SŌKSŌT 31 - LEKHARABU INTHENG (BSI)

Rōngpu omna Pōn-inn kasak sik Mihei

¹ Rōngpu’n Moses hneng ahri,

² “Ke’n Judah phunga Hur tupa, Uri sapa Bazalel kha kakadeisōt jo,

³ karathahrat achunga kamansip pek jo: manhret theina, kut themna, tlotorna, aret syemsōt torna ṭōn rakip,

⁴ kathemtak a aret mantlukna, khana sana, dangka, khana sum-êng ṭōn tlona;

⁵ mankop sik hlung mankatam tansōtna; thinga lim mazetna; khana ret syemna ṭōn ralak-hei seng sik a.

⁶ Ama leh ṭōn katlosap sik a, Dan phunga Ahisamak sapa Oholiab kakadei jo. Ke’n aralak kut kathem ṭōnkatlo rakip hneng tlotorna kalentak kha kapek jo hei, ke’n syem sik a ṭong kapek rakip kha ansyem torna sik a kae:

⁷ ka-omna Pōn-inn, Ṭongtep Bôm leh achung singna, khana Pōn-inn shunga neinâk seng,

⁸ dokhâng leh ahmangchâk hei, thaihmei matungna sana intheng leh ahmangchâk rakip, marim katui ro mankhutna maichâm,

⁹ ro-inthoina maichâm leh ahmangchâk rakip, insina thlengkông leh amatungna,

¹⁰ Aaron leh asahei thempuhei invonna kalûrhei, thempu ṭōn antlo pha hmang sik hei,

¹¹ manthi sik sahrik, Hmun Intheng sik a marim katui hei seng hi kae. Hihei rakip syemna hin kei tamanthei hrep kha antatlo sik kae.”

Châmhngat Kani

¹² Israel mipuihei hneng hri sik a, Rōngpu’n Moses hneng ṭong apek,

¹³ “Kachâmhngatna, Châmhngat kani hi nit ruh, ajârchu Rōngpu ke’n, nangni kami kamanchang jo chei ti hi chîkna sik a kei leh nangni kâra ahei tik chenna malârna inkhat kae.

¹⁴ Châmhngat kani hi nantanit nger sik kae, ajârchu hivahi a’ntheng kae. Tu achanga akanit mak, khava ninga ṭōnkatlo kha that sik kae.

¹⁵ Nangni’n ṭōn tlona sik ni 6 nannei, ni 7 changna khachu kei hneng a’npesōt jo ka-ôrtak a châmhngatna kani kae. Tu achang inum khava kani ninga ṭōnkatlo khachu that sik kae.

¹⁶ Israel mipui in hiva kani hi ṭongtep mêrchîkna inkhat a antanit sik kae.

¹⁷ Hivahi inthleng loa kei leh Israel mipui kâra mêrchîkna kachang sik, ajârchu Rōngpu ke’n marvân leh ralei ni 6 shunga kasyem, ni 7 changna kaṭōn kabânga châm inhnga enga kae.”

¹⁸ Sinai tlânga Pathen in Moses hnenga aṭong hri achai pha, Pathen khet in hlungpheng inhnia ṭongpek amazet kha apek jo.