TITUS 3 - LEKHARABU INTHENG (BSI)

Christian Omchen

¹ Vaikarônhei leh ratha kaneihei ṭong juina sik, ahlam rakip a akaṭha tlona intlukna sik namihei kha manthei hei roh.

² Tûte’n ṭhatmakna anhrimakna sik, tâk nun-innem, mi leh inthlop thei changa khana mi rakip hneng malung kadai malârna sik manthei hei roh.

³ Ajârchu eini vōi khat akamo, ṭong kajuimak leh akadik mak leikachang me. Ṭhatmakna tinga hōina leh madu rangei sōk leikachang me. Nihringkhō hi ṭhatmak leh mi chunga thangsetna nileihmang, mihe’n anlei enkada me, eini’n nilei-enkada hei.

⁴ Achang ravâng ani kahuk inhringpa Pathen lum lona leh lungsetna ahon’lâr jo pha

⁵ ama’n ahuksōt jo me. Khavakha eini’n ṭōn kaṭha heikhat tlo jâra changmak, tâk ama khet maritna vânga ahuk me, khachu sôp manthengna vânga intet therna leh hringkhōther anikapek Rathla Intheng jâra kae.

⁶ Eini kahuksōt Jesu Christa inphut Pathen in Rathla Intheng katamtak abunkhum me,

⁷ ama maritna vânga Pathen leh inchun a akadik nichangna sik khana ni’nhōrna kumleikōa hringna kha nichenna sik a kae.

⁸ Hivahi akadik a’nhri kae. Pathen kataksen he’n mi rakip sik a akaṭha leh hnemna ka-om ṭōn kaṭha tlona sik a anpha anpek sōtna sik hiva chunga inhnaktak a nanta hri sik hi kamadu.

⁹ Tâk-kha inkhe beitam, pahrui puhrui kaseitak a in-gôrna, innâk-inse, Dân chunga innâkna hei kha donmak hei roh. Khahei kha hnemna kasehei kae.

¹⁰ Mi kakhōiṭhen hei kha vōi 2 katlung rōk chu gîkna pek hei roh, khava sōa chu donmak jo hei roh.

¹¹ Khang khava mihei kha ṭhamak hei ti namanhret, khana ansetna khan dikmak hei ti amalâr hei.

Achaina Mansenahei

¹² Ke’n nanhnenga Artemas a-emak leh Tychicus kahei tir pha Nicopolis a kahnenga nahongna sik tak heitlo roh, ajârchu phebi lai khava hmun a khan om sik kamandona kae.

¹³ Dân thempu Zenas leh Apollos khōhme sesōtna sik kha torchena le’nthōpui hei roh, antarangei rakip heite antlâksam makna sik lei enpek hei roh.

¹⁴ Nimihei khan antarangeitak kha anchantheina sik a ṭōn kaṭha tlona anpha hmangje a’nchû sik hei; hnemna kasea anhringkhō antahmang mak sik kae.

¹⁵ Hina ka-ompui hei seng in chibei anheipek chei. Taksena niṭhōn kachang hei kha kanchibei leipek hei ruh. Pathen maritna khan nankhenga ompui chei rasoh.