ṬONGPHÔNG 22 - LEKHARABU INTHENG (BSI)

¹ Khan chu ngeva khan kemōngte leh Pathen len in-ongna inphut hringna tuidung hlungvâr kapōa

² khōpui shung atlâk a akalōng kha amanhmu eng. Tuidung pang inkhat et a hringna thingkung kahmông, kum khat a ve 12, thla khat a vōi khat sam inra. Khana abō kha jât-hei damna kae.

³ Khōpui shunga khan Pathen hâksêrna kachen inkhatbek inhmu mak ning. Khōpuia khan kemōngte leh Pathen len in-ongna ka-om, khana khan asōk he’n ama antakamuk sik kae.

⁴ Anmachea arahming inzet sik, khana anmani’n Ahmai kha anhmu sik.

⁵ Khana khan jân inti om mak jo ning, kanivâr leh hmeivâr rangei mak jo ning, ajârchu Rōngpu Pathen kha anvâr kachang sik jo, khana renghei kapōa are-rea anmani’n vai antarôn sik jo kae.

Jesu Jōngna sik

⁶ Khava sōa ngeva khan kahnenga ahri, “Hiva ṭong hi akadik leh taksenthei kae. Khana sânkathemhei hnenga arathla kapek, Rōngpu Pathen khan inrangtak a ajōng kasōk sik omchen, asōk-hei manhmuna sik a angeva ajōngtir jo.”

⁷ Jesu’n ati, “Rangei ruh! Kei inranga akajōng sik eng kae! Hiva lekha shunga sânkathem ṭong kajuihei kha mahâm kaṭhahei kae!”

⁸ John, ke’n, hivahei rakip hi kahmu heia khan chu kathei jo hei. Khana khahei kha ke’n katheia kahmu sō pha, hiva omchenhei ani’nhmu ngeva kha, kamuk sik a ake hma inkun eng.

⁹ Tâk-kha ama’n kahnenga ati, “Kha tlomak roh! Ke’m nang leh nasōpui sânkathemhei leh khana hiva lekharabu shunga ṭong kajuihei seng leh a’n-anghrep sōk inkhat eng kae. Pathen jôk kamuk roh!”

¹⁰ Ama’n kahnenga ati, “Hiva sânkathem lekha ṭonghei hi ip mak roh ajârchu hiva rakip hi ajōng sōkna sik pha kahnai jo.

¹¹ Tu achang inum mikaṭhamak khan ṭhatmak khanga atlo manjōm nger sik, khana a’nthengmak katlo khan khanga a’nthengmak atlo manjōm nger sik kae; akaṭha khan akaṭha khanga atlo manjōm nger sik, khana a’ntheng khan khanga a’ntheng atlo manjōm nger sik kae.”

¹² Jesu’n ahri “Rangei ruh!. Kei inrangtak a kajōng sik eng! Ke’n mi rakip anṭōntlo dungjui et a kapek sik tloman leh ajōng inṭhōi sik eng kae.

¹³ Kei ahma kakei leh hnung kakhôr, aphutna leh achaina eng kha kae.

¹⁴ “Tu achang inum apōnsi kasôp inthengpet a khana hringna thingkung kara kasâk sik a ratha kanei khana sōngkot a kahlut a khōpui akatlung kha mikahōihei kae.

¹⁵ Achang ravâng khōpui vângting khan chu, mikahōn inthla, mikaṭhamak, dôi kachoi, mikajông, mikathat, limsyem inmuk, ṭōntlo leh ṭonghria malei kasei ka-om hei.

¹⁶ “Jesu, Ke’n, hivahei hi bekrup shunga nangnihei hnenga akahri inthang sik a kangeva kajōngtir jo kae. Kei David innshunga asōn eng kae; akavâr jîngkâr vârpa eng kae.”

¹⁷ Rathla leh Hmōinu khan, “Hong roh!” anti. Hiva akathei rakip inum, “Hong roh!” antati nger sik kae. Tu achang inum tui kahre rakip hong ruh; tu achang inum a’ndu rakip in hringna tui kha kutchoi inkhat kapōa rahlâng ruh.

Achaina

¹⁸ John, ke’n, hiva sânkathem lekharabu ṭong kathei rakip hnenga kamanse kae: mi inkhat in heikhat ahap sa’nchu, hiva lekha shunga hrisehei kha ama karâkna sik a Pathen in ahapsapek sik kae.

¹⁹ Khana hiva sânkathem lekharabu ṭong heia inphut mi inkhat in heikhat alosōt inchu, hiva lekha shunga a’nhri khōpui intheng leh hringna thing kara chen sik a inphut Pathen in ama chen alosōt pek sik kae.

²⁰ Hiva a’nhrina rakip chunga sâkhi kapekpa khan ati, “Ôk kadik! Kei inrangtak a kajōng sik eng!” Hing’hin chang rasoh. Jōng roh, Rōngpu Jesu!

²¹ Rōngpu Jesu maritna kha mi rakip chunga tlung rasoh.