ṬŌNTLOHEI 14 - LEKHARABU INTHENG (BSI)

Iconiuma

¹ Iconiuma kha’num khang tlit a leikasōk: intûpna innpuia Paul leh Barnabas kase heia anṭonghri them jâra khan Jehudi leh Jât-hlop katamtak akataksen loi hongkachang jo hei

² Tâk-kha takkasenmak Jehudihei khan Jât-hlop hei kha ankachok heia takkasenhei kadōi anmanchang hei.

³ Sonlehei kha khava hmun a khan pha kasôttak leika-om heia, Rōngpu chungchâng kha kangamtak a anleihri, ama khan det-hla leh ṭōn-inlak tlotheina ratha apek heia ama maritna chungchânga anṭongsem dikje kha amanchên pek heia kae.

⁴ Khava khōpui mihei kha rup hnia le’nṭhen jo hei: ahlek in Jehudihei langa, khana ahlek in Jât-hlop hei langa.

⁵ Khang’khan Jât-hlop leh Jehudi ahlek hei, anhlam kakeihei leh intûp heia sonlehei kha tlomanset sik heia inhnōmtō jo hei khana hlung vâng anleidêng jo hei.

⁶ Khava ṭong kha sonle he’n anthei pha Lycaonia shunga Lystra leh Derbe khōpui heia leh akimve ram shunga katlân jo hei.

⁷ Khava hmun heia khan Ṭong kaṭha kha anphông joa kae.

Lystra leh Derbe

⁸ Lystra a khan a’ntetbia inphut ake kangōi, akalôntor hêrmak pase inkhat leika-om.

⁹ In-onga Paul ṭonghri kha aleirangei. Kadam sik eng tia taksenna anei kha Paul in ahmu jâra, kasang kanga a-enna,

¹⁰ rasa inhnaktak a, “Nakea ngir intlun roh!” aleitipek. Mipa kha inthok a ankimvea khan kalônle jo.

¹¹ Mipuihei khan Paul ṭōntlo kha anhmu pha an-Lycaonia ṭonga, “Pathenhei mihring kapō hongkachang heia nihnenga jōng kaṭum jo hei!” tia ông le’nphut jo hei.

¹² Barnabas kha Zeus antia khana Paul kha Hermes anleiti, ajârchu ama kha ṭongpui kahripen leikachanga kae.

¹³ Khōpui vângbât a ka-om, Zeus Bek-inna thempupa khan reihrui leh seche hei sōngkot a aheiṭhōi hei, ajârchu mipuihei khan sonlehei hneng inthoina neitōk anleitlo hnōma kae.

¹⁴ Khava tlo sik a an-intlukna ṭong kha Barnabas leh Paul in anthei pha, anpōnhei ankeihlera, mipuihei kâra katlân inhlut heia, leika-ông hei,

¹⁵ “Heisik a mo hivahi nantatlo? Keini’m nangni kapōa mihring inkhat-hrep ung kae! Keini hi marvân, ralei, tui-ôngpui leh ashunga ka-om rakip kasyempa, akahring ṭhak Pathen sik a, hnemna kase neinâk heia inphut nan-inhesōtna sik a, Ṭong kaṭha kaphôngsōt sik a hiva hmun a akahong ung kae.

¹⁶ Hmalai chu mi rakip hi ama ama lungdo et a anse theina sik aleihnōm pek hei.

¹⁷ Tâk-kha pha rakip a ṭōn kaṭha atlona vânga akahring ṭhak achangna kha amalâr: marvâna inphut khōtui amansûr pek chei, khana aphahrep a hmuchi-bechi amanra a, thlai apek cheia nanmalung inpâkna amansip pek chei.”

¹⁸ Hiseng hi anhri jo katlunga’m sonle he’n anhnenga inthoina antōkna sik a inphut mipuihei kha leikhâmtor vet mak jo hei.

¹⁹ Pisidia ram a Antioch a inphut leh Iconiuma inphut akahong Jehudi ṭhahrep in, mipuihei kha anlangting anleijôr mathlâk heia, Paul kha hlung vâng andenga, kathi jo tia anmandon jâra khōpui vângting anleikeisōt jo.

²⁰ Tâk-kha akataksenhei kha ahnenga anhe’ntûp pha, heikathōia khōpui shunga khan inle nôk jo. Ajîng kania ama leh Barnabas Derbeting leikase jo hei.

Syria Ram a Antioch a An-inle

²¹ Derbea khan Paul leh Barnabas in Ṭong kaṭha anphônga mi katamtak sonle anleimanchang hei. Khang’khan Lystra, Iconium khana Pisidia ram a Antioch katlung kha anvachōn malet nôk a kae.

²² Takkasenhei kha anmanhnet hei khana kadik a an-om ṭhakna sik a mathokna anleinei hei. “Pathen Rengram hlutna sik a khōdeng theina hingja nide nger sik kasōk,” tia anleimanthei hei.

²³ Bekrup rakip a upahei anleikadei pek hei khana derna leh thlai hngōi inṭhōia antataksen jo Rōngpu hnenga pek sōtna annei heia kae.

²⁴ Pisidia ram kha anchōnsōa, Pamphiliah ting kahong jo hei.

²⁵ Perga inti hmun a ṭong anleiphôngsōt, khava sōa Attaliating leikase jo hei.

²⁶ Khana inphut, anmani tuna pui antamathluk jo ṭōn jâra, Pathen maritna thōia an-omna sik a anlei mannganna hei hmun, Antioch kajōna rakōnga intôr inle jo hei.

²⁷ Antioch antlung jo pha, Bekrup mi rakip ankhôm mantûp heia, anchunga Pathen in atlo pekna hei rakip khana Jât-hlop he’num antaksen theina sik a kot amahlang pekna hei kha anleihri pek jo hei.

²⁸ Khava hmun a khan takkasenhei leh pha kasôttak leika-om sōm heia kae.