ṬŌNTLOHEI 3 - LEKHARABU INTHENG (BSI)

Ke kangōi Mi Inkhat Antamandam

¹ Ni khat derna pha chohnung pung 3 a, Peter leh John Bek-inna leikase hei.

² Khava hmun a “Sōngkot Kaṭha” tina hmun a ahringkhōa ke kangōi mi inkhat leika-om. Bek-inna akase-kahong katlohei hneng kut indoa sêr kader sik a ani tina khava sōngkot a khan anvathak ri.

³ Ama’n Peter leh John anhonghlut ahmu pha, heikhat anpekna sik a akut amadoa aleider hei.

⁴ Anmani’n kasang kanga an-ena, khana Peter in, “Keini ahei-en roh” aleitipek!

⁵ Khava jâra ama’n anmani heia inphut heimo khatbek kahmu sik ti mandonpuma inhōrtak a alei-en hei.

⁶ Peter in ahnenga, “Ke’n sêr heite neimak eng, tâk kanei hi pek che rong: Nazareth Jesu Christa rahminga ke choi roh, tia ṭong kapek che kae,” ati.

⁷ Khang’khan akut changting amatu pek a aleikei mathōi. Khava laitak khan ake leh ake ârtui hei kha hong kangar jo.

⁸ Ama inthok a akea kangir jo, khana kalônle jo. Khava sōa anmani leh inṭhōia Bek-inn shunga kahlut a kalônlea inthok a khana Pathen aleimanpâk jo.

⁹ Ama’n Pathen amanpâk a alônle kha khana ka-om mi rakip he’n anleihmu,

¹⁰ khana khava Sōngkot Kaṭha kunga a’n-onga kut indo ṭhakpa achang kha anhei manhret sōt pha heikhong mo hinghiva ṭōn hi akasōk tia inlak anleisak jo khana anleidet-hla jo!

Bek-inn Shunga Peter Ṭonghri

¹¹ Mipa khan Solomon Sumpuk antati hmun a khan Peter leh John aleimatulai hei, mipui he’n det-hlatak a anhnenga heikatla’n inhlut hei.

¹² Mipuihei kha Peter in aleihmu hei pha, hing’hin aleihri pek hei, “Eh ka-Israel changpui hei, heisa mo hivahi nanta det-hla, khana heisa mo hinga nanta-en ung? Hiva mipa hi keini ratha neina vâng a-emak leh Pathen kapō kanchang jâra ake kanta manchoitor kachang sik tia nantamandon mo?

¹³ Nipi leh nipusōnhei Pathen, Abraham, Isaac, khana Jacob Pathen khan asōkpa Jesu chunga marvân lûrna aleipek jo. Nangni’n ama kha ṭong kaneihei kut chunga nanpek sōt a, Pilate in masō sik ati kapha’m nangni hnōm mak chei.

¹⁴ Ama chu a’ntheng leh akaṭha inkhat kae. Tâk-kha nangni’n ama nanhōt a ama kahlânga, mikathat inkhat jôk amasōna sik a Pilate hneng nanlei der.

¹⁵ Hringna hlam kasâtpa kha nanleithat, tâk thina inphut Pathen in aleimathōi sōt jo, khana khava sâkhi kha keini ung hi kae.

¹⁶ Ama rahminga ratha neina khan hiva ke-kangōipa ratha hi amanngarpek kae. Nantahmu leh nantamanhret hi ama rahminga taksenna tatlosōt kae. Jesu taksenna khan ama hi nanhmit hmua damna amanchen jo kae.

¹⁷ “Kasōpui Israelhei, nanhlam kakeihei leh nangni’n Jesu chunga nanta leitlo rakip kha manhretna nanleinei mak jâra kae ti hi tûnchu kamanhret jo.

¹⁸ Hmalai Pathen in sânkathem rakip heia inphut, ama Messiah khan inreng athōk sik kae tia aleiphôngsōt kha hing’hin hui ajōng katlung jo kae.

¹⁹ Nansetnahei rangei mandam achangna sik, insir una, Pathen langa he’nhe ruh. Hivahi nantlo’nchu

²⁰ Rōngpu a’nphut Rathla hratna pha kha jōng katlung sik, khana nangni sik a akadeisōt jo Messiah, Jesu kha ajōngtir pek sik chei.

²¹ Pathen in hmalaia sânkathemhei aleimanhri sōtsa dungjuia, heirakip syem manther achangmak kârseng ama marvân chunga aka-om nger sik kae.

²² Ajârchu Moses’n: ‘Rōngpu nan-Pathen khan kei ajōngtir eng kapōa, nanhnenga sânkathem inkhat nanmi kalan ajōngtir sik kae. Ama’n nangni amanthei chei rakip kha nanta rangei sik kae.

²³ Tu achang inum khava sânkathem tahri ṭong kajuimak mi khachu, Pathen miheia inphut ṭhensōt a, suk manhmang sik kae,’ aleiti.

²⁴ Sânkathem rakip in, Samuel a inphut ama bân hei seng ankhenga, tûnlai kania sik katlunga anta leihrisōt jo kae.

²⁵ Sânkathem heia inphut Pathen ṭong le’ntepna kha nangni sik a kae, khana nankachoi nanpi leh nanpu sōnhei leh Pathen kâra inhnōmtōna shunga khan chen nantanei jo kae. Abraham hnenga aleihri kapōa, ‘Nasōn-napâr heia inphut raleichung mi rakip mahâmṭhat kabuk sik.’

²⁶ Nanṭhat makna inphut nanhe’n hea, nankhenga mahâmṭhat abukna sik chei, Pathen in asōkpa hi akadeia ahma inkeipena nanhnenga ahei tir jo kae.”