THESSALONIANHEI INKHATNA 5 - LEKHARABU INTHENG (BSI)

Rōngpu Jōngna sik a Inrin ruh

¹ Sōpuihei, hiva omchenhei seng jōng tlungna sik apha leh achâng jâra, heimazet sik chei hi rangei mak.

² Ajârchu inru jân a ahong hlut kapōa Rōngpu kani kha’m ajōng katlung sik kae ti hi nangni’n nanmanhret.

³ Mihe’n, “Tûnchu kadai jo, ṭit sik om mak jo,” anti laitak khan manhret manloa inhmangna khan anchunga ajōng suk manhmang sik hei kae! Hivahi nupui nai kanei sik naiha kaphu a’nphut kapōa ajōng katlung sik kae, khana mihei kha tlânsōt tor mak hei ning.

⁴ Tâk-kha sōpuihei, nangni chu inthim thōia om mak chei, khava kani khan inru kapōa manhret manloa tlomak tin chei.

⁵ Nangni nankhenga, khōvâr ta chei kae. Eini jân leh khō inthim ta kha changmak me.

⁶ Khava jâra tûnchu, milak-hei kapōa eini akajemak sik me kae; kahlim senga akahar sik me kae.

⁷ Mihring kaje hi jân a kae; ju a’nrui hei hi’m jân a kae.

⁸ Tâk-kha eini chu sûn khōvâr ta me kae, kahlim senga akahar sik me kae. Eini’n ni’nhōrna hukmanhringna kha lukhua inkhu sik, khana taksen leh lungsetna kha ômphoa ninei nger sik kasōk.

⁹ Pathen in ahnuk natna inrimna kade sik a akadei me changmak, tâk ni-Rōngpu Jesu Christa jâra hukmanhring kachen sik a eini Pathen in akadei jôk me kae.

¹⁰ Ama ajōng pha, eini nileithi’num, nileihring inum, ama leh akahringsap sik a ama’n athipek jo me kae.

¹¹ Khava jâra nangni tûntak a nanṭōn tlo kapōa, khat leh khat inbômtō una, malung inthok tō ruh.

Achaina Mansena leh Chibei Tlona

¹² Sōpuihei, nankâra ṭōnkatlo nankaṭhōi hei leh nankaching hei kha, Christian hringkhōa, kadiktak a kaja hei ruh.

¹³ Anmani’n khava ṭōn kha antlo jâra khan kajatak a leh lungsettak a razen hei ruh. Nanshunga kamōnga om ruh.

¹⁴ Sōpuihei, akatlasam kha inthōpui ruh, ṭit kase kha amalung manngam pek ruh, ratha kase kha manse ruh, mi rakip sik a dehrat ruh, tia kanta heimathok chei kae.

¹⁵ Enruh, tûte’num akaṭhamak kha akaṭhamak vâng male mak rasoh, tâk pha rakip a mi rakip hneng leh nangni inkhat leh inkhat hneng ṭōn kaṭha tlona sik bitin kha nei ruh.

¹⁶ Ahei tik a inpâk ruh,

¹⁷ pha rakip a derṭhak ruh,

¹⁸ Heirakip chunga mi manpâk thei ruh. Christa Jesu leh inchunna shunga nanhringkhōa khanga nantatlo sik kha Pathen tamadu kae.

¹⁹ Rathla Intheng kha khâm mak ruh;

²⁰ rathla manhlimna ṭong inhri hei kha hnōise mak hei ruh.

²¹ Heirakip entetōk ruh: akaṭha kha ching ruh

²² akaṭhamak rakip kha dahlon ruh.

²³ Keini hneng mōngna anikapek Pathen khan ahlam rakip a mantheng chei rasoh. Khana nantaksa pumpui, malung, rathla khana taksa, ni-Rōngpu Jesu Christa ajōng pha nōrna kase manchang chei rasoh.

²⁴ Nankabekpa khan hi atlo sik, ama chu taksen ka-om tak kae.

²⁵ Sōpuihei, keini sik um aderpek ruh.

²⁶ Akataksen rakip a’ntheng injôpna leh inṭhōia chibei intlo ruh.

²⁷ Hiva chithi hi sōpui rakip hneng nantateisōt sik a Rōngpu ratha neina vânga kahei mathok chei kae.

²⁸ Ni-Rōngpu Jesu Christa maritna khan ompui chei rasoh.