SŌKSŌT 34 - LEKHARABU INTHENG (BSI)

Inhni Tlukna Hlungpek Inhni

¹ Rōngpu’n Moses hneng ahri, “Ahma inkei kapōa hlungpek 2 kheng roh, ahma inkeia navōkkhōi jo hlunga a’nzet kha ke’n kamazet nôk sik.

² Jînga jîngkâra intluk roh, Sinai tlânga kei leh inhmu sik a hong roh.

³ Tûte inkhat nang leh hong inṭhōithei mak tin; tlâng chunga hmun inkhatbek a mi hmuthei changmak ning, kemōng leh sehei tlângkea inkhemthei mak hei ning.”

⁴ Moses’n hlungpek 2 akhêngsa nôk jo, abânna jîngkâr hmatak a Rōngpu’n ṭong apek kapōa Sinai Tlâng ting akadom jo hei.

⁵ Rōngpu kha sumtuk a jōng kaṭumsuk a, ama leh khan kangirsap jo hei, arahming intheng Rōngpu kha ahrisōt jo.

⁶ Rōngpu kha ahmai kunga kasesōt a ahei hrisōt, “Rōngpu kei hi lungset leh maritna kasip, hnuk kanaloi mak khana lungset kalen leh taksenthei kachang eng kha kae.

⁷ Kei intepna kha khang lishing lishing katlunga kajuia kae. Akaṭhamak leh setnahei karangei mandam. Tâk-kha annu anpahei setna jâra karâkna pek sik kha antu-ansahei chunga khang 3 khang 4 katlunga mahngi mak ning.”

⁸ Moses kha inrangtak a raleia inbok a akamuk jo.

⁹ Ama’n ahri, “Rōngpu, kachunga kadiktak a namalung atlai inchu, a’nṭhōipui roh tia kangek che kae. Hiva mipuihei hi anracham kase, kha’num kanṭhat makna leh kansetna arangei mandam roh, namipui khet a alo ung roh.”

Intepna Manther Nôkna

¹⁰ Rōngpu’n Moses hneng ahri, “Ke’n tûn Israel mipuihei leh intepna inkhat kasyem sik. Vânhnōi raleichunga jât inkhatbek hnenga ala’ntlo hêrmak ṭōn kalentak Israel mipuihei hmaikunga katlo sik. Rōngpu kei ṭōn kalen tlotorna kha mi rakip in antahmu sik kae, ajârchu nangni sik a kaja ka-om tak ṭōn katlo sik kae.

¹¹ Tuninga kapek chei dânhei hi kaṭha jui ruh, ke’n Amor, Canaan, Hit, Periz, Hiv, khana Jebush-hei, nanram hlōna a inphut kahnong sōt sik hei.

¹² Nangni’n nanjōnna ram mihei leh inhnōmtōna heite neimak ruh, ajârchu khavakha nangni sik a in-ôkna châng kachang theia kae.

¹³ Khava kanek a, anmaichâm ṭhet pek hei ruh, ankacho intheng hei kha suk manhmang pek hei ruh, khana an-pathen ansehrat limhei kha tuk mathlûk pek hei ruh.

¹⁴ “Pathen ralak kamuk mak ruh, ajârchu Rōngpu ke’n ani kadōihei kha thōk hnâm tor mak eng.

¹⁵ Khava ram mihei leh inhnōmna heite neimak ruh, ajârchu an-pathenhei kamuk pha inthoina annei pha anmani’n anbek sik chei, khana an-pathenhei hneng antatōk thlai kasa sik anmathlem sik chei.

¹⁶ Nansapa he’n hiva ram hlop jōr nuhmeia anhongnei sik, anmani khan kei ṭong jui makna sik a anṭhōi sik hei khana an-pathen lak kamukna anṭhōi manhlut sik hei.

¹⁷ “Nangni’n thîr vânga pathen syem mak ruh khana kamuk mak ruh.

¹⁸ “Chephilo Buhlom Revei kani kha ser ruh. Kaṭong leipek chei kapōa Tebe thla shunga ni 7 chu Che philo buhlom kha sâk ruh, ajârchu hiva thla shunga hin Egypt nanhei dahlona kae.”

¹⁹ “Sapa a’nte hma-inkei leh ran ache a’nte hma inkeipen rakip kha keita kae,

²⁰ tâk, shakōrtung a’nte hma-inkei khachu kemōng inkhat natōk a khan vâng narachôk male sik kae. Kha achangmak inchu arîng nador thlek sik kae. Sapa a’nte hma-inkei rakip rachôk male nôk ruh. “Tûte inkhat tōkna kasea ka-âng shunga ho’nlâr mak rasoh.

²¹ “Nangni’n ni 6 nanṭōn tlona sik nannei, tâk ni 7 chang ning chu ṭōn tlomak ruh, nanhlei thlōlai achanga akara khômlai achang inum.

²² “Ahma inkeipen gehu khôm pha Sakhôm Kût nit ruh, hmuchi nankhôm hei pha Thlâm Revei the khōa nit ruh.

²³ “Pase rakip kum khat shunga vōi 3 Rōngpu, Israelhei Pathen anta hongkamuk sik eng kae.

²⁴ Jât-hei kha nanhmai kunga kahnong sōt heia nanramri kamanlensōt kahnunga hiva revei 3 nanhmang shung senga tûte inkhat in nanram rea ator mak ning.

²⁵ “Kahnenga ran vâng nan-inthoi pha chephi buhlom heitōk mak ruh. Rakan Kût a a’nthat hme inhlei jîngkâr katlunga inda mak ruh.

²⁶ “Kumtin a nantakhôm mantûp kara hma inkeipen kha Rōngpu inna heichoi ruh. “Kete achangmak leh kemōngte hei anpui netui vâng sōng mak ruh.

²⁷ Rōngpu’n Moses hneng ahri, “Hiva ṭonghei hi mazet hei roh, ajârchu hivahei hina inphut ke’n intepna inkhat nang leh Israelhei leh kasyem kae.”

²⁸ Moses kha khana khan Rōngpu leh ni 40 jân 40 sâk lo inloa leika-om. Ama’n hlungpek hei chunga khan intepna ṭong sômhei kha aleimazet a kae.

Moses Sinai Tlânga Ajōng Ṭumsuk

²⁹ Moses’n ṭongsôm kha ajōng rôna Sinai tlânga ajōng ṭumsuk pha ahmai kha kavâr hêr jo, ajârchu Rōngpu leh le’nbek heia kae, tâk, ama’n chu khavakha leimanhret mak.

³⁰ Aaron leh mipuihei seng in Moses kha anlei en khana ahmai kavâr kha anleihmu, ahnenga vahnai sik kha anleiṭit a kae.

³¹ Tâk-kha Moses’n anmani aleibek hei, Aaron leh anphung hlamkakei seng ahnenga leikase hei, khana Moses’n anhnenga ṭong aleihri.

³² Khava sōa, Israel mipui ankhenga ahnenga intûp hei, khana Moses’n Sinai tlânga Rōngpu tapek dânhei seng kha apek jo hei.

³³ Moses’n anhnenga ṭong ahrisō pha, ahmai kha pinden vâng akatōm jo.

³⁴ Moses kha Rōngpu leh inbe sik a Rōngpu Pōn-inna ahlut kataia ahmai pinden kha alosōt ria kae. Ama ahei sōk pha ahnenga hri sik a ṭong ahei pek rakip kha Israel mipuihei hneng amanthei hei,

³⁵ khana anmani’n ahmai kavâr kha anleihmua kae. Khava sōa ama’n abâna Rōngpu hneng ṭongkahri sik a Pōn-inn ahlutmak hma seng ahmai kha amakhu ri.