ṬONGPHÔNG 10 - LEKHARABU INTHENG (BSI)

Ngeva leh Lekha Inze Kasintek

¹ Khava sōa ngeva ratha kaneitak ahlop inkhat sumtuk vâng a’ntōm, alu kimvea saisûm takake khum ahmaisō kani ka-ang. Khana ake hmei chopui kapō, marvâna inphut ajōng kaṭum ke’n kahmu.

² Akut a lekha inze inhlang kasintek inkhat ka-om. Ama’n ake changting tui-ôngpui achōna, ake veiting raleichung achōn,

³ khana shabakkai inhrung kapōa rasa inhnaktak a ka-ông. Khana ama a-ôngsō pha, khō inri 7 rasa’n anmasôna kae.

⁴ Anmani anṭongsō lim a, ke’n lekha shunga mazet manhlut sik a intluk jo eng. Tâk-kha marvâna inphut rasa inkhat in, “Khō inri 7 tahri kha thup ina da roh; mazet mak roh!” ati ke’n kathei.

⁵ Khava sōa tuipui leh tlâng akoptō chunga kangir marvân ngeva kaleihmu khan akut changting kha marvânting akalânga

⁶ marvân leh ralei khan chu tuipui ashunga ka-om rakip kasyem, are-rea akahring ṭhak Pathen rahminga inhâksêra, ngeva khan ati, “Sôtmak jo ning!

⁷ Achang ravâng ngeva 7 tlukna khan apengkun atum pha, Pathen ṭōnmantluk inthup kha asōk sânkathemhei hnenga aleimanhri hei kapōa hui akatlung sik kae,” ati.

⁸ Khava sōa marvâna inphut rasa kalei thei khan kahnenga ahri nôk, “Tuipui leh raleichunga akangir ngeva kut chunga ka-om lekha inze a’nzer jo kha akalo se roh.”

⁹ Khana kei ngeva hneng khan khava lekha inze kasintek kha akalo sik a kase enga kavader. Ama’n kahnenga ati, “Lo inna sâk roh, nabeia chu khōihning kapōa kathlum sik, tâk navon shunga chu akathûr sik kae.”

¹⁰ Ke’n lekha kasin inze kha akut a inphut kaloa kasâk jo, khana kabeia khōihning thlum kapōa kathlum. Tâk-kha kamadesō pha kavon shungting chu kathûr joa kae.

¹¹ Khava sōa kahnenga amanthei enga ati, “Pathen ṭong thangkōi hi mi katamtak hneng leh jât katamtak hneng ṭong katamtak hneng leh reng katamtak hei hneng nahri nôk nger sik kae.”