SŌKSŌT 36 - LEKHARABU INTHENG (BSI)

¹ “Bezalel, Oholiab, khana alak ṭōnkatlo ankhenga Rōngpu’n kut themna leh manhret theina apek hei seng in, a’ntheng Pōn-inn sakna arangei seng kha heikhong mo syem sik ti inhret hei khan, Rōngpu ṭongpek kapōtak a heirakip antasyem sik kae.”

Mipuihei Kutchoi katamtak

² Moses’n Bezalel, Oholiab, khana aralak Rōngpu’n kut themna leh tlotorna apek hei seng khana ama inthōpui hnōm hei seng kha abek jo hei, khana Moses’n anhnenga ṭōn anphutna sik amanthei jo hei.

³ Anmani’n ama hnenga inphut Israel he’n Pōn-inn intheng sakna sik a tōkna anta heichoi rakip kha anleirahlâng. Tâk Israel mipui he’n jîngkâr katai intanlo jena anneitōk hei kha Moses hneng anhongrôn.

⁴ Khava pha ṭōnkatlo kut kathemhei kha kase heia,

⁵ Moses hneng anhonghri, “Rōngpu ṭongpek dungjuia hmang sik a arangei kakhea mipui he’n anhongchoi jo.”

⁶ Khava jâra Moses’n an-omna rabuk rakip a ṭongpek amasōa, Pōn-inn intheng sik a tûte’n avea tōkna annei makna sik aleihri; khava jâra mipui he’n avea heichoi mak jo hei.

⁷ Anta heitōksa seng khan anṭōn rakip torsō petna sik a inhlei joa kae.

Rōngpu Omna Pōn-inn Antasyem

⁸ Ṭōn katlohei kâra kut kathem pen hei khan Rōngpu omna Pōn-inn kha anleisyem. Anmani’n pōn alâk 10 hruipat innem rahmurei, vapuirei, shahme patsen rōk a ankhông khana mathla kanei ranhring lim ankaṭhui mankop a ansyem.

⁹ Pōnlâk rakip kha alen asin in-ang et–adung metre 12, khana avai metre 2 kae.

¹⁰ Alâk 5 kha inkhat a ankaṭhui kop, khang tlit a 5 nôk kha’m ankaṭhui kop a kae.

¹¹ Ahma inkeipen pinden hmor kha rahmurei pōn vâng ahmora akōrhei ansyem; khang’khan 2 changna’m in-anga ansyem.

¹² Anmani’n ahma inkei pinden alak hma-inkei ahmor dunga akōr 50 ansyem; kha leh intōk a 2 changna pinden a kha’num ansyem.

¹³ Anmani sana kōikim 50 ansyema, khan vâng khan pinden 2 kha akōrheia anman sura inkhat rōk anmanchang.

¹⁴ Khava sōa anmani’n Pōn-inn makhuna kesam vâng ankhônga pōnlâk 11 ansyem.

¹⁵ Alenje in-ang et a adung metre 13 khana avai metre 2 ansyem.

¹⁶ Khana 5 kha ankaṭhui manchuna rup khat anmanchang khana ahlop karuk nôk in rup khat anmanchang.

¹⁷ Pinden rup khat a alak hnung kakhôrpen hmora akōr 50 anmando, khang’khan ahlop inkhat a kha’num khang tlit a intōk a ansyem.

¹⁸ Pinden 2 hei kha mansur mankop heia amakhuna inkhat rōk syemna sik, sum-êng kōikim 50 ansyem.

¹⁹ Aphuchung makhuna 2 ansyemsa, inkhat kha kemōng vun akasen rei insang vâng, ahlop inkhat kha shavun kaṭhatak vâng, avângtinga makhuna sik a.

²⁰ Anmani’n Pōn-inn sik a manngir sik acacia thing vânga kekim ansyem hei.

²¹ Akekim rakip kha metre 4 inshâng khana avai centimetre 66 kae.

²² akekim hmor 2 chu anman song hei, kekim hei kha ansur mankop theina sik. Kekim rakip in ahmor kasong annei et.

²³ Thlâng ting intonga akekimna 20 ansyem,

²⁴ khana athōia matungna dangka kōklei 40, kekim inkhat a amatungna 2 et, ahmor kasonghei mankopna sik a ansyem.

²⁵ Pōn-inn sak ting intonga khan akekimna 20 ansyem,

²⁶ amatungna dangka kōklei 40 ansyem, kekim inkhat sik a amatungna inhni-hni ansyem.

²⁷ Pōn-inn kahnunga sik, tlaitlâk tinga, akekimna kha 6 ansyem.

²⁸ arakir hei sik a akekimna 2 ansyem.

²⁹ Hiva arakir kekim hei kha asir inkhat leh inkhat athōia inphut manmat heia achung katlunga mansur sik hei kae. Arakir inhnia akekim 2 kha khang’khan insyem hei.

³⁰ Khang’khan akekim 8 leh dangka amatungna kōklei 16, kekim inkhat thōia amatungna inhni-hni ka-om hei.

³¹ Abang rape sik a acacia thing-tlōn15 ansyem, 5 chu Pōn-inn asir lang khat a kekim hei sik kae.

³² 5 kha ahlop lang khat a kekim hei sik a kae, khana 5 khan tlaitlâk a achôr tinga kekim hei sik a kae.

³³ Abang alaiṭima rape thingtlōn kha, kekim alaitak a manse roh, Pōn-inn akham inkhat a inphut inkhat ting katlung mathlung roh.

³⁴ Anmani’n kekim hei kha sana vânga ankatōma sana kōr anmando hei, rape khârna sana vânga a’ntōm thingtlōnhei mansurna sik a kae.

³⁵ Anmani’n hruipōn pinden inkhat, rahmurei, vapuirei, shahme kasen pat vânga ankhônga mathla kanei ranhringhei lim anman kopsa a anleisyem.

³⁶ Pinden makheina sik a kacho 4 acacia thinga ansyem, khahei kha sana vânga ankatōm, sana kōikim anmando hei. Khava sōa kacho matungna dangka kōklei 4 ansyema kae.

³⁷ Pōn-inn hlutna tak a makhei sik a hruipōn pinden inkhat, rahmurei, vapuirei, shahme kasen pat vânga ankhônga kutthem ret anmankop a ansyem.

³⁸ Hiva pinden makheina sik a kacho 5 kōikim anmando heia ahmor chung leh akung kha sana anman tōma kae, khana kacho 5 matungna kha sum-êng kōklei ansyem jo.