ṬŌNTLOHEI 26 - LEKHARABU INTHENG (BSI)

Agrippa Ângkunga Paul Inhrungna

¹ Agrippa khan Paul hneng ahri, “Nabinga ṭong nahrina sik a hnōmpek jo che kae.” Paul in akut azera a’nhrungna ṭong hing’hin ahri:

² “Eh Reng Agrippa! Hiva Jehudi he’n kachunga anmaherna eng rakip a inphut na-ângkunga tuning hin kabinga ka’nhrung sik jâra vâng kaṭhatak inkhat a indon eng,

³ adek a Jehudihei chôndân leh inkhe-beitamna rakip hi nang inchu kaṭhatak a namanhretsa jo kae. Khava jâra kaṭhatak a narangei pek sik enga kangek che.

⁴ “Kasinlaia inphut heikhong mo aheika-om eng ti hi Jehudi rakip in antamanhret kae. Ahma inkeia ka-omna ram a khana abâna Jerusalema heikhong mo kahringkhō kaleihmang ti rakip hi antamanhret pet kae.

⁵ Anmani’n antamanhret ṭhak kae, hin’hin anmanhret manchênsa hnōm inchu, kei hi a’nphutbia inphut keini bekna shunga akahnettak dân kajui rup, Pharisee inkhat eng kae.

⁶ Khana tûnhin kei hi kanpu sōnhei hnenga Pathen ṭong intepna chunga khan inhōrna kanei jâra kaṭong tan sik a akangir eng kae,

⁷ kanmipui phung 12 he’n sûn leh jân Pathen antakamuk a hivakhet hi chentorna sik a inhōrna antanei kha kae. Khana hiva inhōrna jârpen hin, Eh Akalûrpen reng, hiva Jehudihei hin antamaher eng kae.

⁸ Hina ka-om nangni seng in heisik a mo Pathen in mi kathi amathōisōt ti hi taksen sik a ethei mak tia nanta lo?

⁹ “Nazareth Jesu dōina hi katlo tor chenna inṭanghmun lorong tia kabinga kaleimandon.

¹⁰ Khavatak kha kae Jerusalema kaleitlo kha. Thempu Kalen heia inphut ratha neina kaleihmu, Pathen mi hingja kurkhum a kaleida hei; khana anmani thatna sik ṭong katlunga le’nṭang eng.

¹¹ Pha katamtak intûpna innpui heia ênga kalei karâk hei khana antaksenna anmasōna sik a kaleitlo ri. Anchunga khangtuk hrep kahnuk aleinat jâra ram hlop khōpuihei katlunga’m ankasuk inrim sik a leikase eng.

Paul In Ahringkhō Inthlengna Ahri

¹² “Hiva sik jâr pena hin thempu kalenhei ṭong mathlâkna leh ratha neina kha ka’nchoia Damascus a leikase eng.

¹³ Khava sik a kasena hlam a sûnṭimtak a, Eh Akalûrpen reng, kani nek a akavâr inkhat in thangvâna inphut kakimve leh ka’nṭhōipui hei seng aleikake khum ung.

¹⁴ Kankhenga raleia leikapûr ung, khana Hebrew ṭonga, ‘Saul, Saul! Heisa mo nasuk manrim eng? Seche in akapu sung akaper kapōa, kahnungting nakaper khan nabinga a’nsukset che kae,’ tia ajōng hri kare rasa inkhat kalei thei.

¹⁵ ‘Tu che mo, Rōngpu?’ tia kaleider. Khava pha Rōngpu’n ati, ‘Kei hi nasuk manrim Jesu eng kae.

¹⁶ Tâk-kha thōi roh khana nakea ngir roh. Kasōk inkhat a kadei sik chea nahnenga a’nlâr eng kae. Tuninga nahmu eng hi leh nihma khōa kalamanhmu sik che hei hi milak-hei hneng nahri sik hei kae.

¹⁷ Katirna che Israel mihei leh Jât-hlop heia inphut kahuk sik che kae.

¹⁸ Kei anitaksen jâra ansetnahei rangei mandam anchenna sik leh Pathen takadeisōt mihei kâra hmun anchenna sik a anmani hmit namanvâr pek sik hei khana inthima inphut vâra, Seitan ratha neina inphut Pathena nahong mahe sik hei kae.’

Paul in Aṭōn tlohei Ahri

¹⁹ “Khava jâra Reng Agrippa, marvâna inphut kaleihmu hmangtalâr kha ke’n juilo tlomak eng.

²⁰ Ahma inkeia Damascus leh Jerusalem khana abâna Judea pumpui leh Jât-hlop hei kâra ke’n ansetna inphut an-insira Pathen langa anhong inhena sik leh an-insir malârsōtna ṭōn antlona sik a kaleihrilea kae.

²¹ Hiva jâra hin bek-inna kalei omlaitak hiva Jehudihei hin anleisur eng, khana that sik a anleirei eng.

²² Tâk-kha tuning katlung Pathen in a’nṭangpui eng jâra hivahin akangir enga akasin leh akalen mi rakip hnenga sâkhi hi kapek kae. Moses leh Sânkathem he’n akasōk sik tia anta leihri khet kha ke’n kahri kae:

²³ Ti chu Messiah kha khōdeng theina athōk nger sik, thina inphut akathōisōt hma inkeipen akachang sik khana Jehudihei leh Jât-hlop hei hneng hukmanhringna vâr akaphôngsōt sik kha kae.”

²⁴ Paul a’nhrungna ṭong kha khang’khan ahrilai, Festus khan ka-ônga, “Paul, nang invet jo che! Nathemna katamtak khan amanvet jo che!” atipek.

²⁵ Paul in ati, “Akalûrpen reng, kei invetmak eng! A’nchêntak ṭong kadik kha kahri kae.

²⁶ Reng Agrippa! Hivahei hi namanhretsa achang jâra nahnenga kangamtak a kahritor kae. Hiva inkha-khat hei hi namanhret sōpet hei tia inhlamrin eng ajârchu hivahei rakip hi arakir inkhat a marûk a a’ntlo changmak heia kae.

²⁷ Reng Agrippa, Sânkathemhei hi nataksen hei mo? Nataksen ti kamanhret!”

²⁸ Agrippa’n Paul hneng ati, “Hiva pha katôitek shunga hin Christian inkhat manchang tor sik a namandon eng mo?”

²⁹ Paul in amasôn, “Phât kaseitak shunga achanga, akatoitek shunga achanga, tuninga kaṭong hri kathei nang leh alak nankhenga, hiva ka’nkhōpna thirhrui chen sik tei loa, kei kapō nanhong changpet sik hi Pathen hneng kaderna kha kae.”

³⁰ Khava sōa Rengpa, ram vaikarônpa, Bernice leh alakseng inding jo hei,

³¹ khana ansōksōt pha khat leh khat inbek heia, “Hiva mipa hin thinathei a-emak leh kurkhum a da theina sik katlunga tlosetna heite neimak.”

³² Khana Agrippa’n Festus hneng, “Hiva mipa hin Caesar hneng thang aleikōi mak inchu masōthei akachang jo kae,” ati.