THESSALONIANHEI INKHATNA 1 - LEKHARABU INTHENG (BSI)

¹ Paul, Silas khana Timothya inphut, Pa Pathen leh Rōngpu Jesu Christa ta kachang, Thessalonica bekrup mihei hneng kantahei mazet chei kae: Maritna leh malung mōngna nanta chang rasoh.

Thessalonianhei Hringkhō leh Taksenna

² Keini’n kanderna rakip a nangni kankopsa ṭhak chei khana nangnihei seng jâra Pathen kanmanpâk ṭhak a kae.

³ Rōngpu Jesu Christa a nan-inhōrna khan heituk-hrep ṭōn inhnak amantlo chei, khan chu nantaksenna kha heituk-hrep a ṭōn tlona nantahmang ti kha ni-Pathen leh ni-Pa ângshunga kanmandonsōt a kae.

⁴ Sōpuihei, nangni Pathen in alungset chei khana atâ kachang sik a akadeisōt jo chei ti keini’n kanmanhret.

⁵ Ajârchu keini’n Ṭong kaṭha kantaheirôn kha, beiṭong rōk changmak, tâk Rathla Intheng leh inṭhōia arathahrat kadik leh pui katluk set kantahei rônsa kae. Keini nangni leh nileiom saplai heikhonga aka-om ung mo nangni’n nanmanhret; khavakha nangni ṭhatna sik a kae.

⁶ Nangni’n keini leh Rōngpu omchen kha nantamanchu kae; nangni’n khōdeng theina katamtak nande ravâng, Rathla Inthenga inphut inpâkna ṭong akajōng kha nanchen joa kae.

⁷ Khava jâra nangni Macedonia leh Achaia akataksen rakip hneng man-entena kha kachang jo chei.

⁸ Ajârchu nangnia inphut a Rōngpu ṭong kha Macedonia leh Achaia rōk a a’nthang changloa, Pathen nantaksenna kha hmun rakip a katlung jo. Khava jâra, hiva kakhea hrisa sik heite om mak.

⁹ Hiva mi rakip hei hin heikhonga mo keini nanta rahlâng ung, nanhnenga kanhonglai akadik leh akahring ṭhak Pathen Sapa razenna sik a heikhonga mo limsyemhei nantahong dahlon,

¹⁰ khan chu Pathen hnuk natna ajōng katlung sik a inphut, ani kahuk inhringpa, Pathen khan thina inphut akei mathōi Asapa Jesu kha marvâna inphut ajōng sik nantahngâk hi mi rakip in anhri joa kae.