THUHMINGHEI INKHATNA 10 - LEKHARABU INTHENG (BSI)

Reng Solomon Thina

¹ Philisti he’n Israelhei leh Gilbo Tlânga re le’ndōi hei. Israel mi katamtak anleithat hei, a’nhleiseng hei kha Reng Saul leh asahei inveina, leikatlân jo hei.

² Tâk-kha Philistihei khan ansur heia Saul sapa 3 anthat jo hei, Jonathan, Abinadab, khana Malchishua.

³ Saul kimvea re intukna kha inhnak hêr, khana ama kha indōipuihei the khan anmasōk joa inhnaktak a intôn jo.

⁴ Ama re hmangchâk kachoi lele remi hnenga ati, “Hiva pathen ka-oimak Philisti he’n kei chunga anhnōise makna sik eng, nachem radok inna athat jo roh.” Tâk-kha retherpa kha kaṭihêr joa khanga tlo ngammak jo. Achang jâra Saul in abinga achemjâm kha aloa insunhlon jo.

⁵ Retherpa khan Saul thina kha ahmua, ama’m abinga achem vâng insunhlona kathi jo.

⁶ Khang’khan Saul leh asapa 3 hei kha kathisap jo hei, asa tûte inkhat in vai rônmak jo hei.

⁷ Jezreel Phaichama aka-om Israel sahe’n remihei tlânsōtna leh Saul leh asapahei thina kha anthei pha ankhōpui andahlona katlânsō jo hei. Khava sōa Philistihei kha kahong heia khōpuihei kha anvahlō jo.

⁸ Re inchaisō jîng khat a kathi kalōng ka-en sik Philistihei kha kasōksōt hei, Saul leh asapahei taksa kalōng kha Gilboa Tlânga anlei inthlong hei kha anvahmu hei.

⁹ Saul rîng kha antuktan jo, arevon kha anlosōt jo khana hiva ṭong kahōi hi Philisti ram pumpuia anlim hei leh anmipuihei hneng akahri sik mi antir jo.

¹⁰ Ama re hmangchâk-hei kha anmani bek-inn inkhat a anda khana alu khan an-pathen Dagon bek-inn shunga anmakheia kae.

¹¹ Philisti he’n Saul hnenga antatlo omchen kha Gilead ram a Jabesh a ka-om mihe’n anthei pha,

¹² Inngamna kaneitak mihei kase heia Saul leh asapahei kalōng anvajonga Jabesh a anheichoi hei. Anmani kha sasōkung thōia anvûm heia ni 7 buhngōina anneia kae.

¹³ Saul kha kathi jo, ajârchu ama kha Pathen hneng taksenthei changmak a kae. Ama’n Pathen ṭongpek juimak; ama’n Pathen mansena kanek a,

¹⁴ kathi rathlahei hneng ṭongderna aneia kae. Khava jâra Pathen in athat jo, khana rengram ratha neina kha Jesse sapa David hneng apek jo.