ṬONGPHÔNG 9 - LEKHARABU INTHENG (BSI)

¹ Khava sōa ngeva 5 tlukna khan apengkun atum jo. Marvâna inphut raleichunga ârsi inkhat ajōngkatla ke’n kahmu, khava hnenga khan adongna kase dôpkhur chabi anpek a kae.

² Khana ârsi khan dôpkhur kot kha amahlanga, hmei thlupui khu kapōa heikasōk; khava khur kōk a ahei kasōk hmeikhu khan kanivâr leh bōirōk a thli amanthim joa kae.

³ Khava hmeikhua inphut a khan khâikhu jōngkasōk heia raleichunga jōng kaṭum hei, âipui tûr kapōhrep a ratha neina anpek heia kae.

⁴ Khana anmachea Pathen mêrchîkna a’ntatmak mihei antasukset tei loa, phi kadông, thingkung, kahar inkhat rōk um antatôn mak sik a anmani kha ṭong anpek heia kae.

⁵ Khaikhuhei khan mihei kha antathat sik a hnōmpek mak hei, tâk thla 5 antasuk manreng sik heia ṭong anpek hei. Khana khava suk manrimna kha âipui tadepna tûrnat kapōa khōdeng theina kha antade sik kae.

⁶ Khana khava thla 5 shunga khan mihe’n thina sik a’njong sik, tâk thina sik hmumak hei ning; anmani kathi hnōm sik hei, tâk thina kha anhnenga inphut katlân sik.

⁷ Khava khaikhuhei kha shakor rea sik a a’ntluk kapōa anlua sana lukhu an-inkhu, khana anhmai kha mihring hmai ka-ang.

⁸ Khana ansam kha nupuihei sam ka-anga, anha kha shabakkai ha ka-ang.

⁹ Khana an-ôp kha thir ômpho kanei ka-ang hei, khana anmathla mahring rasa kha rehmun a shakor gâri katamtak katlân rasa kapōa inhring.

¹⁰ Âipui kapōa rahmei leh depna annei, khana anmani thla 5 mihei suk manrimna sik anrahmeia ratha annei.

¹¹ Anmani’n reng inkhat annei, ama kha dongna kase dôpkhur kahlōpa ngeva kha kae. Hebrew ṭonga arahming Abaddon inti, Greek ṭonga Apollion inti (khava tina khachu “Akasuk inhmangpa” tina kae).

¹² Inrengna inkhat kathleng jo; hivasōa akakhe chet a 2 akajōng sik hei kae.

¹³ Khava sōa ngeva 6 tlukna khan apengkun atuma, Pathen ângshunga a’ntung sana maichâm rakir 2 a inphut rasa inkhat ke’n kathei.

¹⁴ Khava rasa khan ngeva 6 tlukna pengkun kachoi hneng khan, “Euphrates tuidung kalen shunga a’nkhit ngeva 4 hei kha masō hei roh,” atia kae.

¹⁵ Ngeva 4 hei kha amasō jo hei; khava ngevahei kha mihring rakip sem thuma sem khat kathatsō sik a tûn phatak a tuning kanitak a tûn thlatak a tûn kumtak a intlukdek jo hei.

¹⁶ Shakor chunga remi kachōnghei kha: crore 20 hei kae tia anja animanthei eng.

¹⁷ Khana hmangtalâra shakor leh achunga kachōng kahmu hei kha: an-ômpho hmeira-ê in-ât kapōa in-ât, hlung mankatam sapphir in-êm kapōa in-êma, kât kapōa ka-ênga kahmu hei. Shakorhei lu kha shabakkai lu ka-ang, khana anbei khura inphut hmei, hmeikhu, khana kât heikasōk a kae.

¹⁸ Khava shakorhei beia ahei kasōk: hmei, hmeikhu, kât, hrise 3 hin mihring sem thuma sem khat athat jo hei.

¹⁹ Ajârchu shakorhei ratha neina kha anbei shunga leh anrahmeia ka-om. Anrahmei kha mari lu apō, khana anmani’n mihei anrahmei vâng ansuk mannat heia kae.

²⁰ Khana hiva hrise tathatmak hei seng kha’num, anṭōnse tlona inphut anmalung thleng dekmak hei. Anmani’n rathla ravaihei leh sana vâng, dangka vâng, sum-êng vâng, hlung vâng leh thing vânga limhei, rasa katheitor mak leh hmit kahmu tor mak, lôn um akalôntor mak hei kha, kamukna bângmak hei.

²¹ Khan chu anmithat, andôi choi, ankajông, an-inrûk bângdek mak heia kae.