THUHMINGHEI INKHATNA 24 - LEKHARABU INTHENG (BSI)

Thempuhei hnenga Ṭōn Nganse

¹ Aaron sōn leh pârhei inveina rup-hei kha hihei hi kae: Nadab, Abihu, Eleazar, khana Ithamar.

² Nadab leh Abihu chu anpa thimak hma kathi jo hei, sōn leh pâr dahlon mak hei, khava jâra annaihei Eleazar leh Ithamar he’n thempu hongkachang hei.

³ Reng David in Aaron sōn leh pârhei kha anṭōn mannganna dungjuia Eleazar sōn Zadok leh Ithamar sōn Ahimelech he’n inthōpuina annei hei.

⁴ Eleazar sōn leh pârhei kha rup16 a anṭhen hei, khana Ithamar sōn leh pârhei kha rup 8 a anṭhen hei; hinga tlona hi Eleazar sōn leh pârhei kâra pase mija antam jâra kae.

⁵ Eleazar leh Ithamar sōn leh pârhei kâra Bek-inn ṭōnkarôn leh rathla hlamkakei an-om et jâra, tlâ sânna thōia ṭōn mannganna annei heia kae.

⁶ Eleazar leh Ithamar sōn leh pârhei khan inkhat bânna inkhat in tla sânna annei sik. Khavakha Nethanel sapa Shemaiah, Levihei kâra a’nzet khumpa khan asun manhlut sik hei. Rengpa, ama ṭōnkarônhei, Zadok thempu, Abiathar sapa Ahimelech, khana thempu leh Levi innshung hlamkakeihei, ankhenga sâkhi kachang sik hei.

^7-18 Hivahi innshung 24 rup-hei ṭōn mannganna man-gôrna kha kae: 1) Jehoiarib; 2) Jedaiah; 3) Harim; 4) Seorim; 5) Malchijah; 6) Mijâm in; 7) Hakkoz; 8) Abijah; 9) Jeshua; 10) Shecaniah; 11) Eliashib; 12) Jakim; 13) Huppa; 14) Jeshebeab; 15) Bilgah; 16) Immer; 17) Hezir; 18) Happizzez; 19) Pethahiah; 20) Jehezkel; 21) Jachin; 22) Gamul; 23) Delaiah; 24) Maaziah.

¹⁹ Hiva mihei hi anṭōn mannganna dungjuia Bek-inna sea Israel Pathen Rōngpu ṭongpek juina anpusōn Aaron taphunsōt ṭōnhlam hei kha anva tlosōt sik.

Levihei Man-gôrna

²⁰ Hiva mihei hi Levi a ahong kakōn innshung hlamkakei ralak-hei kha kae: Jehdeia, Shebuel a inphut Amram sōn;

²¹ Isshiah, Rehabiah sōn;

²² Jahath, Shelomith a inphut Izhar sōn;

²³ Jeriah, Amariah, Jehaziel, khana Jekameam, Hebron sapahei, ankum dungjuia;

²⁴ Shamir, Micah a inphut Uzziel sōn;

²⁵ Zechariah, Micah naipa Isshiah a inphut Uzziel sōn;

²⁶ Mahli, Mushi, khana Jaaziah, Merari sōn leh pârhei.

²⁷ Jaaziah hin sapa 3 anei: Shoham, Zaccur, khana Ibri.

^28-29 Mahli in sapa 2 anei, Eleazar leh Kish. Eleazar in sapa neimak, Kish sapa inkhat anei, Jerahmeel.

³⁰ Mushi in sapa 3 anei: Mahli, Eder, khana Jeremoth. Hiseng hi Levi innshunghei kae.

³¹ Aaron a inphut ajōng kakōn an-u leh nai, thempuhei tatlo kapōa, innshung hlamkakei et leh annaipa hei kâra inkhat in anmani ṭōn mannganna sik a tlâ sânna annei sik. Reng David, Zadok, Ahimelech khana thempu leh Levi innshung hlamkakeihei kha sâkhi kachang sik hei.