TIMOTHY INKHATNA 1 - LEKHARABU INTHENG (BSI)

¹ Nikahuksōt Pathen leh ni’nhōrna Jesu Christa ṭongpek dungjuia Jesu Christa sonle Paul a inphut–

² Taksenna shunga kasapa kadik Timothy hneng kaheimazet kae: Pa Pathen leh ni-Rōngpu Jesu Christa’n lungsetna, maritna, khana lung mōngna pek che rasoh.

Intheina Kadikmak Chunga Gîkna

³ Macedonia kajōna kaseting kaleimathok che kapōa khan, Ephesus a nang na-om sik kamadu. Sova hmun a mi ṭhahrep in akadik mak chôndân antamanthei heiso, anbângna sik ṭong napek nger sik hei kae.

⁴ Inkhe-beitamna rōk insō ṭhut leh pusōnhei rahming kahri heiso anbângna sik manthei hei roh; anmani’n taksenna vâng antamanhret Pathen ṭōn mantlukna kha razen mak hei.

⁵ Hiva ṭongpekna jârpen khachu, taksenna kadiktak leh mandon ṭhen theina, khana malung inthengtak a inphut lungsetna kha ahong sōk theina sik a kae.

⁶ Mi ṭhahrep in hinna inphut inhe jo hei khana akamo inkhena shunga hlam invaia ka-om jo hei.

⁷ Anmani Pathen Dân oja kha kachang hnōm hei, tâk anmani’n anbinga anṭonghri a-emak leh khang hrep a hlamrintak a antahri hei kalan kha’m manhret mak hei.

⁸ Dân kha ahmangna sik hrep a nihmang inchu akaṭha kae ti eini’n nimanhret.

⁹ Kadik, dân hi mikaṭhahei sik a a’nsyem changmak, tâk dân kasuk khōi hei leh mikasehei, bekṭong kaneimak hei leh setna kasip hei, bekdân kajuimak hei leh rathla hlam kajuimak hei, nu leh pa kathat-hei, mihring kathat-hei,

¹⁰ mikajônghei, nuhmei-puise angaia ka-om mak hei, mihring inruhei, malei kasei hei, maleisei sâkhi katlohei, ṭong kadik intheina inphut akalet a katlo rakip hei sik a dân kha a’nsyem kae.

¹¹ Khava mantheina khachu, akalûr leh mahâm kaṭha Pathena inphut Ṭong kaṭha akaphôngle sik a aleinganse eng ṭong intheng shunga inhmusōt a kae.

Pathen Maritna jâra Manpâkna

¹² Kaṭōn tlona chunga ratha hratna anikapek, ni-Rōngpu Jesu Christa kha kamanpâk. Ama injen sik a rahōi kasōk inkhat a alo eng jâra kamanpâk,

¹³ hmalai ama masetna ṭong kaleihria kaleisuk manrima khana inzak kaleipek jo tâk inum. Kha’num Pathen in kei amarit eng ajârchu ke’n ama leitaksen mak eng, khan chu ke’n heimo kaleitlo manhret mak eng.

¹⁴ Khana ni-Rōngpu khan akatluk set alungsetna kha kachunga ajōng bun khum jo eng khana Rōngpu Jesu Christa leh ni’nchunna shunga nita kachang jo lungsetna leh taksenna kha kei apek jo eng.

¹⁵ Pui katluk a rahlâng sik leh taksen sik a akadiktak ṭong inhri kha hi kae: Mikaset-hei kahuk inhring sik Jesu Christa kha vânhnōia kajōng. Ankâra akasetpen kha kei eng kae,

¹⁶ tâk hnunga ama kataksen leh kumsôt hringna kachen sik rakip hnenga man enna inkhat akachang sik a, kei mikasepen chunga hin Jesu Christa’n pui katluk a amadosôtna kha amalâr theina sik a Pathen in kei alungset enga kae.

¹⁷ Kumsôt Rengpa, inhmangtik kaneimak leh hmit a hmutheilo, Pathen inkhat rōk, hnenga are-rea lûrna leh kajana chenṭhak rasoh! Amen.

¹⁸ Kasa, Timothy, hiva ṭongpek hi nang kangense che kae, hivahi hmalaia sânkathem in nang chunga aleihrisōt dungjuia kae. Nang kaṭhatak a re natukna sik khava ṭonghei kha nare hmangchâk manchang hei roh,

¹⁹ khana nataksenna leh a’nthengseng mandon ṭhen theina kha inda roh. Mi ṭhahrep in anmandon ṭhen theina kha juimak heia antaksenna kha manhmangna annei.

²⁰ Anmani kâra Seitan ratha neina kut chunga kapek sōt heia karâkna kaneihei kha Hymenaeus leh Alexander kha kae; hiva tlo hin Pathen hrimasetna kha amanhaithei sik hei.