SŌKSŌT 29 - LEKHARABU INTHENG (BSI)Aaron leh Asahei Thempu changna sik Matungsōtna ( Lev 8.1–36 ) 1 “Kei ṭōn tlona thempu changna sik mantheng sōtna Aaron leh asahei chunga natlo sik kha hi kae. Sehratche kadông inkhat leh kemōng ache 2 nōrna kase hei hmang hei roh. 2 Gehu jâmdi akaṭhapen hmang roh, che inveilo ning, olive thai vâng buhlom ṭhahrep syem roh, ṭhahrep chu thai inveiloa, khana ṭhahrep chu thai ajing kanoa biscuite kapōa syem heiroh. 3 Sehrat chete leh kemōngchehei vâng inthoina ṭōn natlo lai, buhlomhei kha hrai inkhat vâng heichoi ina kahnenga tōk roh. 4 “Aaron leh asahei kha ka-omna Pōn-inn hlutna kot hma heiṭhōi heiroh, beklanga tui insina sik hripek hei roh. 5 Khava sōa Aaron kha thempu von zakkō, zakkō bong shungtinga inhak sik zakkō inse, zakkō bong, ôm-mârsha, khana khōnkir manvon heiroh. 6 Achunga lukôm kha mankôm roh, khava chunga khan atōksōtna manhretna a’ntheng chîkna, ‘Rōngpu hneng Inpesōt,’ tia a’nzet kha khitpek roh. 7 Khana thai kano sik kha lo ina alu chunga bun roh, khana kano roh. 8 “Asahei kha heiṭhōi hei ina zakkō manhak heiroh; 9 tingsōi ankhôna mannei heiroh, khana anlua lukhu mankhu heiroh. Khang’khan Aaron leh asahei kha manthengna tlo hei roh. Anmani leh ansōn anpâr he’n ahei tik a thempu kachang heia kei razenna antatlo sik kae. 10 “Sehratche kha ka-omna Pōn-inn hnenga heiṭhōi roh khana Aaron leh asahei hneng khava sehratche luchunga ankut andana sik hri roh. 11 Se kha ka-omna hmun intheng Pōn-inn hlutna hma khan that roh. 12 Sehrat thisen kha ahlek lo ina maichâm hmor kasonga khan nakut maṭai vâng kano roh. Khava sōa a’nhlei kha maichâm kunga bun roh. 13 Abâna, ashung alaia athai, amaṭhin akaṭhapen ahlek, amake 2 leh khava chunga athai hei kha maichâma kei hneng inthoina ro manvâm roh. 14 Khana aravōi leh avun khana akari seng chu rephōr vângting ro manvâm roh. Khavakha thempuhei set rangei mandamna inthoina kha kae. 15 “Kemōngte inkhat kha heikei ina alu chunga Aaron leh asa he’n ankut andana sik anhnenga hri roh. 16 That roh, athisen kha maichâm rakir manlia kathek roh. 17 Kemōng kha rachen roh; ashung alaia hei kha leh arakō hei kha sôp heiroh, khana alu leh ataksahei chunga da heiroh. 18 Kemōngche kha apum a maichâm chunga thlai inthoina ro roh. Hiva inthoina hmui marim hin kei amantlai eng kae. 19 “Kemōngche ahlop kha heikei roh, mantheng sōtna hmang sik kae, Aaron leh asahei khan alu chunga ankut andana sik manthei heiroh. 20 That roh, athisen ṭhahrep lo ina Aaron leh asahei changtinga ankōryâma, anchang tinga ankutpuia, anchang tinga anke puia thisen kha kano pek heiroh. Thisen a’nhleiseng kha maichâm rakir manlia kathek roh. 21 Maichâm chunga thisen ajing leh kano sik thai kha inlo roh, manhei ina Aaron chunga leh apōnsihei chunga kathek khum roh. Khan chu Ama, asapahei, anpōnsi hei kei hneng a’npek sōt sik jo hei kae. 22 “Kemōng thai kha âttan roh, arahmei thaina, athai takatōm ashung alaia hei, amathin kaṭhapen ahlek, amake 2 leh achunga athai, khana achang tinga arakō lo roh. 23 Kei hneng a’ntōksōt buhlom hraithuk a inphut, buhlom jât rakip a inkhat et lo roh: Olive thai vânga ansyem, thai kasea ansyem khana biscuite a ansyem. 24 Sâk leh in rakip kha Aaron leh asahei kut chunga da roh, ahlopdet kutchoi inkhat a kahnenga antōkna sik a hripek heiroh 25 Khava sōa ankut chunga inphut inlo roh, ro-inthoina chungchôna, kahnenga thlai inthoina inkhat a maichâm chunga romanvâm inthoina roh. Hiva inthoina hmui marim hin amantlai eng kae. 26 “Kemōng ôp kha lo roh kahnenga kutchoi akaṭhachet inkhat a heitōk roh. Hiva ṭhen hichu nang chen sik kae. 27 “Thempu inkhat hi ṭōn manrônna a-om pha, kemōng a-ôp leh arakō kha kutchoi akaṭhachet inkhat a kahnenga natatōksōt sik kae khana thempu sik a nanta ṭhensōt sik kae. 28 Hivahi inthlengtik neilo kaṭong mathlâk kae khachu kamipui he’n inlôikhômna inthoina antlo pha, ran ôp leh arakō kha thempuhei ta akachang sik kae. Hivahi Rōngpu kei hneng mipuihei kutchoi pekna kha kae. 29 “Aaron athisō leh ama thempu von hei kha asahei hneng apek sik hei kae, ṭōn manrônna anchen pha anta’nvon sik kae. 30 Ka-omna Pōn-inn shunga Hmun inthenga sepa katlo sik a ahong kahlut Aaron thempu kathleng asapa khan hiva invonna hi ni 7 a’nvon sik kae. 31 “Aaron leh asahei ṭōnhmun hlōna a’nhmang kemōng ravōi kha lo roh; khana hmun inthenga khan sōng roh. 32 Ka-omna Pōn-inn honghlutna tak a hraithuk shunga buhlom inhlei kha leh antasâk sik kae. 33 Anmani’n beklanga rangei mandamna inthoina hmangchâk-hei kha ṭōnhmun mantung ning antasâk sik kae. Hiva thlai hi thempuhei rōk in ansâk thei sik, ajârchu a’ntheng thlai kae. 34 Hme achanga buhlom achang innum a’nhlei a-om inchu jîngkâra chu sâk yamak ning, romanvâm inthoina sik kae; hivahi sâk sik changmak, ajârchu a’ntheng kae. 35 “Aaron leh asahei sik a ṭōnhmun a mantungna ṭōnhlam kha kaṭong pek che dungjuia ni 7 shunga tlosōt roh. 36 Ani tina nang in sehratche inkhat inthoina sik a napek sik kae, set rangei mandamna sik a kae. Hivahin maichâm amantheng sik kae. Khava sōa manthengna sik a olive thai vânga kano roh. 37 Hiva ṭōn hi ni 7 shunga ani katai tlo roh. Khan chu maichâm kha pui katluk a intheng sik jo. Khana heikhat in avatôn masuk inchu khavakha hiva inthengna hin asukset sik kae. Ani tina Inthoinahei ( Mj 28.1–8 ) 38 “Anitina apha rakip a kum khat katluk kemōngte 2 maichâm chunga inthoina natōk ṭhak sik kae. 39 Kemōngte inkhat kha jîngkâra sik, inkhat khan khōhleia sik kae. 40 Ahma inkei kemōngte intōk kha leh gehu jâmdi kilograme inkhat khana olive thai intheng litre inkhat leh manhei roh. Khana vomhrui theiju litre inkhat inthoina sik a sunsōt roh. 41 Kemōng inhnina kha khōhleia tōk roh, khana jîngkâra kha leh in-anghrep a jâmdi, olive thai, khana vomhrui theitui tōk sik kae. Hivahi sâk leh in Rōngpu kei hnenga tōkna kha kae, khana ahmui marim khan amantlai eng kae. 42 Hiva ro manhmuina inthoina hi ka-omna Pōn-inn honghlutna khan ka-ângkunga ahei tik a nantatōk sik kae. Khava khan kamipuihei ka’nhmupui sik hei khana nahnenga ṭong kahri sik kae. 43 Khava khan Israel mipuihei ka’nhmupui sik hei khana ka-omna vâr kadi khan ahmun kha amantheng sik kae. 44 Ke’n Pōn-inn leh maichâm kha kaman theng sik kae; khana Aaron leh asahei kha thempu anchang leh anirazenna sik kaṭhensōt sik hei kae. 45 Kei kamipui Israelhei kâra ka-om sik eng, khana an-Pathen kachang sik eng. 46 Anmani kâra ka-om theina sik a Egypt ram a inphut ankaṭhōisōt an-Rōngpu an-Pathen kei hi anmanhret sik jo eng. Kei an-Rōngpu an-Pathen eng kae. |
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
Bible Society of India