ṬONGPHÔNG 8 - LEKHARABU INTHENG (BSI)

Achîkna 7 hei

¹ Khana Kemōngte khan achîkna intat 7 tlukna kha asuk khōia amahlâng pha, pung khat leh aher kapō, pha bongkhat marvâna kadai hngera kae.

² Khana Pathen hmaikunga kangir ngeva 7 kahmu hei, anhnenga pengkun 7 anpek heia kae.

³ Khana ro mankhutna sik kasip sana thlengkam kanei ngeva hlop inkhat kahonga maichâma hong kangira kae. Len in-ongna hmaikunga maichâm chunga Pathen mihei derna leh inṭhōia ro mankhutna sik marim katui hingja ama kha anpek a kae.

⁴ Khana Pathen mihei derna leh inṭhōia ro mankhutna marim katui akhu kha ngeva kut chunga inphut Pathen ângshunga kaketoua kae.

⁵ Khana ngeva khan ro mankhutna thlengkam kha aloa, khana maichâm hmei kha asun mansip a, khana raleichunga ajōng hlon mathlâk a kae. Khava pha khōjang kapōk rasa intheia, khō inphea, khana lingnu innok a kae.

Pengkunhei

⁶ Khana ngeva 7 pengkun 7 kaneihei kha’n anpengkun tum manhringna sik a intluk jo hei.

⁷ Ngeva hma-inkei khan apengkun atum jo. Hmei leh kahre, thli leh inṭhōia heikasōk a khavakha raleichunga ajōng hlon mathlâk jo. Khana raleichung sem thuma sem khat, thingkung sem thuma sem khat, kahardông sem thuma sem khat kakâng jo.

⁸ Khava sōa ngeva 2 tlukna khan apengkun atum jo. Hmebung kalentak kapō heikhat hmei kakânga tui-ôngpui shunga inhlon inthla a kae. Tuipui sem thuma inkhat kha thisen inchang jo.

⁹ khana tui-ôngpui shunga akahring ranhring sem thuma sem khat kathi jo, khana rakōng rakip sem thuma sem khat kakâng inhmang jo hei.

¹⁰ Khava sōa ngeva 3 tlukna khan apengkun atum jo. Hmeiser inkhat kapō ârsi kalentak, hmei akakâng inkhat marvâna inphut jōngkatla, khana khavakha tuidung sem thuma sem khat leh tuihnâr sem thuma sem khat chunga katla a kae.

¹¹ (Ârsi rahming kha “Akakha” inti.) Tui sem thuma sem khat kakha jo, tui kha akakha achang jo jâra aka-in mi katamtak kathi jo hei.

¹² Khava sōa ngeva 4 tlukna khan apengkun atum jo. Kani leh thla khana ârsi sem thuma sem khat asuk manset jo, khava jâra anvârna kha sem thuma sem khat inhmang jo; khang’khan sûn leh jân sem thuma sem khat kajing joa kae.

¹³ Khava sōa ke’n ka-ena, bōirōk chunga marhmu inkhat kajōnga rasa inhnaktak a a-ôn, “Ô-ah! tuna ngeva 3 in antalatum manhring nger sik pha shunga raleichunga alaka-om mi seng chunga heituk a de a’ntak sik mo nu!” ati kha ke’n katheia kae.