TIMOTHY INKHATNA 2 - LEKHARABU INTHENG (BSI)

Bekrup Kamukna

¹ Ahma inkeipena ngekna, derna, ngeitōna, inpâk malârna, mi rakip sik a Pathen hneng tōkna sik kangek chei;

² eini kahōia malung kamōnga Pathen ṭit leh kajana neia omchen kadik a ni-omtheina sik, renghei sik a leh ratha kanei rakip sik a derna neiṭhak ruh.

³ Hivahi akaṭha kae khana hivahin nikahuk inhring Pathen kha amantlai,

⁴ ama’n mi rakip hukmanhring anchang sik leh akadik anta hongmanhret sik amadu.

⁵ Ajârchu Pathen inkhat rōk ka-om, khana Pathen leh mihring kaṭhōi inchun inkhat ka-om, Jesu Christa mipa kha,

⁶ mi rakip intlensōt sik a abinga a’npek sōt kha kae. Pathen in mi rakip hukmanhring sik hi amadu ti hi aphahrep a manchênna kha kae,

⁷ khava jâra Jât-hlop hei hneng akadik leh taksenna ṭong kahri inthang sik a, kei sonle inkhat leh oja inkhat a atir eng kae. Kei kamalei seimak; kei akadik kahri kae!

⁸ Bekrup kamukna rakip a, Pathena a’npek sōt pase he’n antader sik kha kamadu khana inkhena leh hnuk natna omloa ankut ankalânga andertheia kae.

⁹ Khava kapōa nuhmei he’n innetak leh enkahōitak a pōnsi derkei injenhrep a an-inret sik kamadu; hlung mankatam, sana dangka leh manretna vâng leh mankatam ret vânga changloa,

¹⁰ tâk akaṭha ṭōn tlona vânga, bekṭong kanei nuhmei inkhat tatlo sik rahōi kha atlo sik a madu kae.

¹¹ Nuhmei in sip katia leh insinsak tak a a’nthemchûk sik hei kae.

¹² Anmani’n pase chunga ratha antanei sik leh antamanse sik ke’n phemak eng; sip antati sik kae.

¹³ Ajârchu Adam kha hma inkeia asyem, khava sōa Eve kae.

¹⁴ Khan chu hōnmathlâk kha Adam changmak, hōnmathlâk leh Pathen dân kasuk khōi kha nuhmei kha kae.

¹⁵ Tâk-kha nuhmei inkhat hi nunkahōi leh inṭhōia, taksenna, lungsetna leh inthengna shunga dehratna anei inchu asanei jâra hukmanhring achen sik kae.