THUHMINGHEI INKHATNA 14 - LEKHARABU INTHENG (BSI)

Jerusalema David Ṭōntlo

¹ Tyre Reng Hiram in David hneng invei tlona mi ahei tir hei; ama’n cedar thingtlōn leh hlung kakheng hei khana thingṭōn kathemhei reng inn kasak sik a ahei pek hei.

² Khava jâra Rōngpu’n ama kha Israelhei reng sik a amatung jo khana amipuihei sik a arengram amankhang pek jo ti hi David in ahong manhret joa kae.

³ Jerusalem shunga David in nuhmei aneisa heia sapa sanu aneisa heia kae.

⁴ Jerusalema athōia sapase hei seng hi anei hei: Shammua, Shobab, Nathan, Solomon,

⁵ Ibhar, Elishua, Elpelet,

⁶ Nogah, Nepheg, Japhia,

⁷ Elishama, Beeliada, khana Eliphelet.

Philisti chunga Torna

⁸ David in tûnchu Israel ram pumpuia reng kachang jo ti hi Philisti he’n anthei pha, anremihei khan ama kasur sik a kasesōt hei. Khava jâra David kha anmani intōpui sik a kase jo.

⁹ Philistihei khan Rephaim Phaichama heikatlung heia suk mansetna anphut jo.

¹⁰ David in Pathen hneng ader, “Philistihei kabuhlu sik hei mo? Retorna namannei sik eng mo?” Rōngpu’n amasôn, “Ôk, buhlu hei roh! Retorna kamannei sik chei!”

¹¹ Khava jâra David in Baal Perazima abuhlu heia aleitor hei. Ama’n ati, “Inrepuihei remihei kha ankavōkkhōi sik a Pathen in kei tuilen kapōa ahmang eng.” Khava jâra khava hmun kha Baal Perazim anti jo.

¹² Philistihei antlânsōa, anlim anleidahlon hei, khana David in khahei kha rona sik a ṭong apek hei.

¹³ Inrangtak a Philistihei kha phaichama hong inle nôk heia suk mansetna anphut jo.

¹⁴ Ave nôk a David in Pathen hneng ader khana ahei masôn, “Hina inphut buhlu mak jo hei roh, ankimvea se ina, hmunhlop tinga balsam thingkung hnenga inphut buhluna sik a intluk roh,

¹⁵ Thingkung chungting mipui injôk rasa nathei pha, buhlu hei roh, ajârchu Philisti remihei torna sik a ke’n hmatak a injôk sik eng.”

¹⁶ David in Pathen ṭongpekna kha aleitlo, khana ama’n Philistihei kha Gibeona inphut Gezer katlunga ahnong male jo hei.

¹⁷ David rahming kha hmuntina inthang jo, khana Rōngpu’n ama kha jât rakip amanṭit jo hei.