SŌKSŌT 5 - LEKHARABU INTHENG (BSI)

Egypt Rengpa Hmaikunga Moses leh Aaron

¹ Khava sōa Moses leh Aaron Egypt rengpa hneng kase heia, “Rōngpu, Israelhei Pathen in, ‘Nêrdiram thōia kei kajana revei inkhat antlo theina sik kamihei mansesōt heiroh,’ ati,” anvati.

² “Tu mo Rōngpu kha?” tia rengpa khan ader hei. “Ke’n heisik a mo ama ṭong karangeia Israelhei kamansesōt sik hei? Ke’n Rōngpu kha manhret mak eng khana Israel mansesōt mak ning,” ati.

³ Moses leh Aaron khan anma-sôna, “Hebrewhei Pathen khet kha kanhnenga inlâra kae. Rōngpu kan-Pathen hnenga inthoina katōk sik a nêrdi ramhânga ni 3 hlam a keini sena sik ahnōm pek roh. Keini’n kha kantlomak inchu keini hi nat a a-emak leh rea athat manram sik ung kae,” anti.

⁴ Rengpa’n Moses leh Aaron hnenga, “Mipui he’n anṭōn donmakna sik nanta tlopek hei hi heimo nantina? Khava sōk-hei kha ṭōn mantlo nôk hei ruh.

⁵ Nangni Egypt hei kanek a katam jo chei. Tûn nangni ṭōn tlomakna sik a nanta madu jo kae!” ati hei.

⁶ Khava ning bât khan Egypt mi sōk-kaching hei leh Israel hlamkakeihei hneng rengpa’n, ṭong masōna anei jo:

⁷ “Tuninga inphut ṭek syemna sik sapôt mipui hnenga pemak jo hei ruh. Anbingta et sik kha manjong hei ruh.

⁸ Tâk-kha hma antasyemja et kha, inkhat rōk tlaloa mansyem hei ruh. Anmani hi tlo sik a ṭōn katam neimak jo hei, khava jâra anmani ansesōtna sik leh an-Pathen hneng inthoina tōkna sik a antangek ṭhak eng kae!

⁹ Hiva mihei hi maleisei ṭong rangeina pha anhmuthei makna sik ṭōn mantlodet hei ruh khana anṭōn mankhôk ṭhakpek hei ruh.

¹⁰ Khana sōk-kaching hei leh Israel hlamkakeihei kha kasesōt heia Israel mipuihei hneng, “Rengpa’n nangni sapôt pemak jo chei ning ati.

¹¹ Nangni akase cheia nanhmu theina chenna sapôt nanta’njong sik kae, tâk ṭek khachu aja kakip a nantasyem sik kae ati,” antipek jo hei.

¹² Khava jâra mipuihei kha sapôt kajonga Egypt ram pumpuia kalôn heia kae.

¹³ Sōk-kaching hei khan hma sapôt anpek lai heia ni khat a antasyemja kapōa ṭek ansyemna sik anmani rahnak a ankahnot hei.

¹⁴ Egypt sōk-kaching hei khan Israel hlamkakeihei, ṭōn ka-ensui antamanṭang hei kha anleivōk hei. “Heisa mo hma nanṭek syemja nantasyem mak?” anti hei.

¹⁵ Khava pha anhlam kakeihei kha reng hnenga kase heia va-inphin heia, “Reng Kalûr, heisa mo hinga natlo ung?

¹⁶ Keini sapôt apek mak chei kha’num ṭek kasyem sik a ṭong nanpek ung! Khan chu tûnhin anivōk ṭhak ung. Hiva akaṭhe hi namihei kae,” anvati.

¹⁷ Rengpa’n aleimasôn heia, “Nang-ni nanratha akasea ṭōn tlohnōm mak chei khava jâra nangni sesōtna sik leh Rōngpu hneng va’nthoina sik a nantader eng kae.

¹⁸ Tûn ṭōn katlo sik a inle ruh. Nangni sapôt inkhatbek pek mak chei ning, tâk hma nanṭek syemja kha nantasyem ṭhak sik kae,” ati hei.

¹⁹ Hma ani tina ṭek syemja tlâklo jen a anta’nsyem sik ṭong kha anhri pek hei pha anhlam kakeihei khan tlo manrimna shunga katla jo hei ti hi inhret jo hei.

²⁰ Anmani’n anheisōk pha ankahngâk a aleika-om Moses leh Aaron kha leh intō jo hei.

²¹ Anmani’n Moses leh Aaron hneng, “Kanchunga nanta tlona hi Rōngpu’n ahmu sōpet, Rengpa leh aṭōnpui karôn he’n keini enkadana nanmannei ung jâra karâkna apek sik chei. Anmani’n keini anthatna sik unga ahlam nansyem pek jo hei.

Moses’n Rōngpu Hneng Rahno Apek

²² Khava pha Moses kha Rōngpu hneng avea ahnget a ahri, “Rōngpu, heisa mo namihei hinga inrimtak a natlo hei? Heisik a mo kei hin nahei tir eng?

²³ Rengpa hneng nang sik a ṭongkahri kase ninga inphut, ama’n êng kasetak a anmani hi ahongtlo jo hei. Kachanga nang in anmani inṭangpuina sik heite latlomak che,” ati.