ṬONGPHÔNG 5 - LEKHARABU INTHENG (BSI)

Kemōngte leh Lekha Inze

¹ Len in-ongna chunga a’n-ongpa akut changting amatu a’nze lekha inkhat kaleihmu; Khavakha alang hnia a’nzet lekha pheng vâng ankasûna achunga mêrchîkna 7 ankatat a kae.

² Khan chu ratha kaneitak ngeva inkhat rasa inhnaktak a ṭong kaphông kahmu, ama’n, “Hiva lekha inze mêrchîkna intatkhum hi asuk khōia a’nhlâng sik rahōi kasōk tu mo aka-om?” atia kae.

³ Tâk-kha marvân leh raleichung leh ralei thōi achanga khava lekha inze amahlanga ashung ka-en sik tûte om mak a kae.

⁴ Khava lekha inze kha amahlanga ashung ka-en sik mi tûte rahōi kasōk a-om mak jâra kei malung kana tak a leikaṭap eng.

⁵ Khava pha upahei kâra inkhat in kahnenga ahri, “Ṭap mak roh. Enroh! Judah phung shunga David sōn kalen shabakkai khan torna anei jo, khana ama’n mêrchîkna intat kha asuk khōia lekha inze kha amahlâng tor jo.”

⁶ Khava pha upahei leh ranhring 4 hei takake khum len in-ongna laiṭim a kangir kemōngte inkhat ke’n kahmu. Khava kemōngte kha ale’nthatsa achangna sungbi leh hong inlâra kae. Khan chu kemōngte khan raleichung pumpuia ajōng-intir Pathen Rathla 7 leh raki 7, khana hmit 7 aneia kae.

⁷ Khava kemōngte kha kasea len in-ongna chunga a’n-ongpa kut changtinga lekha inze achoi kha avaloa kae.

⁸ Khanga ama’n avalo pha, ranhring 4 leh upa 24 hei kha kemōngte hma inkun heia kae. Anmani’n serângdâr inkhat et leh Pathen mihei derna marim katui kasip sana thlengkam kha anchoia kae.

⁹ Anmani’n hlather inkhat anleisak: “Lekha inze kalo sik a leh mêrchîkna intat kha akasuk khōia inhlâng sik a nang rahōi kasōk che. Ajârchu nang anleithat che, khana nang inthoina thina vâng khan phung rakip, ṭong rakip, jât rakip, mihring rakip kâra inphut, mihei kha nang in Pathen sik a narachôk jo heia kae.

¹⁰ Nang in anmani kha ni-Pathen inzen sik a thempuhei rengram nasyempek jo hei, khana anmani’n raleichung vai antarôn sik kae,” tia hla ansak.”

¹¹ Khan nôk chu ke’n ka-ena, marvâna ngeva lishing raja hei rasa kathei! Anmani len in-ongna kimvea ranhring 4 leh upahei leh kangir heia,

¹² rasa inhnaktak a hla ansak: “Kemōngte ale’nthat kha ratha hratna, neina, singna, khana ratha neina, kajana, lûrna, choi ka-ânna achen sik a rahōi kasōk a kae!”

¹³ Khana ke’n marvân chunga leh raleichunga khana ralei thōia leh, tui-ôngpui thōia ranhring seng, vânhnōi ranhring rakip hlasak kha kalei thei: “Len in-ongna chunga a’n-ongpa leh kemōngte kha, choi ka-ânna, kajana, lûrna leh ratha hratna are-rea atâ chang rasoh!”

¹⁴ Ranhring 4 hei kha’n anmasôna, “Amen!” anti. Khana upahei kha inkun heia anleikamuk jo.