SŌKSŌT 27 - LEKHARABU INTHENG (BSI)

Maichâm

¹ “Maichâm inkhat acacia thinga syem roh. Adung avai 2.2 metre, khana a’nshâng in 1.3 metre sik kae.

² Achung intong rakir manlia araki mansong heiroh. Maichâm kha leh inmat a pumkhat akachang sik hei kae, khana akhenga khan sum-êng mantōmsō pet sik kae.

³ Thai kakop jo ravut dana sik khanga syem heiroh, khana ravut lōkna, thlengkam, sungthi kōikim, ratap khângbe syem heiroh; hmangchâk-hei hi sum-êng vâng nasyem sik hei kae.

⁴ Sum-êng vânga kahrâng syem roh, arakir heia akadomna sik akōr sum-êng vânga syem heiroh.

⁵ Kahrang kha maichâm hmor thōia pha roh, kahrang khan maichâm kimvea atlungna sik.

⁶ Akadom lelena sik acacia thingtlōn syem heiroh, khahei kha sum-êng vâng katōm heiroh,

⁷ khana maichâm asir inhnia akōrheia khan akadom sik jo pha sungtlōn kha kathi ina mando roh.

⁸ Maichâm kha thingpek vânga syem roh, ashung kha manve roh. Tlâng chunga kamanhmu che ṭōnmantluk kapōtak a sik kae.

Rōngpu Omna Pōn-inn Kekhumna

⁹ “Ka-omna Pōn-inn hi Pōn innem pinden vâng kurkhumna syem roh. Thlâng tinga pinden kha adung metre 44 sik kae,

¹⁰ amakheina sik sum-êng kacho 20 kha amatungna sum-êng kōklei 20 leh a’nṭhōi sik kae, khana amakheina kha dangka kōikim leh sungtlōn sik hei kae.

¹¹ Khang tlit khan sak intongtinga sik a’m natlo sik kae.

¹² Tlaitlâk intongtinga sik a chu pinden kha adung metre 22 sik, kacho 10 leh amatungna 10 leh.

¹³ Nisō intongtinga, honghlutna khan, akakurna pinden avai metre 22 sik kae.

^14-15 Honghlutna alang-langa pōnzâr kha metre 6.6 kae sik, kacho 3 thum, amatungna kōklei 3 thum sik kae.

¹⁶ Honghlutna kot a pinden kha adung metre 9 hruipat innem rahmurei, vapuirei sahme kasen pat vânga a’nkhông sik, khana kutthem limret mankop sik kae.

¹⁷ Akakurna kimvea rape kachohei kha dangka thirtlōn vânga mansur sik, ankoikim hei kha dangka vânga syem sik, khana an-intungna kōklei kha sum-êng vânga syem sik kae.

¹⁸ Khava kakursina dung kha metre 44, avai metre 22, a’nshâng metre 2.2 kae sik. Pindenhei kha hruipat innem vâng syem sik, khana amatungna kōklei kha sum-êng vâng syem sik kae.

¹⁹ Pōn-inna hmangchâk-hei, thingphun rakip hei, khana Pōn-inna hmangchâk-hei sum-êng vânga syem sik hei kae.

Thaihmei Katinta

²⁰ “Israel mihei hneng olive thai intheng anheichoi etna sik ṭong pe heiroh, khōhlei kataia detna sik.

²¹ Aaron leh asa he’n ka-omna Pōn-inn shunga pinden vângting khana Intepna Thingbôm hmatak a thaihmei kha antadet sik kae. Kei omna khan khōhlei leh jîngkâr antadet sik kae. Hiva ṭongpek hi Israelhei leh ansōn anpâr he’n ahei tik a antajui sik kae.