TIMOTHY INKHATNA 5 - LEKHARABU INTHENG (BSI)

Takkasenhei Hnenga Tlohlam Kasōk

¹ Kater kha raseimak roh, tâk napa kapōa ngekna nei roh. Pase naipanghei kha nasōpui kapōa,

² nupui katerhei kha nanu kapōa, nuhmei naipanghei kha naser kapōa, malung inthengtak a thlop hei roh.

³ Inchêntak a binga ka-om renghmeihei chunga kajana malâr roh.

⁴ Tâk-kha tu leh sa kanei renghmeinu khachu, atu asahei khan hma inkeia an-innshunga bekṭong dân tlosōt theina sik a’nchû hei sik kae, khang’khan annu anpa, anpi anpuhei leitlo pekna hei kha antamale sik hei kae, ajârchu khavakha Pathen malung tlaina kae.

⁵ Hmeithai abing rōk a aka-om jo, aka-ensui sik aka-om mak jo khan chu, Pathen hneng sûn leh jân a’nthōpui sik ader a a’nhōrna kha Pathen chunga ada sik kae.

⁶ Tâk-kha taksa hōina sik kajong renghmeinu khachu, ahring ravâng akathisa jo kae.

⁷ Anmani heia inphut tûte’n ṭhena anhmusōt makna sik a hiva ṭong hi pek hei roh.

⁸ Tâk-kha mi inkhat in innshung mihei, akarôn pena ama innkō mihei, a-ensui mak inchu, ama kha taksenna kahnōm mak leh akataksenmak hei kanek a akaṭhamak chet jôk kae.

⁹ Kum 60 inhleimak renghmeinu kha hmeithaia teisa mak roh. Khava chunga, hmeithai kâra teisa sik khachu, vōi khat rōk lu leikahông akae sik kae,

¹⁰ omchen kaṭha achen sik kae: asahei kaṭha kavei, a-inna khōhme inthlung, Christian sōpuihei malung innemtak a sepa katlo, malung inrim hei inthōpui khana ṭōn kaṭha rakip tlona sik malung kapek sōt mi akachang sik kae.

¹¹ Tâk-kha renghmeinu alakadông hei kha renghmeinu kâra teisa mak hei roh; ajârchu anmani’n anmaduna dungjuia puise anneihnōm pha, Christa inphut kasesōt ri heia kae,

¹² khava jâra ama hneng hma inkeia anṭong intepna kha akasuk khōi kachang ri jo hei.

¹³ Anmani kha inn inkhat a inphut inn inkhat a kasele heia pha ansuk manhmang; antahri mak sik ṭong anhria, mi hrimaset inthem chûkna insaler heia, akasechet kachang heia kae.

¹⁴ Khava jâra renghmeinu alakadông hei khachu puise neinôk hei sona, sa nei hei rasoh, an-inn hlō nôk hei rasoh, khang’khan ani kadōihei mi hrimasetna hmun pek mak sik kae.

¹⁵ Ajârchu renghmeinu ṭhahrep he’nchu Seitan kahnung antajuisa jo kae.

¹⁶ Hmeithai binga aka-om hei kha tinta theina sik heia, akataksen nupui inkhat in a-innshunga renghmeihei an-om inchu, amanu khan a-ensui nger sik hei kae khana bekrup chunga phurhrik kha adamak sik kae.

¹⁷ Hlamkakei inkhat a akaṭha ṭōnkatlo upahei kha kajana thō hnia pek sik rahōi kasōk, akarôn pena ṭong hrilena leh mantheina ṭōntlo kahrat hei kha.

¹⁸ Ajârchu ṭong intheng in ahri, “Seche kha sâng kachōn inchi sik a nahmanglai khan ahmur khitmak roh” khan chu “Ṭōn katlo mihei kha anhlō a’npek sik kae.”

¹⁹ Sâkhi 2, 3 inveiloa upa inkhat chunga masetna hong kahri hei kha anṭong lopek mak hei roh.

²⁰ Milak he’n anṭit theina sik a setna katlo mihei seng kha, mipui kâra rasei hei roh.

²¹ Heirakip natlona chunga tûte inkhat hneng ôtum neiloa hiva ṭong insena hi najuina sik marvân ngeva intheng hei leh Jesu Christa khana Pathen hmaikunga ke’n ka-ôrtak a nang kahei nganse jo che kae.

²² Rōngpu inzen sik a tu achang inum inrangtak a achunga nakut kalângloi mak roh. Milak-hei setna chenpui mak hei roh; nang nabinga intheng senga om roh.

²³ Nanat-ṭhak ri jâra, tui rōk inmak roh, nasâk innoi loina sik, ju ajing tete inri roh.

²⁴ Mi ṭhahrep set-tlo chu, inlârseng bât a, ṭong tanna hma ankeibât a kae; tâk mi ṭhahrep setna chu, hnungtō leh inhmusōt a kae.

²⁵ Kha leh in-anghrep a ṭōntlo kaṭhahei kha inhmubât a kae, khana a’nlârloimak inum inthup theimak a kae.