ṬŌNTLOHEI 2 - LEKHARABU INTHENG (BSI)

Rathla Intheng Ajōng

¹ Pentecost kani ajōng tluk jo pha, akataksenhei seng hmun khat a le’ntûp hei.

² Manhret manloa marvâna inphut thli kahrâng inhnaktak rasa kapō’n an-omna innshung kha jōng kasip phet jo.

³ Khava sōa, anmani’n hmeimale kapōa a’nsemṭhen heikhat in anchung et a aleisit hei kha anleihmu.

⁴ Anmani Rathla Intheng kasip phet jo hei, khana Rathla khan ṭong theina apek hei jâra, ṭong hlop-hlop a kaṭong inphut jo hei.

⁵ Jerusalema vânhnōi hmun hlop-hlop a inphut akajōng taksenna kanei Jehudi leika-om hei.

⁶ Anmani’n khava rasa kha anthei pha mipui hong intûp jo hei. Khana mi rakip in khava akataksenhei ṭonghri kha ama ama ṭong et a anthei jâra inlak anleisak hêr jo.

⁷ Mandonhla leh inlaktak a anmani’n, “Hinga akaṭonghei hi Galilee mihei changmak hei mo!

⁸ A-enchu heikhong dân mo ni-omna ramṭong et a nithei jo?

⁹ Eini seng me hi leh kha Parthia, Media khana Elam; Mesopotamia, Judea, khana Kappadokia; Pontus leh Asia inphut,

¹⁰ Phrygia leh Pamphylia, khana Egypt leh Cyrene hnenga Libya ramtlâk a mi me kae. Ṭhahrep in Rome a inphut,

¹¹ Jehudi leh Jât-hlop Jehudi Beklang tinga ahong kahlut ther me kha kae; ṭhahrep nôk in Crete leh Arabia inphut me kae, kha’num Pathen ṭōn kalen tlo antahrisōt hichu nibing ṭong et a nithei phâk a kae!” anti.

¹² Mandonhla leh malung inhmak pum a, “Hivahi-e heitina jo mo?” tia khat leh khat le’nder hei.

¹³ Tâk-kha her khat inchu takkasenhei kha, “Hiva mihei hi ju inrui jo hei” tia anleimanuisō hei!

Peter Ṭonghri

¹⁴ Khava pha Sonle 11 hei leh inṭhōia Peter kangirsōt a rasa inhnaktak a mipuihei hneng hing’hin ṭong aleihri: “Ka-Jehudi changpui hei leh Jerusalema ka-om hei, hivahi heitina mo hripek chei rong rangei ruh.

¹⁵ Tûn hi jîngkâr pungkō hrep lakae; nangni tamandon kapōa, hiva mihei hi ju inrui changmak hei.

¹⁶ Tâk-kha hivahi sânkathem Joel taleihrisōt kha kae:

¹⁷ ‘Kani hnung intonga katlo sik kha hivahi kae, Pathen in ati: Mi rakip chunga Karathla kajōng bun mathlâk sik. Nansanu leh nansapa he’n kaṭong anphông sik; Nankhangdông he’n hmangtalâr anhmu sik, khana nan-upahe’n rahmanghei annei sik.

¹⁸ Kadik, kasōknu, kasōkpa hei chung katlunga khava kanikhō hei khan chu, Karathla kajōng bun mathlâk sik, khana kaṭong hi anphôngsōt sik.

¹⁹ Marvân chunga ṭōn-inlak katlosōt sik khana raleichunga’m a’nlak heikatlosōt sik. Thisen, hmei, khana hmeikhu kadup kasōk sik;

²⁰ Rōngpu kani kalûr leh kalenpen ajōng tlung mak hma kani inthim sik, khana thla’m thisen kapōa kasen sik.

²¹ Khava pha leh tûtû achang inum inṭangpui sik a Rōngpu rahming kabek rakip hukmanhring kachang sik.’

²² “Ka-Israel changpui hei, hiva ṭong hi rangei ruh! Pathen in ama a inphut nankâra a’nlak ka-om leh ṭōn-inlak aleitlo rakip khana inphut Nazareth Jesu kha ratha neina inpek ti kha inchên jo. Hivahi nantak khet a nanmanhret, ajârchu hinahin nankâra akasōk kae.

²³ Aṭōn mantluk dungjuia Pathen in Jesu kha nankut chunga pek sōt sik a ṭong mathlâkna aleinei; khana makhei hlon sik a set kaneihei kut a nanphesōt a nanleithat jo.

²⁴ Tâk-kha Pathen in ama kha thina inphut akei mathōi jo, khava ratha neina inphut a amasō jo; ajârchu ama kha thina khan akhum tor sik leichang mak.

²⁵ Ajârchu ama chungchânga David in hing’hin aleihri: ‘Pha rakip a Rōngpu hi kahmai kunga kahmu ṭhak; Ama kahnenga ka-om, khana kei bōina neimak ning.

²⁶ Khava jâra inpâkna kasip eng, khana kaṭongsō rakip inpâkna kasip. Khana kei hi, akathithei kachang inum châmhngatna kachen sik hi inhōrna vâng kamanchên,

²⁷ ajârchu nang in thina raleichunga hin adahlon mak tin che; Nahlamrin nasōk hi thlân shunga aṭop inhmang sik phemak tin che.

²⁸ Hringna hlam namanthei jo eng, khana na-omna khan inpâkna amansipphet sik eng.’

²⁹ “Kasōpui Israelhei, nikachoi rahming inthang Reng David chungchâng hi inlârtak a kahri pek nger sik chei kae. Ama kha kathia anleivûm jo, khana athlân hi tuning katlung nikâra laka-om.

³⁰ Ama kha sânkathem kae, khana Pathen in heiṭong mo atep pek ti kha amanhret: David sōna inphut mi inkhat, David kapōa reng manchang sik a Pathen in ṭong intepna aleinei.

³¹ Pathen in heimo ajōng tlo sik kha David in aleihmu, khava jâra thia inphut Messiah athōisōt sik chungchânga hing’hin aleihri, ‘Ama kha thina raleichunga leidahlon mak; ataksa kha’m thlâna leiṭop inhmang mak.’

³² Hiva Jesu khet hi Pathen in thina inphut amathōi jo, khana hiva omchen kasōk khet sâkhi hi keini kankhenga ung kae.

³³ Ama hi Apa, Pathen kut changting matungsōt a ka-om jo, aṭong leitepna dungjuia ahnenga inphut Rathla Intheng achen jo. Tûntûna nantahmu leh nantathei rakip hi kanchunga aheibun mathlâk kutchoi kha kae.

³⁴ Marvâna aleikake khachu David changmak, ama khet in hing’hin aleihri, ‘Rōngpu khan ka-Rōngpu hneng: Na’nrepuihei kha

³⁵ nake chōnpha a kada mak lai seng, kachangting in-ong roh.’

³⁶ “Khava jâra Israel mipui rakip in, inchêntak a nantamanhret sik hichu, nantalei makhei hlon hiva Jesu hi Pathen in Rōngpu leh Messiah amanchangpa kha kae!”

³⁷ Mipuihei khan hivahi anthei pha, anmalung leikadong hêr jo, khana Peter leh sonle lak-hei hneng, “Heimo kantatlo sik, sōpuihei?” anleiti!

³⁸ Khava pha Peter in hing’hin aleihri pek hei: “Nansetna rakip a inphut rangei mandam nanchena, Pathen kutchoi pek Rathla Intheng nanchenna sik; nansetna heia inphut nanbing et a he’nhesōt ruh, khana Jesu Christa rahminga tui kahlut chang ruh.

³⁹ Ajârchu hivahi Rōngpu ni-Pathen in ama sik a abeksōt nangni leh nansahei khana hmun kahlatak a alaka-om hei hnenga Pathen ṭong intepna kha kae.”

⁴⁰ Anhnenga ngekna leh inṭhōia Peter in ṭong katamtak vâng hing’hin aleimathok hei, “Hiva mikaṭhamak-hei chunga akatlung sik karâkna inphut nanbinga inhuksōt ruh!”

⁴¹ Mi katamtak in aṭong hri kha antaksena tuihlut anchen jo; khava ning khan anrup shunga mija 3,000 kapō besa leikachang heia kae.

⁴² Khang’khan sonle heia inphut them inchuna, inloikhômna khana thlaithleng o-sōmna leh derna neisōmna anpha anleihmang joa kae.

Akataksenhei Kâra Hringkhō

⁴³ Sonle heia inphut ṭōn-inlak leh mandon hlana hingja le’ntloa mi rakip, kajana leh ṭitna leikasip hei.

⁴⁴ Khana takkasen rakip kha malung khat a le’nloikhôm injôn hei khana antanei rakip kha’m khat leh khat le’nsem sōm hei.

⁴⁵ Annei leh ankarōihei kha anjōra, ansêr rakip kha ankhôkna dungjuia le’nsem hei.

⁴⁶ Ani tina arup-rup a Bek-inna le’nhmu hei, khana katlai leh insinsak tak a an-innheia thlai anleisâksap,

⁴⁷ Pathen manpâkna leh inṭhōia mi rakip hri manṭhatna kha anleichen. Khang’khan hukmanhringna kachen jo hei rup kha ani tina Rōngpu’n abesapek ṭhak heia kae.