SŌKSŌT 32 - LEKHARABU INTHENG (BSI)

Sana Sehrat Chete

¹ Moses kha tlâng chunga inphut a heiṭum mak joa pha kasôttak khana khan aleika-om kha mipui he’n anhmu pha, Aaron hnenga hong intûp jo hei khana ahnenga anhri, “Eini Egypt a inphut ani heikaṭhōisōt Moses kha heimo kati jo manhret mak jo me, khava jâra ani kaṭhōi sik, pathen inkhat asyempek jo roh,” anti.

² Aaron in anhnenga ahri, “Nannuhmei, nansapa, nansanuhei kōr a antaton sanahei kha heisōt una kahnenga heichoi ruh.”

³ Khang’khan mipuihei khan ankōra sana rakip kha ansōt a, Aaron hneng anheichoi jo.

⁴ Ama’n kōrton kha aloa, amanjora lim syemna abun a Sehrat chete inkhat asyem jo. Mipuihei khan anhri, “Eh Israel, Egypt a inphut ani hongkaṭhōisōt pathen kha hi kae.”

⁵ Aaron khan sehrat limsyem hmatak a khan maichâm inkhat asyema khōtlâng a-ôn, “Jîng kania khin Rōngpu kajana rehōi inkhat ka-om sik,” ati.

⁶ Ajînga jîngkâr hmatak ran ṭhahrep inthoina ro manhmui sik leh inlôikhôm inthoina sik anhongṭhōi jo hei. Mipuihei kha ansâk an-ina jông leh kikna anleihmang jo.

⁷ Rōngpu’n Moses hneng ati, “Tûntak inle ina ṭumsuk jo roh, ajârchu Egypt a nahong ṭhōisōt namipuihei kaset jo hei, kei anhlonsōt jo eng.

⁸ Anmani’n antajui sik a kaṭong pek hei kha andahlon jo; sana anmanjora sehratche ansyema ankamuk jo, ahnenga inthoina antlo jo. Anmani’n khavakha Egypt a inphut anhong kaṭhōisōt an-pathen anti jo.

⁹ Hiva mihei hi hingtuk hrep anracham kase ti hi kamanhret jo.

¹⁰ Tûnchu, akhâm mak jo roh. Anchunga kahnuk kana jo, kasuk manhmang sik jo hei kae. Khava sōa nang leh nasōnhei kha jât kalena kasyem sik jo chei.”

¹¹ Tâk Moses’n Rōngpu, apathen hneng angek pek heia ahri, “Rōngpu, nahratna leh naratha neina kalen vânga Egypt a inphut nahuksōt namipuihei chunga heisik a mo hingtuk nahnuk namannat?

¹² Egypt mihe’n hing’hin nang in namihei Egypt a inphut naṭhōisōt hei leh tlâng chunga that manramna sik namantluk kae tia heisa mo antati sik che? Nahnuknat kha hai roh; namandonna kha thleng roh, namihei chunga hiva thi leh nat hi heichoi mak roh.

¹³ Nasōk Abraham, Isaac khana Jacob mandonsōt hei roh. Anhnenga ka-ôrtak a naṭong leitep, ansōn anpâr ârsi ja pek sik leh khava ram rakip ahei tik a antahlō sik hei kha mandonsōt roh.”

¹⁴ Khava jâra Rōngpu’n amalung athlenga amihei chunga ṭōnse tlo sik a maṭhitna aleinei kha tlomak jo.

¹⁵ Moses kha tlânga khan jōng kaṭumsuk jo, hlungpek 2 alangtōa ṭongpek insun hei kha ajōng choi.

¹⁶ Pathen khet in hlunghei kha asyema ṭongpek-hei kha amazet kae.

¹⁷ Joshua’n mipuihei rasa kapeng rasa kha atheia, Moses hneng, “Ṭhumhmun ting retlo rasa kathei,” ati.

¹⁸ Moses’n, “Sova peng rasa so retorna a-emak leh hmaimôkna pōmak; khiva khi hla insak kae,” ati.

¹⁹ Moses’n sehrat chete lim leh mipuihei lâm ka-en sik a ṭhumhmun ahnai manhlut a, ahnuk kana hêr joa kae. Khava tlâng panga khan ahlung jōng choi hei kha ahlon mathlâk a kakōi jo hei.

²⁰ Ama’n sehrat chete lim kha aloa, amanjora asuk mandijet a tui leh anmanhei jo. Khava sōa Israel mipuihei kha anman-in jo hei.

²¹ Aaron hneng ahri, “Hiva mihei hin heimo nachunga antatlo jo, nangni’n hingtuk a ṭit ka-om tak setna nantatlo jo hi?”

²² Aaron in amasôn, “Kachunga nahnuk mannat mak roh; hiva mipuihei hin akaṭhamak tlona sik heituk a a’ntluk hei namanhret a kae.

²³ Anmani’n kahnenga, “Eini Egypt a inphut ani hongkaṭhōi Moses chunga heimo kati jo manhret mak jo me, khava jâra nikaṭhōi sik pathen inkhat syem roh,” anti.

²⁴ An-inretna sanahei kahnenga anta heichoi sik a kangek hei, akaneihei khan ansōt heia anpek eng. Anret hei kha hmeishunga kahlon manhlut khana sehrat chete hi hong kasōksōt a kae,” ati.

²⁵ Aaron in mipuihei kha manse tor mak jo hei khana an-inrepuihei hmaikunga anbinga mikamo kachang jo hei ti kha Moses’n amanhret jo.

²⁶ Khava jâra anrephōr kot kunga kangira khōtlâng a-ôn jo, “Rōngpu langa a’nṭang seng hin hong ruh!”. Khava jâra Levihei seng ahnenga hong intûp jo hei,

²⁷ ama’n anhnenga ati, “Israel Rōngpu Pathen in nangni inkha-khat ṭong apek chei kae, nanchemjâm et inchoi ruh, hiva kot a inphut inkhat ting katlung rephōr shunga, nansōpuihei, nanṭhōnhei, nanvenhei vathat hei ruh!”

²⁸ Khava ning Levi he’n ṭong anjuia mi 3,000 kapō anleithat hei.

²⁹ Moses’n Levihei hneng, “Tuning nangni’n nansahei leh nansōpuihei nanthat hei jâra thempu changna sik intōksōt jo chei, khava jâra Rōngpu’n amaham ṭhatna kha apek jo chei kae.”

³⁰ Ajîng kania Moses’n mipuihei hneng, “Nangni’n ṭit ka-om tak setna nantlo jo. Tâk tûnhin kei Rōngpu hneng tlâng chunga hin kake nôk sik eng; nanset rangei mandamna kahmu sik mo tia kava ngek sik,” ati.

³¹ Moses Rōngpu hneng inle nôk a ati, “Hiva mipuihei hin ṭit ka-om tak setna anleitlo jo. Anmani’n sana vâng pathen inkhat anleisyema anleikamuk jo.

³² Lungset hei ina ansetna rangei mandam hei roh, tâk narangei mandam mak sik he’nchu namipuihei rahming namazet manhlutna lekharabua inphut kei rahming kha losōt jo roh.”

³³ Rōngpu’n amasôn, “Kei lekharabu inphut anrahming kalosōt sik hei khachu kei kadōia setna katlohei kha kae.

³⁴ Tûnchu se roh, kaleihri pek che ramting khan mipuihei hi ṭhōi hei roh. Kangeva’n nang hlam akei sik che mahngi mak roh, tâk mikaset-hei kha karâkna kapekna sik pha lakahong sik.”

³⁵ Khava jâra Rōngpu’n mipuihei chunga hrise ajōngtir jo, ajârchu anmani’n Aaron kha sehratte lim anlei mansyema kae.