THESSALONIANHEI INKHATNA 2 - LEKHARABU INTHENG (BSI)

Thessalonica Khōa Paul Ṭōntlo

¹ Sōpuihei, keini nanhnenga kanhong kha akahnem mak changmak ti nangni khet in nanmanhret.

² Thessalonica khōa nanhnenga kanhong mak hma Philippia khōa ṭōn kanleitlolai khan hnōisetak a inzakna antapek ung kha nangni’n nanmanhret. Khava hmun a khan kankadōi khang hrep atam ravâng, ama hnenga inphut akajōng Ṭong kaṭha nanhnenga hrina sik a kan-Pathen in mathokna apek ung.

³ Kanngekna chei hi akadik mak chunga a-emak leh a’nthengmak lungthima tûte inkhat hōn mathlâkna sik chunga a’nhnga ung changmak.

⁴ Khava kanek a, Pathen in amaduna ung dungjuia Ṭong kaṭha kha ahei tik a kanhri, ajârchu ama’n keini hneng hiva Ṭong kaṭha amanngan sik hi rahōi kasōk inkhat a alo ung. Keini’n mihring malung tlaina sik jongmak ung, tâk kanmalung ka-ensui Pathen malung tlaina sik kantajong jôk kae.

⁵ Keini ṭonghri themna vâng nanhnenga akahong ung changmak, khan chu kan-inphâmna makhuna sik ṭongkahri kha’m changmak ung ti inchêna nanmanhret, khava chunga Pathen kansâkhi kae!

⁶ Mi inkhat a inphut leh nangnia inphut, a-emak leh mihlop-heia inphut manpâkna antapek sik jongmak ung,

⁷ achang ravâng Christa sonle inkhat changna keini’n ngekna kanneitor cheia kae. Tâk-kha minu inkhat in asahei lum lona anun amannem kapōa, nangni leh ni-om saplai khan kannun kanlei mannema kae.

⁸ Khava jâra, kanlungset chei, Pathena inphut Ṭong kaṭha rōk kha chenpui sik chei changloa, kanhringkhō kapha kantachen sappui hnōm chei kae. Nangni kanmalungset hêr chei!

⁹ Sōpuihei, heikhonga ṭōn kantaleitloa ale’nreng ung mo ti kha nangni’n kadiktak a nanmandonsōt sik! Pathena inphut Ṭong kaṭha kha kanhrile pum a, nangni kankachok makna sik chei sûn leh jân ṭōn kantloa kae.

¹⁰ Nangni akataksenhei hnenga kan-omchen kha intheng, kadik khana ṭhenakase kae ti kha nangni kansâkhi chei kae, khang’khan Pathen um kae.

¹¹ Mipa kachang inkhat in asahei hneng arazen hei kapōa kantatlo kha nanmanhret.

¹² Kanmathok chei, lungmōng kanṭhlâk chei, khana a-Rengram leh alûrna kachen sik a nankabekpa Pathen malung tlainating hringkhō kha nanhmangna sik kanngek ṭhak chei.

¹³ Khana keini’n ahei tik a Pathen kanmanpâk ṭhakna ajâr inkhat ka-om. Ti chu keini’n Pathen ṭong kha kanhei rôn pha, mihring ṭong changloa, Pathen ṭonghrikhet a nangni’n nanlei rahlâng, khavakha akadiktak kae. Ajârchu akataksen nangni kâra Pathen in ṭōn atlo kae.

¹⁴ Kasōpuihei, Judea ram a Pathen bekrup-hei, Christa Jesu ta kachang amihei hneng omchen kasōk leh in-anghrep a nangni hneng um akasōk kae. Ti chu anmani’n Jehudi heia inphut suk manrimna antade kapōa nangni um nanram miheia inphut suk manrimna kha nantade kae,

¹⁵ Rōngpu Jesu leh asânkathemhei anleithat hei, khana keini’m ansuk manrim ung. Anmani heituk-hrep a mi rakip kadōi akachang hei mo! Pathen malung heituk-hrep a khangtuk hrep antamannat mo!

¹⁶ Jât-hlop hei hukmanhringna sik a ṭong kantavahrile sik kapha antakhâr ung kae. Hing’hin anmani’n ahei tik a anta leitlo setna kha pui anmathluk a kae. Khana tûn achaina Pathen hnuk natna kha anchunga akatlung jo kae!

Paul in Avea Phâk nôk sik hei Amadu

¹⁷ Sōpuihei, nangnia inphut pha bongkhat eini ni’nṭhen pha, mandonna ting chu changloa, taksatinga rōk a, heituk a kantarangei chei mo khana inhmupui sik a heituk a rahnak kantatlo mo!

¹⁸ Nanhnenga hong inle nôk sik hi kanmadu. Paul keitak in vōi khat kakhea inle sik a kaleitlo, tâk Seitan in kanhlam aleikhâr pek jo ung.

¹⁹ Heirakip ni-Rōngpu Jesu Christa ajōng pha, kanre torna chunga kan-inhōrna, kan-inpâkna, khana kan inlensakna sik a ajâr kha nangni chei kae, nangni kae, aralak-hei kanek a akatlasam changmak chei!

²⁰ Inthengtak a, nangni kan inlensakna leh kan-inpâkna chei kha kae.