THESSALONIANHEI INKHATNA 4 - LEKHARABU INTHENG (BSI)

Pathen Malung Tlaina Hringkhō

¹ Achaina, sōpuihei, heikhonga akahring sik chei keinia inphut inchu ruh. Pathen malung tlaina sik nanhringkhō hmang ruh. Amirōkchu, nangni’n khang’khan hringkhō nanlei hmang jo. Khana tûn Rōngpu Jesu rahminga khava omchen kakhe chet nantlona sik kantangek chei kae.

² Ajârchu Rōngpu Jesu ratha neina inphut kantahei manse chei hi nangni’n nanmanhret.

³ Jông leh kîk a inphut pum inthenga nan-inthengseng sik hi Pathen tamadu kha kae.

⁴ Nangni pase rakip in anuhmei kha kajatak leh inthengtak a ompuije amanhret sik kae,

⁵ Pathen inhret mak jât-hlop hei kapōa, madu rangei pum a changloa.

⁶ Hiva chunga hin, tûte’n asōpui Christian inkhat chunga akadik mak omchen atlo mak sik khana hnemna ajong mak sik kae. Hiva chungchânga ṭōnse katlo mihei kha, Pathen in karâkna apek sik hei ti hi hma inkeia inhnaktak a kanleihri jo.

⁷ Pathen in jông leh kik kajōm sik a abek me changmak, inthengtak a ka-om sik a abek me kae.

⁸ Khava jâra, hiva mansena kajuimak mi khan, mihring mansena ajuimak changmak, Rathla Intheng nankapek Pathen mansena kha ajuimak kae.

⁹ Nanloi akataksenhei lungset sik chunga avea heimazet sik rangei mak jo. Ajârchu inkhat leh inkhat heikhonga a’nlungset sik chei mo ti hi nanbingkhet a Pathen in amanthei jo chei.

¹⁰ Macedonia pumpuia sōpuihei hneng, khang’khan omchen nantlo joa kae. Khava jâra sōpuihei, akakhe chet a omchen kaṭha nantlona sik a kantahei ngek chei kae.

¹¹ Hma inkeia kanta leihripek chei kapōa, hringkhō kaṭha nenga omna sik, nanṭōn et a insaler una hringna sik mandon ruh.

¹² Khang’khan akataksenmak hei kajana kha nanchen sik, khana nanmaduna chunga tûte hnenga a’nngaimak sik chei kae.

Rōngpu Jōng sik

¹³ Sōpuihei, inhōrna kaneimak hei kapōa, nanmalung a’nrim makna sik, akathihei chungchânga akadik kha nantamanhret sik kamadu.

¹⁴ Jesu kha kathi khana kathōi nôk ti hi eini’n nitaksen, khava jâra ama kataksen akathihei kha Jesu leh inṭhōia Pathen in aṭhōi sik hei ti hi nitaksena kae.

¹⁵ Tûna kantamanthei chei hi Rōngpu mantheina kha kae: Rōngpu ajōng ning akahringa aleika-om eini’n akathihei kanek a hma keimak min.

¹⁶ Pathen pengkun jōng inhring sik, marvân ngeva kalen ṭongpekna, aka-ông rasa inthei sik, khan marvâna inphut Rōngpu kha ajōng kaṭum sik kae. Christa kataksen aleikathi hei kha hma inkeia kahringa kathōi sik hei;

¹⁷ khava sōa aleikahring seng eini leh anmani sumtuk chunga intûp sik mea kha bōirōk a Rōngpu leh inhmu sik me. Khang’khan Rōngpu leh inṭhōia ahei tik chen a ka-omsap sik jo me.

¹⁸ Khava jâra hiva ṭong vâng hin nangni inkhat leh inkhat mathokna inpek ruh.