TIMOTHY INKHATNA 4 - LEKHARABU INTHENG (BSI)

Oja Kadikmak hei

¹ Pha hnung intonga chu mi ṭhahrep in antaksenna kha andahlon sik tia Rathla khan inthengtak a ahria kae; anmani’n rathla malei kasei anjui sik khan chu ṭaihei mansena anjui sik a kae.

² Thir kalum tarohlon kapō, mandon ṭhen theina kaneimak hei, malei kasei mikahōn inthla heia inphut khang khava intheina kha ahong kasōk kae.

³ Khava mihei khan luhông innei hi dikmak khana thlai ṭhahrep um sâk sik dikmak tia anmanthei hei. Tâk-kha akadik hong inhret hei leh akataksen he’n, manpâkna derna anneisōa antasâk sik a Pathen in khava sâk thei hei kha asyem hei kae.

⁴ Pathen tasyem heirakip akaṭha rōk kae; heite hlonsōt sik om mak; tâk heirakip hi manpâkna derna neisōa rahlâng sik kae,

⁵ ajârchu Pathen ṭong leh derna khan khavakha Pathen tarahlâng thei amanchanga kae.

Jesu Christa Sōk Kaṭha

⁶ Nang in najui jo intheina kadik kha leh taksenna ṭong vâng rathlating nabinga a’nvei che kapōa, nang in hiva insena hi nasōpuihei hneng napek he’nchu, nang Christa Jesu sōk kaṭha inkhat akachang sik che kae.

⁷ Hrisōt a rahōi kasōkmak bekṭong kaneimak thuhming heia inphut inkaisōt roh. Pathen tamadu hringkhō hmangtheina sik inthemchûk roh.

⁸ Taksa resik inthemchûk hi ṭhahrep ahnemna ka-om, tâk rathlatinga resik inthemchûk hinchu ahlam rakip a kahnem jôk, ajârchu tuna leh hnunga pui katluk hringkhō pek sik a intepna anei.

⁹ Hivahi akhenga rahlâng sik leh hlamrin sik a akadiktak ṭong kha kae.

¹⁰ Eini rahnak a inṭang me khana ṭōn rahnak a nitlo, ajârchu mi rakip kahuk inhring achung chôna akataksenhei kahuk inhring, akahring ṭhak Pathen chunga inhōrna kha nineia kae,

¹¹ Hiva mansena leh mantheina hei hi pek hei roh.

¹² Khangdông chang jâra mi’n hmumasi mak hei che rasoh, tâk ṭonghria, omchen a, lungsetna, taksena, khana inthenga na-omna kha akataksenhei sik a tekhing inkhat chang roh.

¹³ Kei kahongmak kârseng Ṭong intheng kha mipuihei teipekna leh mantheina sik a napha kha pek inna insaler roh.

¹⁴ Upahe’n nachunga ankut ankalânglai, sânkathemhei tahri pek che leh rathla kutchoi naleichen jo nashunga aka-om kha heitea sakmak tlomak roh.

¹⁵ Naṭōn khangtouna kha mi rakip in anhmu theina sik hivahei hi ṭōn vânga tlosōt hei roh khana natak khet malung inpek sōt roh.

¹⁶ Nabinga in-en kaṭha roh khana nami mantheina kha ensui kaṭha roh. Hivahi intlo ṭhak roh, ajârchu nang in hinga natlo ṭhak inchu nang leh inṭhōia naṭong katheihei nahuk sik hei kae.