TIMOTHY INKHATNA 6 - LEKHARABU INTHENG (BSI)

¹ Pathen rahming leh niṭong hrile hi tûte’n anhrimaset makna sik, sōk rakip in ankapuhei kha heirakip a kaja sik rahōi kasōk tia mandon hei rasoh.

² Christian akapuhei hnenga sōk-hei khan, anmani kha ansōpui kachang hei ti jâra, heisakloa antatlo mak sik hei kae. Khava kanek a, anmani’n kaṭhachet a antarazen jôk sik hei kae, ajârchu anmani ṭōntlo hnemna kachen hei kha anmani talungset taksenna kaneihei kha kae. Hivahei hi nang in namanthei sik leh nahrile nger sik hei kae.

Mi’nthei Hlem leh Haona Kadiktak

³ Nibekṭong mantheina leh ni-Rōngpu Jesu Christa ṭong kadik hi leh a’n-angmak chôndân hlop inthei tu achang inum

⁴ ama kha inlensakna pui akatluk set leh heite inhret mak kae. Ama khan ajâr kasejena mi inkhena leh innâk-insena atlo, khava khan thangsetna, inkhena, inzakna, ṭhatmak a inrinmona,

⁵ khana a’ndon theimak hei leh dikna kaneimak hei leh bânglo jena inkhena amannei ṭhak a kae. Anmani’n bekṭong hi haona sik hlam inkhat a anmandona kae.

⁶ Kadik, bekṭong hin mi akahaotak manchang mak, mi inkhat in aneihrep kha amalung atlaipui sik inchu.

⁷ Raleichunga hin eini’n heimo nijōngrôn aka-om? Heite om mak! Khan chu eini’n raleichunga inphut heimo ni’nrôn sōt sik aka-om? Heite om mak!

⁸ Kha achang inchu, eini’n sâk leh in pōnsi derkei nikatluk ninei inchu, kha nisik a akatluk jo kae.

⁹ Tâk-kha nei leh hao indu mihei kha mathlemna katla hei khana mona katamtak leh inhmangna madu rangeina châng shunga in-ôk hei, khava khan insuksetna leh inhmangna ting akei mathlûk hei.

¹⁰ Sêr madu mankhôk hi ṭhatmak rakip inphutna kung kae. Khava jâra mi ṭhahrep in sêr anmadu manhlei jâra antaksenna inphut hlam invaina anneia inrimna katamtak leh malung kōina anratōa kae.

Ama khet Amansenahei

¹¹ Achang ravâng Pathen mi kachang nang in, hivahei rakip hi dahlon hei roh. Dikna, bek-ôina, taksenna, lungsetna, dehratna leh nunhōina changna sik tak intlo roh.

¹² Nator chenna taksenna resik a khan tlân roh, nabinga sik kumsôt hringna kha chen roh, ajârchu sâkhi katamtak hei hmaikunga nataksenna kha kaṭha nahrisōt pha, Pathen in khava hringkhō kachen sik a abek che kae.

¹³ Heirakip hnenga hringkhō kapek Pathen hmaikunga, Pontius Pilate hmaikunga ataksenna kahnettak a kahrisōt Jesu Christa hmaikunga, ke’n nang ṭong hi kapek che kae;

¹⁴ ni-Rōngpu Jesu Christa ajōng inlâr sik Kani mak hma seng ṭongpek kha juina sik leh injentak a tlona sik a manse che kae.

¹⁵ Rōngpuhei Rōngpu, Renghei Reng, mahâm kaṭha leh vaikarôn inkhat rōk, ama jōng inlâr sik kha Pathen in aphahrep a ajōng tlosōt sik a kae.

¹⁶ Ama rōk akathi theimak kha kae. Tûte tahnai manhlut tor makna vâr shunga ka-om. Ama tûte’n lahmu mak hei; tûte’n hmutorhêr mak hei. Kajana leh ahei tik a vairônna kha atâ changṭhak rasoh! Amen.

¹⁷ Hiva hringkhō neinâk a akahaohei kha an-inlensak makna sik, tâk an-inhōrna kha akahnetmak nei leh hao chunga changloa, eini hōina sik a heirakip pek hnōmtak a anikapek Pathen chung jôk a anneina sik ṭong kha pek hei roh.

¹⁸ Milak-hei hneng malung kalentak a nei leh hao insempui theina sik, ṭōn kaṭha tloa haona sik, akaṭha kha tlona sik a ṭongpek-hei roh.

¹⁹ Khang’khan anmani’n hnunga innhmun kahnet akachang sik ankarōi anbinga anmanbuk thei sik jo. Khan chu anmani’n hringkhō kadiktak kha anta’nhlōtor sik kae.

²⁰ Eh Timothy, nang ta-ensui sik a nganse che kha kaṭha inda hei roh. Mi ṭhahrep in dik lo jen a “Themna” antati, Pathen hōnna leh akamo makhena kha, donmak hei roh.

²¹ Ajârchu mi ṭhahrep in khavakha kannei antia, khava jâra antaksenna hlam kha anmanhmang joa kae. Pathen maritna’n nankhenga ompui chei rasoh.