SŌKSŌT 35 - LEKHARABU INTHENG (BSI)

Châmhngat ninga Dân

¹ Moses’n Israel mipui ankhenga abek mantûp heia anhnenga ahri, “Hivahi nangni tatlo sik a Rōngpu ṭongpek kae:

² Nangni’n nanṭōn tlona sik a ni 6 nannei, tâk ni 7 changna khachu a’ntheng sik kae, Rōngpu kei hnenga a’ntōksōt châmhngatna kani kaṭha kae. Tu achang inum khava kani ninga ṭōnkatlo mi khachu that sik kae.

³ Châmhngat kani hin nan-innhei kapha hmei mansûk mak ruh.”

A’ntheng Pōn-inn sik a Neiṭōk hei

⁴ Moses’n Israel mipui rakip hneng ahri, “Hivahi Rōngpu ṭongpek kae.

⁵ Rōngpu hneng tōkna nei ruh. Mi rakip khanga akatōk hnōm in sana, dangka, sum-êng,

⁶ hruipōn kaṭha, rahmurei, vapuirei, khana shahme pōnsen, ke shahmepōn;

⁷ Kemōng vun akasen insang, shavun kaṭha, acacia thing;

⁸ thaihmei sik a thaitui, thai kano sik a thingdi rōdi, khana ro mankhut sik a marim katui.

⁹ Carnelean hlung leh aralak hlung mankatam hei seng hi Thempu Kalen zakkō bonga, a-ôm-mârsha a mankop sik hei kae.

Rōngpu omna Pōn-inna Hmangchâk-hei

¹⁰ “Nankâra kut kathem rakip ahong kasōk cheia Rōngpu ṭongpek rakip kha nantasyem sik kae.

¹¹ Pōn-inn achung makhu sik, avângtinga makhu sik, akōr mando sik, khana akekim hei, alaia mansurna hei, akacho hei, khana amatungna hei;

¹² Ṭongtep bôm, akadomna thingtlōn, asing, khana pinden khâr sik;

¹³ dokhâng leh akadomna sungtlōn hei, khana hmangchâk rakip; Pathen hnenga tōk sik buhlom;

¹⁴ thaihmei matungna leh ahmangchâk hei; thaihmei leh thaitui;

¹⁵ ro manhnamna sik Maichâm leh akadomna thingtlōn; kano sik a thai marim katui, Pōn-inn hlutna pinden,

¹⁶ Ro mankhutna inthoina sik maichâm leh sum-êng kahrâng akabek, akadomna sungtlōn leh ahmangchâk rakip; insina thlengkông leh amatungna;

¹⁷ Akake khumna pinden leh amakheina kachohei leh amatungna hei, akake khumna shunga hlutna pinden.

¹⁸ Pōn-inn leh akake khumna sik a thingbong phun sik leh hrui hei;

¹⁹ thempu he’n Hmun Inthenga razenna annei pha anta’nvon sik ret kalûrhei, thempu Aaron leh asapahei sik pōn intheng.”

Mipui he’n Tōk sik Anta heichoi

²⁰ Israel mipui ankhenga an-intûpna andahlon jo,

²¹ khana tu achang inum khanga a’ndon rakip in Rōngpu omna Pōn-inn sakna sik a tōkna Rōngpu hnenga anheichoi. Anmani’n heirakip kamukna hmang sik kasōk khana thempuhei invonna sik anheichoi.

²² Ankhenga tōkna kanei hnōmseng nuhmei-pase he’n, ret syemna ṭimphōi, kōrton, kutkhi hei, maṭhi, sana ajât jât anheichoia Rōngpu hneng anleitōk.

²³ Mi rakip akanei he’n hruipōn kaṭha, rahmurei, vapuirei, shahme pōnsen, ke shahmepōn, shavun kasen, a-emak leh shavun kaṭhahei seng hi anheichoia kae.

²⁴ Akatōktor rakip in dangka a-emak leh sum-êng Rōngpu sik a anheichoi, khana acacia thing kanei rakip in ṭōn tlona hmangthei rakip anheichoia kae.

²⁵ Kut kathem nupui rakip in hruipat kaṭha rahmurei, vapuirei, shahme patsen, antasyem kha anheichoi.

²⁶ Anmani’n ke shahmepat um ansyem.

²⁷ Hlamkakei he’n Carnelian, hlung mankatam leh hlung mankatam alak ôm-mârsha leh zakkō bonga mankop sik a anheichoi,

²⁸ thingdi ro sik marim katui, thaihmei sik a thaitui, kano sik a thai, ro mankhut sik a marim katui anheichoi.

²⁹ Rōngpu’n Moses hneng tlosōt sik a ṭong aleipek dungjuia Israel mipui seng in ṭōn tlona sik a antapek hnōmhnōm anheitōk a kae.

Rōngpu omna Pōn-inn Kasak sik kut kathemhei

³⁰ Moses’n Israel mipuihei hneng ahri, “Rōngpu’n Judah phunga Hur tupa, Uri sapa Bezalal akadei jo.

³¹ Pathen in aratha hratna achunga amansip pek jo, khana kut themna, tlosōt torna, khana ret ṭōn rakip manhret theina,

³² kutthem aje jât-jât mantlukna, khana sana, dangka, khana sum-êng ṭōnna tlotheina,

³³ hlung mankatam tansōtna, thinga aje syemna; khana heirakip kutthem ṭōn ralak sik a themna apek jo.

³⁴ Rōngpu’n ama leh Dan phunga inphut Ahisamak sapa Oholiab hei hnenga ankut themna, milak-hei manthei torna ratha kha apek jo hei.

³⁵ Ṭōn tlona rakip a kut themna hi ama’n anhnenga apek jo hei, thing leh hlung mazetna, aje jât-jât syemna, khana pōnkhôngna hruipōn kaṭha, rahmurei, vapuirei, shahme pōnsen, khana alak pōnhei khôngna. Anmani hin ṭōn rakip antlo tor khana kut kathemtak akasyemsōt hei kha kae.