SŌKSŌT 9 - LEKHARABU INTHENG (BSI)

Ranhei Thina

¹ Rōngpu’n Moses hneng ahria, “Se ina reng hneng hinga vahri roh, Rōngpu, Hebrewhei Pathen in ahri, ‘Kamipui he’n kei ankamuk theina sik eng mansesōt heiroh.

² Anmani ansesōt sik nahnōm nôk mak inchu,

³ Ke’n hrise inhnaktak nanranhei seng chunga kamathlâk sik–nashakor, shakōrtung, sharîngsei, serup, kemōng, khana kehei chunga kajōngtir sik a kha nang karâkna kapek sik che.

⁴ Ke’n Israelhei ran leh Egypt hei ran chunga kakhōiṭhen sik, khana Israelhei ran inkhatbek thimak ning.

⁵ Rōngpu inti ke’n apha kha jînga tlo sik a katep jo.’”

⁶ Ajîng kania Rōngpu’n aleihrisa dungjuia atlosōt jo. Khana Egypt hei ranseng kathi jo hei, tâk Israelhei ran inkhatbek thimak hei.

⁷ Rengpa khan hei omchen mo akasōk tia ader heia Israelhei ran chu inkhatbek thi pek mak hei tia anhri pek. Tâk-kha amalung ngar jâra mipuihei kha mansesōt mak heia kae.

Khōihli Nat

⁸ Khava sōa Rōngpu’n Moses leh Aaron hneng ahria, “Ratap a ravut kha kut maja ṭhahrep choi ruh; rengpa hmaikunga Moses’n chungting akathek sik kae.

⁹ Khava ravut kha vaiphin intheng kapōa Egypt ram shung senga inchek-chai sik, khana hmun rakip a mihei chunga leh ranhei chunga khōihli nat hong kasōk sik khana ahmur ahong kakik-khōi sik kae,” ati.

¹⁰ Khava pha anmani’n ravut ṭhahrep anchoia rengpa hmaikunga kangir hei. Moses’n ravut kha chungting akathek jo, khana mihei chunga leh ranhei chunga khōihli nat hong kasōk jo.

¹¹ Hmitphedôi kathemhei Moses hneng inlâr tor mak jo hei, ajârchu alak Egypt hei kapōa anmani kha’m khōihli nat anchunga kasip sō jo.

¹² Tâk-kha Rōngpu’n aleihrisa kapōa rengpa malung amansak pek a Moses leh Aaron ṭonghri leirangei mak.

Kahre Tlâk

¹³ Khava sōa Rōngpu’n Moses hneng, “Jînga jîngkâr hmatak se una rengpa kha hong inhmupui inna, Rōngpu Hebrewhei Pathen khan hing’hin ahri ti ruh, ‘Kamipuihei khan kei ankamuk theina sik eng mansesōt heiroh,’ ati.”

¹⁴ Tûna chunga karâkna hi naṭōn karônhei leh, namipuihei chung rōk a changmak ning, raleichung pumpuia kei kapō inkhatbek om mak ti namanhret theina sik a nang um kakarâksa sik che kae.

¹⁵ Ke’n kakut hi nang leh mipuihei chunga kakalânga hrise nat vâng kavōk chei inchu aleikaram sōreng sik jo chei kae.

¹⁶ Tâk-kha karahming vânhnōia a’nthangna sik khana karatha hratna manhmuna sik kahringa kalada che kae.

¹⁷ Tûn katlunga hinum heite donlo chea kamipuihei mansesōt sik lahnōm mak che.

¹⁸ Jînga tûn pha hrep a ke’n kahre inhnaktak, Egypt mihe’n thuhminga’m anta leimanhret phungmak, kamansûr sik kae.

¹⁹ Tûnhin vânga ka-om naranhei leh naneihei seng anrōnga anda manhlutna sik ṭong pe heiroh. In-ungna kaneimak ram thōia ka-om mihei leh ranhei kha kahre’n adenghlon sik hei kae khana ankhenga akathipet sik hei kae.”

²⁰ Rengpa ṭōnkarôn ṭhahrep chu Rōngpu ṭonghri hei jâra khan kaṭi jo hei, khana anmani’n ansōk hei leh anranhei kha in-ungna rōnga anhongṭhōi manhlut jo hei.

²¹ Achang ravâng alak he’nchu Rōngpu gîkna hei kha heitea sakmak hei, ansōk hei leh anranhei kha ram thōia anleida hei.

²² Khava sōa Rōngpu’n Moses hneng, “Nakut kha chungting kalâng roh, Egypt ram pumpuia mihei chu-nga, ranhei leh hleia thing leh rō hei chunga kahre jōngkatla sik jo,” ati.

²³ Khava jâra Moses’n akhōnghre kha chungting akalâng jo, khana Rōngpu’n khō inri leh kahre ajōngtir jo, khō inphe in ralei ajōng deng jo.

²⁴ Rōngpu’n kahre inhnaktak ajōngtir, khō inphe khan dung leh vaia asuktōa kae. Hivahi Egypt ram a manhret thei thuhming rakip hei kâra a’nhnakpen kahre tlâk kha kae.

²⁵ Egypt ram vânga ka-om neinâk rakip, mihei leh ran rakip inveina adeng hlonsō pet jo hei. Hleia ka-om thingchap rakip leh thingkung rakip he’m adeng mathleksō pet jo hei.

²⁶ Goshen ramkeia, Israelhei omna hmun rōk kha kahre tlamakna leikae.

²⁷ Rengpa’n Moses leh Aaron ava manbek heia ahri, “Tûna chunga hin setna katlo jo; Rōngpu kha akadik langa, khana kei leh kamipui he’n akaṭhe langa ka-om jo ung.

²⁸ Rōngpu hneng aderpek ruh! Keini khō inri leh kahre’n adeng ung hi katluk set jo! Nangni sesōtna sik a kei intep eng; hiva hmun a omsôt mak jo tin chei,” ati.

²⁹ Moses’n ahnenga, “Ke’n khōpuia inphut kasesōt lim leh kakut kakalânga Rōngpu hneng kader sik. Ralei hi Rōngpu ta kae ti namanhret theina sik a khō inri kabâng sik, khana kahre kha’m tla nôk mak jo ning.

³⁰ Tâk-kha nang leh naṭōn karôn he’n Rōngpu Pathen kha laṭit mak chei ti ke’n kamanhret,” ati.

³¹ Khana bunim leh butunhei ka-hre’n adeng manram jo hei, ajârchu bunim kha ahmin laitak khana butun kha a’nrai laitak a kae.

³² Tâk-kha gehu chu inkhatbek inhmang mak, ajârchu hnung kakhôra akahmin ri kae.

³³ Moses’n rengpa kha adahlon jo, khōpuia inphut kasesōt jo, chungting akut akalânga Rōngpu hneng derna anei. Khō inri, kahre katla leh khō kasûr kabâng jo hei.

³⁴ Rengpa’n khava omchen kasōk hei ahmu pha ama kaset nôk jo. Ama leh aṭōn ka-rônhei kha anmalung kangar chet a ka-om jo hei

³⁵ khana Rōngpu’n Moses hneng aleihrisa kapōa, reng-pa’n Israelhei leimanse sōt mak heia kae.