ṬONGKATANHEI 2 - LEKHARABU INTHENG (BSI)

Bokhima Rōngpu Ngeva

¹ Rōngpu ngeva Gilgal a inphut Bokhima kasea Israelhei hneng ahri, “Ke’n nangni Egypt a inphut kaheiṭhōisōt chei khana nanpu sōnhei hneng kale’ntepna ram a kaheiṭhōi chei. Ke’n nangni hneng kaleihri, ‘Ke’n nanhnenga kale’ntepna ahei tik a’m makhōimak ning.

² Hiva ram a ka-om mihei leh intepna heite inkhatbek nantanei mak sik kae. Anmani maichâm nantasuk manhmang sik kae.’ Tâk nangni’n kaman theina kha tlomak chei. Akalet rōk nantloa kae.

³ Khava jâra hiva mihei hi nangni hmating nanheisor pha ke’n hnongsōt mak jo hei ning. Anmani’n nangni kadōi hongkachang sik hei, khana antakamuk Pathenhei vânga nangni ansur sik chei.”

⁴ Ngeva khan hiseng ahrisō pha Israelhei kha ông leh ṭap anphut jo,

⁵ khava jâra khava hmun kha Bokhim tia anphō jo. Khava hmun a khan Rōngpu hneng inthoina anleitōk a kae.

Joshua Akathi

⁶ Joshua’n Israelhei kha anhlam et a atirsōt jo hei, anram et kahlō sik a kase jo hei.

⁷ Joshua’n ahring lai seng, Israel he’n Rōngpu kha anleirazen, khana ama athisōa hlamkakeihei, Rōngpu’n Israel sik a ṭōn kalen aleitlo rakip akahmu hei, anhring kârseng razenna kha anleitlo manjōm.

⁸ Rōngpu sōk Nun sapa Joshua akum 110 atluk pha kathi jo.

⁹ Ama kha ama ramṭhen Gaash Tlâng sak tinga Ephraim tlângram Timnath Serah hmun a anhre jo.

¹⁰ Khava khang ankhenga kathisō jo hei, abân khang he’n Rōngpu Israel sik a aleitlo pek hei kha anmahngi jo.

Israel he’n Rōngpu Kamuk Akahai hei

¹¹ Israel mihe’n Rōngpu dōina set antloa Baal kha kamuk anphut jo.

¹² Egypt ram inphut anhei kaṭhōisōt Rōngpu, anpu sōnhei Pathen kamukna kha kahai jo hei, ankimvea ka-om mihei pathenhei kha ankamuk manphut jo. An-ângkunga inkun heia Rōngpu hnuk anmannat a kae.

¹³ Rōngpu kamuk anhaia Baal leh Ashtartes anleirazen jo hei.

¹⁴ Khava jâra Rōngpu kha Israel chunga ahnuk kana hêr jo khana rerûk katlohei amanbuhlu heia amanchom jo hei. Ankadōihei amankimve bit heia amanhrat chet jo hei, Israel inhrung tor mak jo.

¹⁵ Rehmun a anse kataia Rōngpu’n aleiti kapōa aleidōi jo hei. Anmani khōdeng anleithei hêr jo.

¹⁶ Khava sōa Israelhei kha rerûk katlo heia inphut hukna sik a Rōngpu’n hlamkakei aleipek hei.

¹⁷ Tâk Israel he’n hlamkakeihei ṭonghri leidon mak hei. Israel kha Rōngpu hneng taksenthei changmak jo khana pathen hlop hei ankamuk jo. Anpusōn he’n Rōngpu ṭongpek anleijui, tâk hiva khangtherhei chu inrangtak a kabâng jo hei.

¹⁸ Rōngpu’n Israel kha hlamkakei apek phatina, ama kha Rōngpu’n athlop a ama hring lai seng mipuihei kha ankadōihei kut a inphut ahuk hei. Rōngpu’n lungset a aleirôn hei, ajârchu Israelhei kha inrengna leh suk manrimna thōia inkōia ka-om heia kae.

¹⁹ Tâk-kha hlamkakei kha athisō pha chu, mihei khan hma an-omchen marō tlit a inle nôk hei khana khang marō hei kanek a ṭhachet mak heia kae. Pathen hlop hei anrazena, ankamuk sik, anṭhatmakna masō sik hnōm mak hei.

²⁰ Khava jâra Rōngpu’n Israelhei chunga ahnuk kana hêr khana ati, “Ke’n anpu sōnhei hneng ka’ntepna kha hiva jât-hei hin anvōkkhōi jo. Ajârchu kei ajuimak jo hei,

²¹ Joshua thisōa ram shunga alaka-om ṭhak jât-hei kha hnongsōt mak hei ning.

²² Hiva Israel he’n kahlam antajui sik mo antajui mak sik mo, enna sik a anmani hi kahmang sik hei.”

²³ Khava jâra Rōngpu’n jât-hei kha ram shunga om sik ahnōm pek hei; Joshua kha re mantordek mak, khana Joshua thisōa anmani kha hnongsōtdek mak heia kae.