ṬONGPHÔNG 13 - LEKHARABU INTHENG (BSI)

Ranhring 2 hei

¹ Khava sōa tuipuia inphut ranhring inkhat ahei kasōk ke’n kahmu. Ama’n alu 7, araki 10 anei; aluhei chunga khan Pathen teitômna rahming inzet et, araki chunga lenlukhu ka-om et a kae.

² Khava kahmu ranhring kha rûtnu ka-ang, ake kha kavom kepha ka-ang, khana ahmur shabakkai ka-ang. Ama hnenga khan rihren in aratha neina leh alen in-ongna, khana aṭong neina katamtak apek.

³ Ranhring lu inkhat khachu thatsa jo kapōhêra intôn, tâk a’ntônna takbi kha kadam jo. Vânhnōi ralei in anmandon-hla et a akahnung anjuia kae.

⁴ Khana mihring rakip in rihren kha ankamuk, ajârchu ama’n ranhring kha aratha neina rakip apek sōt joa kae. Khava jâra ranhring kha’m ankamuk a, “Ranhring kapō hi tu mo aka-om? Tu’n mo ama a’nrepui tor sik?” antia kae.

⁵ Khana ranhring kha inlensaktak a Pathen teitômna sik, thla 42 ratha neina anpek joa kae.

⁶ Khana ama’n Pathen leh Pathen rahming, khana a-omna marvân leh achunga ka-om rakip, hâksêr inphut joa kae.

⁷ Phung leh jât, ṭong leh mi rakip chunga torna ratha inpea, khana Pathen mihei seng re intukpuia torna sik ratha inpek jo.

⁸ Raleichung ansyem mak hma ale’nthat jo Kemōngte hringna lekha shunga rahming a’nzet hei tei loa raleichung mi rakip in ama antakamuk sik kae.

⁹ “Khava jâra kōr nannei inchu rangei ruh!

¹⁰ Sur sik a ka-om mi kha sur nger sik kae; khan chu chemjâm vâng that sik a ka-om mi kha chemjâm vâng that nger sik kae. Hivahi Pathen mihei khan antaksenna leh andehratna sik arangei kae.”

¹¹ Khava sōa ranhring ahlop inkhat raleichunga inphut ahei kasōk ke’n kahmua kae. Ama’n kemōng raki kapō 2 aneia, rihren rasa kapōa kaṭonga kae.

¹² Hma-inkei ranhring ratha neina seng kha ama’n ahmai kunga ahmang joa kae. Ranhring hma-inkei a’ntônna takbi akadam jo kha, raleichunga ka-om mi rakip in ankamukna sik ama’n rumhrat tak a atloa kae.

¹³ Hiva 2 tlukna ranhring hin ṭōntlo inlak atlosōt hei; ama’n mi rakip hmaikunga marvâna inphut raleichunga hmei abek mathlâk a kae.

¹⁴ Ama’n ranhring hma-inkei hmaikunga aṭōntlo inlakna vâng khan raleichunga ka-om mi rakip ahōn mathlâk jo hei. Ranhring khan raleichung mi rakip hneng, ranhring chemjâma a’ntôna alakahringpa kajana, alim antasyem sik a ṭong apek hei.

¹⁵ Ahma inkei ranhring lim insyem kha aṭongsōt torna sik, khana limsyem inmukmak seng athat torna sik a, ranhring 2 tlukna khan limsyem kha hringna kaphuk ama sa khumna sik a hnōmpek jo kae.

¹⁶ Ranhring khan kasin-kalen, akahao leh sara, sōk leh masō, mi rakip ankut changting, a-emak leh anmachea chîkna aja rumhrat a adapek hei.

¹⁷ Khava ranhring rahming a-emak leh rahming kahlanga achîkna aja kha ama’n aneimak inchu, tûte’n heikhat jōrsōt leh rachôk tlothei mak ning.

¹⁸ Hivahin singna arangei kae. Khava ranhring aja manhretna kha tu achang inum singna kanei in amanhret tor, ajârchu khava aja kha mihring inkhat rahming kahlanga aka-om kae. Khava aja khachu 666 kae.