ṬONGPHÔNG 1 - LEKHARABU INTHENG (BSI)

¹ Jesu Christa’n aphôngsōt omchenhei mazetna kha hiva lekharabu hi kae. Inrangtak a ahong kasōk sik omchen kha asōk-hei hneng manhmuna sik a hiva phôngsōtna hi ahnenga Pathen in aleipek kae. Christa’n asōk John hnenga angeva ajōng tira hiva omchenhei hi aleimanthei,

² khana John in aleihmu rakip kha aleihrisōt. Pathena inphut ṭong leh Jesu Christa’n akadik aphôngsōt chungchânga ama thangkōina kha hi kae.

³ Hiva lekharabu katei kha mikahōi kae, khana hiva inngei leh lekharabu shunga a’nzet ṭong kajuihei kha mikahōihei kae! Ajârchu hihei rakip ajōng tlungna sik pha kha kahnai jo.

Bekrup Sarihei hnenga Marimna

⁴ Johna inphut Asia ram bekrup 7 hei hneng: Aka-om, aleika-om, alaka-om sik Pathena inphut leh alen in-ongna hmaikunga ka-om rathla 7 heia inphut,

⁵ khana taksen ka-om sâkhi kapek akathia inphut ahma inkeipena keimathōi sik khana ralei renghei vaikarôn Jesu Christa a inphut maritna leh lung mōngna nanta chang rasoh. Ama’n alungset me, khana ama a’ntōksōt a athia khan eini nisetna heia inphut ning leh hnōma amasō jo me,

⁶ khana a-Pathen leh a-Pa inzen sik a rengram thempuhei amanchang jo me. Jesu Christa kha are-rea ratha kahrat leh akalûr changṭhak rasoh! Amen.

⁷ Enruh, ama sumtuk-hei chunga kajōng! Mi rakip leh ama kasei vânga akasun he’num anhmu sik. Raleichunga mi rakip in ama ṭajai ansui sik. Khang’khan kachang sik!

⁸ Aka-om, aleika-om, alakahong sik Akahratpen Rōngpu Pathen khan, “Kei aphutna leh achaina eng kae,” ati.

Christa Manhmuna Hmangtalâr

⁹ Kei nansōpui John eng kae khana Jesu Christa kajuile inkhat a kei hi nangnihei chen neipui, ama rengram mihei chunga inrengna ajongtlung pha dehrattak a akathōkpui eng kha kae. Jesu taphôngsōt ṭong kadik kha leh Pathen ṭong kha ke’n kahri manthang jâra Patmos inti tuikekhuma kei anleikhum eng.

¹⁰ Rōngpu kani ning kei kha rathla’n aleiṭhōi eng, khana kakahnung ting pengkun mahring rasa kapō inhnaktak inkhat katheia kae.

¹¹ Rasa khan ati, “Nang in nahmu kha mazet roh, khana namazet lekharabu kha bekrup 7 hei hneng ti chu: Ephesus, Smyrna, Pergamum, Thyatira, Sardis, Philadelphia, khana Laodicea hei hneng manrôn hei roh.”

¹² Kahnenga ṭongkahri kha aka-en sik a kei inhe eng, khana thaihmei matungna sana vâng a’nsyem kung 7 kahmua kae,

¹³ khavahei kâra khan mihring kapō inkhat kangira ake katlung bit pōn inkhat a’nsia, khana sana khōnkir inkhat a-ôp a akira kae.

¹⁴ Asam kha sahme chek kapōa a-emak leh kavur kapōa kachek, khana ahmit kha hmeimale kapōa in-ât a kae;

¹⁵ Akephahei kha sum-êng phûmhmeia a’nro inthenga a’nnôt invâr kapōa kavâr, khan chu akare rasa kha tuitông rasa ka-ang.

¹⁶ Ama’n akut changting ârsi 7 achoi, khana abei shunga inphut alang hnia kangei chemjâm inkhat heikasōk a kae. Ahmaisō kha sûnṭim kanivâr kapōa kavâr.

¹⁷ Ke’n ama kha kahmu pha, akathi kapōa akekunga katlu jo eng. Ama’n akut changting kachunga ada a ahri, “Ṭimak roh! Kei a’nphutna leh a’nchaina eng kae.

¹⁸ Kei akahring ṭhak inkhat eng kha kae! Kei leikathi eng, tâk tûnchu are-rea sik a kahring jo eng. Ke’n thina ram chunga leh thina chunga torna ratha kanei.

¹⁹ Khava jâra tuna aka-om achanga, hnunga ahong kasōk sik achanga, nang in nahmu heirakip, mazet manhlut roh.

²⁰ Nang in kakut changtinga kachoi ârsi 7 leh thaihmei matungna kung 7 sana vâng a’nsyem nahmuhei takhing a’nthup khachu: ârsi 7 kha bekrup 7 hei ngevahei kae, khan chu hmeivâr kung 7 hei kha bekrup 7 hei kha kae.