THUHMINGHEI INKHATNA 17 - LEKHARABU INTHENG (BSI)

Nathan in David hneng Ṭong amanrôn

¹ Rn David kha tûnchu areng-innpuia ka-om jo. Ni khat chu sânkathem Nathan hnenga mi atir heia hinga ati, “Kei hi cedar thing vânga a’nsak inna ka-om eng, tâk Rōngpu Intepna Bôm chu pōn-inna ka-om!”

² Nathan in amasôn, “Namalunga namandon kha tlo roh ajârchu Pathen in nang a-ompui che.”

³ Khana khava ning jân a Pathen in Nathan hneng hinga ati,

⁴ “Se roh, kasōkpa David hnenga ke’n hinga kahri tia vahri pek roh, ‘Kei omna sik bek-inn kasak sik kha nang changmak che.

⁵ Egypt a inphut ke’n Israel mi kahukna heia inphut tûn katlung kei hi bek-inna la-omtet mak eng; kei ahei tik a pōn-inna ka-om eng khana hmun khat a inphut inkhat a inthon vângvei eng.

⁶ Israel mipuihei leh kanlônlena rakip a ke’n hlamkakeihei hnenga, heisa mo cedar thing vânga kabek-inn antasak mak tia dertet mak hei eng.’

⁷ “Khava jâra kasōk David hnenga Chunghnung Rōngpu ke’n kahri kae, hripek roh, ‘Ke’n nang kemōng khemna ramhânga inphut kavaṭhōi che kae khana kami Israelhei vai karôna kasyem che kae.

⁸ Nasena rakip a kaleiompui che, khana nang in re hmating nasena khan na’nrepuihei kha ke’n kator pek hei che. Ke’n nang hi vânhnōia hlamkakei kalenpen a’nthangtak inkhat a kasyem sik che.

^9-10 Kami Israelhei sik a hmun inkhat kakadei pek hei khana khan kaman om hei, khana khan anmani suk manrimna omlo jen a ka-om sik hei. Hiva ram hi anheihlut a inphut re leh sha indu he’n anleibuhlu hei, tâk-kha khavakha avea sōk mak jo ning. Nankadōihei rakip torna sik khana sōn leh pâr pekna sik a kei intep eng.

¹¹ Nang nathi pha khana napu sōn leh pârhei leh anhre jo chei pha, nasapahei kâra inkhat reng kamanchang sik khana arengram kha amanngar sik.

¹² Kei bek-inn kasak sik kha ama kae, khana ke’n ama innshung vairônna ahei tik a kamanjom pek sik.

¹³ Kei ama pa kachang sik eng, khana ama kei sapa kachang sik. Nang reng changna sik a ke’n kalosōtpa Saul hnenga kaleitlo kapōa, ama hneng chu ka’nthōpuina kha bângmak ning.

¹⁴ Ama kha kamihei leh karengram katinta sik a kada sik. Ama innshung vairônna kha bângtik neimak ning.’”

¹⁵ Pathen in Nathan hnenga amalârsōt rakip kha David hneng ahri pek jo.

David in Manpâkna Derna Anei

¹⁶ Khava sōa David kha Rōngpu omna Pōn-inn shunga kahlut a, in-ong jo, khana derna anei jo, “Nang in naleitlo pek eng kha kei leh ka-innshung chu rahōi sōk mak ung, Rōngpu Pathen.

¹⁷ Kha’num tûnchu khava kakhea natlosōt jo; akahong sik pha a kasōn leh pârhei chunga intepna nanei jo, khana Rōngpu Pathen nang in mikalen inkhat a narazen jo eng.

¹⁸ Hei mo kakhea nahnenga kahri sik! Nang in kaṭha namanhret eng, kha’num nasōk kei hi mihei kajana namanchen eng.

¹⁹ Kei sik a hiva tlosōt sik leh hnunghlam a kei lenna malârpekna hei hi nang lungdo leh mantlukna kha kae.

²⁰ Rōngpu nang kapō inkhatbek om mak; nang rōk Pathen che kae ti hi keini’n ahei tik a kanmanhret.

²¹ Israel kapō, nami manchangna sik a ansōk changa inphut nahuksōt nôk jât hi vânhnōia om mak. Anmani sik a ṭōn kalen leh ṭōn-inlak natlona khan narahming vânhnōia inthangsō. Egypt a inphut namihei nahuksōt hei khana nami he’n re hma anheisong pha, nang in jât ralak-hei kha nahnong sōt pek hei.

²² Israel kha ahei tik a nami naman chang hei, khana Rōngpu nang in anmani Pathen inchang che.

²³ “Khana tûnchu Rōngpu, pha rakip a kei leh kasōnhei chungchânga nalei intepna kha hui mathlung jo roh, khana natlo sik a nahri kha tlo jo roh.

²⁴ Narahming inthang hêr sik, khana mihring he’n ahei tik a hinga anhri sik, ‘Chunghnung Rōngpu kha Israelhei Pathen kae.’ Khana nang in kei innshung vairônna kha nada ṭhak sik.

²⁵ Ka-Pathen ke’n hiva derna hei hi nahnenga akader sik a inngam eng, ajârchu heirakip hi nasōk kei hneng namalârsōt pek jo eng khana kasōn kapâr hei kha reng naman chang sik hei tia nahri pek jo eng.

²⁶ Rōngpu nang Pathen che kae, khana nang in intepna inlak hi kahnenga nasyema kae.

²⁷ Nang thlopna kha kasōn he’n anchen ṭhakna sik anchunga mahâmṭhat napek sik heia kangek che. Rōngpu nang in anmani vângṭhat napek jo hei, khana nang vângṭhat kha anchunga ahei tik a ka-om sik jo.”