ṬONGPHÔNG 14 - LEKHARABU INTHENG (BSI)

Kemōngte leh Amihei

¹ Khava sōa ke’n ka-ena, Zion Tlâng chunga Kemōngte kangira; ama rahming leh apa rahming a’nzet mi 144,000 hei ama leh inṭhōia ka-om hei.

² Khana khō inri leh tuitông rasa kapōa a’nhnaktak marvâna inphut, rasa inkhat ke’n kathei. Khava kathei rasa kha serângdâr leh rōsem mahring rasa ka-ang.

³ Mipui 144,000 hei kha len in-ongna leh ranhring 4 hei khana upahei hma a kangir hei; khana upahei kha’n antasak thei hlather inkhat anleisak. Anmani rōk kha huksōt sahei kae.

⁴ Anmani kha nuhmei kaneimak leh nuhmei leh ala’ntônmak intheng senga aka-om mihei kae; Anmani’n kemōngte ase sena akahnung anjui. Anmani mihring ralak-hei kâra katlensōtsa hei kha kae. Khana ahma inkeipen kara, Pathen leh kemōngte hneng pek sōt sik hei kha kae.

⁵ Anmani kha anmalei seina inhret hêrmak; ṭhenakase hei kae.

Ngeva 3 hei

⁶ Khava sōa ngeva hlop inkhat bōirōk inshânga ajōng kha ke’n kahmu, ama khan kumsôt hringna ṭong raleichung mihring jât rakip, phung rakip leh ṭong rakip hneng ahrilea kae.

⁷ Ama rasa inhnaktak a ka-ônga, “Pathen ṭit ruh, alenna choi manshâng ruh! Ajârchu ama’n mihringhei ṭong atanna sik pha kha kahong jo. Khava jâra marvân, ralei, tuipui leh tuiri kapût kasyempa kamuk ruh!” atia kae.

⁸ Ngeva 2 tlukna khan hma-inkei kha ahei juia ahri, “Amanu katlu jo! Babylon kalen kha katlu jo! Amanu’n mi rakip aju apek heia aman in hei, ama juhning, hurna ju kha kae!”

⁹ Ngeva 3 tlukna khan hma-inkei 2 hei kha ahei jui heia, rasa inhnaktak a ahri, “Tu achang inum amachea leh akut changtinga ranhring mêrchîkna ka-om leh ranhring limsyem inmuk mi khan

¹⁰ Pathen hnuk natna ju, hnuknat inhnaktak a asun mansip kōkleia ju kha, anbinga an-in sik! Khava katlo rakip kemōngte leh angeva intheng hei hmaikunga hmei leh kât kângna shunga khōdeng katheia ka-om sik hei.

¹¹ Anmani khōdeng mantheina hmeikhu kha are-rea a’nsûk ṭhak sik kae. Khava ranhring rahming leh achîkna kanei rakip leh alim inmuk hei seng kha sûn leh jân ankhōdengthei bângmak ning.”

¹² Jesu kataksenhei leh Pathen ṭongpek kajuihei, Pathen mihei dehratna sik a hivahi arangei kae.

¹³ Khava sōa marvâna inphut rasa inkhat katheia ahri, “Hi mazet roh: Rōngpu ṭōn tlona shunga tuna inphut akathi mihei kha mikahōihei kae!” Khana Rathla khan amasôn, “Ôk, Kadik! Ajârchu anmani’n anṭōntlo kara anta’nloa, anṭōn inhnakna a inphut châm a’nhnga sik hei kae.”

Raleichung Sa-ât

¹⁴ Khava sōa ke’n ka-ena, sumtuk kabang inkhat chunga mi inkhat kapōa in-onga, alu chunga lenlukhu inkhua, khana kôite kangeijap inkhat akachoi ka-om.

¹⁵ Khava pha bek-inna inphut ngeva hlop inkhat heikasōk a sumtuk chunga a’n-ongpa hnenga khan rasa inhnaktak a a-ôn, “Nakôite kha keisōt ina sâng kha ât roh sa-ât pha jo kae, vânhnōi ralei sâng kahmin sō jo!”

¹⁶ Khava pha sumtuk chunga a’n-ongpa khan, akôite kha akeisōt a raleichung sâng kha a-ât joa kae.

¹⁷ Khava sōa marvân chunga bek-inn shunga inphut ngeva hlop inkhat heikasōk a, ama’n kôite kangeijap inkhat anei kha ke’n kahmu.

¹⁸ Khava pha, maichâma hmei katinta, ngeva hlop inkhat heikasōk. Ama’n kôite kangeijap kanei hneng khan rasa inhnaktak a a-ôn, “Nakôite hmang ina, raleichunga vomhrui theihei kha ṭhōt jo hei roh!”

¹⁹ Khava jâra ama’n akôite kha akeisōt a vomhruia theibōr hei kha a-ât mathlâk a, Pathen hnuk natna vomhrui epna shunga ahlon mathlâk jo hei.

²⁰ Vomhrui thei kha kurpui vângting an-ep a, khana inphut thisen heikasōk a adung kilometre 300 kasei a’nthuk metre 2 kapō hi kasip a kalōng joa kae.