kha pui katluk a akasuk inhmanghei khana amihei chai kathekna katlo jât-hei ṭitna kapek sik leh suk mathlâkna sik a anmani akajōng hei kae.”