Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

SŌKSŌT 40 - LEKHARABU INTHENG (BSI)


Rōngpu omna Pōn-inn Pathen hnenga Antatōksōt

1 Rōngpu’n Moses hneng ahri,

2 “Thla ahma inkeipena kani ahma inkeipen ning Rōngpu omna Pōn-inn kha matungsōt roh.

3 Ashunga khan Ṭongpek Sôm omna Intepna Bôm kha da roh khana ahmating khan pinden kha zâr roh.

4 Dokhâng kha heichoi roh, achunga hmangchâk-hei kha da hei roh. Thaihmei matungna kha’m heichoi roh, achunga khan thaihmei hei kha damantōk roh.

5 Marim katui ro mankhutna sana maichâm kha Intepna Bôm hma khan da roh khana Pōn-inn honghlutna tak a khan pinden makhei roh.

6 Pōn-inn hmatak a khan romanvâm inthoina maichâm kha da roh.

7 Thlengkông kha Pōn-inn leh maichâm kâra khan tui mansiptak ina da roh.

8 Akimvea akur khumna hei kha matung roh khava ahong hlutna khan pinden makhei roh.

9 “Khava sōa Pōn-inn leh ashunga hmangchâk rakip kha a’ntheng thaitui kano hei ina tōksōt hei roh, khan chu intheng sik jo hei.

10 Abâna, maichâm leh ahmangchâk heirakip kha’m thai intheng kano hei ina tōksōt roh, khan chu pui katluk a intheng sik jo hei.

11 Insina thlengkông leh amatungna kha’m khanga mantheng ina tōksōt roh.

12 “Aaron leh asapahei seng kha Pōn-inn hlutna khan heiṭhōi hei roh, rōi inkhat a an-insina sik hripek hei roh.

13 Aaron kha thempu von kha manvon roh, thai kano roh, thempu inkhat a kasepa arazen theina sik khang’khan sukmantheng roh.

14 Asahei kha heiṭhōi hei roh, anzakkō manhak hei roh.

15 Khan chu anpa thaitui nakano kapōa, anmani kha’m thai kano hei roh; thempu kapōa kasepa antlo theina sik a. Hiva thai kano hin anmani ahei tik a thempu amanchang sik jo hei kae.”

16 Rōngpu’n ṭong apek kapōhrep a Moses’n heirakip atlo jo.

17 Khang’khan Egypt anhong dahlona kum 2 changna thla hma inkeia kani hma-inkei ning Rōngpu omna Pōn-inn kha anlei matungsōt a kae.

18 Moses’n akacho matungna hei ada heia akekim hei amatung jo hei, abang rape amansur jo hei.

19 Rōngpu’n Moses ṭong aleipek kapōa, Pōn-inn chunga amakhuna amazer jo, khava chunga avâng intong makhuna kha ada jo.

20 Khava sōa hlungpek 2 kha aloa Intepna Bôm shunga khan ada jo. Bôm a akōr insyema khan sungtlōn hei kha anmando khana asingna vâng achung kha asing jo.

21 Khava sōa khava bôm kha Pōn-inn shunga khan ada manhlut a pinden amakhei khum jo. Khang’khan khava Intepna Bôm kha Rōngpu ṭongpek dungjuia a-en mantōk joa kae.

22 Dokhâng kha Pōn-inn shunga ada jo, sak intonga pinden vângting khan,

23 khava chunga Rōngpu ṭongpek dungjuia Rōngpu hneng a’ntōk buhlom kha ada jo.

24 Thaihmei kung kha Pōn-inn shunga ada jo, dokhâng kha leh inhngetchak a, thlâng intong panga.

25 Khana khan Rōngpu ṭongpek dungjuia, Rōngpu omna khan thaihmei adet jo hei.

26 Sana maichâm kha Pōn-inn shunga ada jo, pinden hmatak a khan.

27 Rōngpu ṭongpek dungjuia, khava hmun a khan marim katui aro mankhut jo.

28 Pōn-inn hlutna kot kunga khan pinden amakhei jo,

29 khava pinden hmatak a khan ro-inthoina maichâm kha ada jo. Khava chunga khan Rōngpu ṭongpek dungjuia ro-inthoina leh kara inthoina atlosōt jo.

30 Pōn-inn leh maichâm kâra khan thlengkông kha tui kasiptak a ada.

31 Moses, Aaron, khana asahei kha khana khan ankut anke ansôp

32 Rōngpu ṭongpek dungjuia, Pōn-inn leh maichâm anhlut sik kataia ansôp ri.

33 Moses’n Pōn-inn leh maichâm akimvea akakurna kha amatung jo, akakurna hlutna kot kunga khan pinden kha amakhei jo. Khang’khan ṭōn rakip atlosō jo.


Rōngpu Omna Pōn-inn Chunga Sumtuk
( Mj 9.15–23 )

34 Khava sōa Pōn-inn kha sumtuk in amakhusi jo khana Rōngpu omna vâr kadi rik-rak kha kasip jo.

35 Khava jâra khan Moses kha Pōn-inn shunga hlut tor mak jo.

36 Pōn-inn chunga sumtuk kha a’nhliksōt pha leh rōk Israel sahei khan an-omna hmun kha inthon ri heia kae.

37 Khana khan sumtuk kha a-omlai seng anṭhumhmun kha thonmak hei.

38 Ankhōhme hlam hro kârseng, Rōngpu ka-om kha sûn leh sumtuk hloma jân leh hmei hloma Pōn-inn chunga aka-om kha anmani’n anleihmu.

Komrem Revised Bible - LEKHARABU INTHENG

Copyright © Bible Society of India, 2015.

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ