SŌKSŌT 7 - LEKHARABU INTHENG (BSI)

¹ Rōngpu’n, “Ke’n nang rengpa hmaikunga Pathen kapō kamanchang sik che, khana nasōpui Aaron hin nang sânkathem inkhat a ahnenga ṭong ahri sik kae.

² Kaṭong pek che rakip kha Aaron hneng hripek roh, ama’n reng hneng Israelhei kha aram amandahlona sik hei ahri sik.

^3-4 Tâk-kha ke’n rengpa malung kamanngar pek sik, ke’n Egypt a ṭit ka-om ṭōn heijalai katlo’num, nanṭong hri rangei mak ning. Khava sōa Egypt chunga karâkna inhnaktak kapek sik hei khana kami jât-hei hi khava ram a inphut kaṭhōisōt sik hei.

⁵ Anmani kadōia kabân hi kakalâng pha khana Israelhei kha anrama inphut kaṭhōisōt hei sōa khan chu kei Rōngpu eng kae ti hi Egypt mihe’n anhong manhret sik jo,” ati.

⁶ Rōngpu ṭongpek kha Moses leh Aaron in anleitlo.

⁷ Egypt rengpa hnenga ṭong anleihrilai khan Moses kha kum 80 katluk jo khana Aaron kha kum 83 katluk jo.

Aaron Khōnghre

⁸ Rōngpu’n Moses leh Aaron hneng,

⁹ “Ṭōn-inlak tlona vâng nanbinga tu chei mo ti kha inlâr ruh ati chei inchu, Aaron khan akhōnghre a’nloa rengpa hmaikunga ahlon mathlâkna sik hripek roh, khavakha mari ahong kachang sik kae,” ati.

¹⁰ Khava jâra Moses leh Aaron rengpa hneng vakase heia, Rōngpu ṭongpek kapōa anvatlo jo. Aaron in akhōnghre kha rengpa leh aṭōnpui karônhei hmaikunga ahlon mathlâk jo, khavakha mari hong inchang jo.

¹¹ Khava pha rengpa’n ami kasinghei leh hmitphedôi kathemhei kha abek heia andôi vâng in-anghrep a anleitlosōt jo.

¹² Ankhōnghre hei kha anhlon mathlâk jo hei, khana khōnghre hei khan mari kachang jo hei, tâk Aaron khōnghre khan amade jo heia kae.

¹³ Kha’num rengpa kha amalung kangar er a leika-om khana Rōngpu’n aleihri kapōa, Moses leh Aaron ṭonghri kha rangei mak a kae.

Egypt Chunga Manrimna hei Thisen

¹⁴ Rōngpu’n Moses hneng, “Rengpa malung kasak hêr khana mipuihei sesōt sik kha hnōm mak jo.

¹⁵ Khava jâra nang se roh, jîngkâra Nile tuidunga ama ahong pha inhmupui roh. Nakhōnghre mari inchang kha choi ina, tuidung panga leihngâk roh.

¹⁶ Khana rengpa hneng hinga, ‘Rōngpu, Hebrewhei Pathen khan, nêrdi ramhânga ami he’n ama ankamuk theina sik naman sesōtna sik hei nahnenga akahri sik a kei hi ahei tir eng kae. Tâk-kha tûn kapha nang in rangei mak che.

¹⁷ Tûnchu, Reng Kalûr, nang in ama kha tu mo kae ti kha aṭōn tlo sik vâng khan namanhret sik jo tia Rōngpu’n ati. Enroh, hiva sung vâng hin tuidunga tui hi kavōk sik, khana tui hi thisen kachang sik jo.

¹⁸ Nga kathi sik hei, tuidung marim khangtuk hrep kase sik, Egypt mihe’n intor mak hei ning,’ vati roh,” ati.

¹⁹ Rōngpu’n Moses hneng, “Aaron khan akhōnghre kha choisona Egypt a tuidung, tuikhông leh tuikhur rakip chunga akalekna sik manthei roh. Tui kha thisen kachang sik, thing thlengdâr shung leh hlungbe shunga kapha khana ram shung pumpuia thisen kachang sik,” ati.

²⁰ Khava sōa Moses leh Aaron in Rōngpu ṭongpek dungjuia anleitlo jo. Rengpa leh aṭōn karônhei hmaikunga, Aaron khan akhōnghre kha akalânga tuidung tui kha avōk jo, khana tui rakip kha thisen kachangsō jo.

²¹ Tuidung shunga ngahei kathi jo hei, khana tui kha amarim kase hêr joa Egypt mihe’n intor mak jo hei. Egypt hmun rakip a thisen kachangsō jo.

²² Khava sōa rengpa hmitphedôi kathemhei khan andôi vânga in-anghrep a anleitlo jo, khana rengpa kha amalung kangar chet-chet jo. Rōngpu’n aleihri kapōa, Moses leh Aaron ṭong rangei sik leihnōm mak a kae.

²³ Khava kanek a, hiseng asōk jo’num heite sakloa ahmai amahea areng-innpuiting le’nle jo.

²⁴ Egypt mi rakip in tui in sik anjōnga tuidung panga anleichoa kae.

²⁵ Rōngpu’n tuidung avōk setna kha ni 7 hong kathleng jo.