SŌKSŌT 26 - LEKHARABU INTHENG (BSI)

Rōngpu Omna Pōn-inn

¹ “Kei omna sik Pōn-inn, a’ntheng Pōn-inn ashung intong kha, shahmepat rahmurei, vapuirei, khana akasen vânga a’nkhông hruipōn innem aralak 10 vânga syem roh. Mathla kanei ranhringhei lim mankopsa roh.

² Khava pōnlâk hei kha asin alen man-ang heiroh, adung metre 12 avai metre 2 sik kae.

³ Khava pōnlâk hei kha 5 et a kaṭhui manchun heiroh.

⁴ Avâng intong pōnlâk hei hmora khan rahmurei pōn vânga amakheina akōr syem heiroh.

⁵ Ahma inkei pinden a aphutna pōnlâk a khan amakheina sik akōr 50 khana hi leh intōk a 2 changna pinden a achaina pōnlâk tlit a kha’num amakheina sik akōr 50 syem roh.

⁶ Khava pinden 2 hei kha inkhat a mansur manchun theina sik sana vânga kōikim 50 syem heiroh.

⁷ “Khava Pōn-inn kha aphuchung makhuna sik ke hme pōn a’nkhông aralak 11 vânga syem roh.

⁸ Ankhenga ansin anlen in-anghrep a, andung metre 13, anvai metre 2 et a syem heiroh.

⁹ Pōnlâk 5 kha pinden inkhat a kaṭhui mankop roh, khana pōnlâk karuk nôk khan ahlop pinden inkhat sik a kaṭhui mankop roh. Pōnlâk karuk changna khachu thlep hnia thlep roh khana Pōn-inn hmai kha makhuna roh.

¹⁰ Pinden inkhat a a’nchaina pōnlâk hmora khan amakheina akōr 50 mando roh, ahlop inkhat nôk hmora khan akōr 50 mando nôk roh.

¹¹ Khana sum-êng vâng kōikim 50 syem roh khana khahei kha akōr kave heia khan mansur hei ina pinden 2 hei kha amakhuna sik inkhat rōk a syem roh.

¹² Khava sōa pōnlâk ahar inhlei kha Pōn-inn chôrting khan makhei roh.

¹³ Khana centimetre 50 alang-langa a’nhleihei kha Pōn-inn apang makhuna sik a makhei heiroh.

¹⁴ “Achung makhuna sik 2 syem nôk heiroh, inkhat in kemōng vun akasen rei machu vânga insang, inkhat in shavun kaṭha innem vânga, avângtinga amakhuna kachang sik a kae.

¹⁵ “Pōn-inn dôna acacia thing vânga manngir sik kekim kha syem heiroh.

¹⁶ Thingdo kekim inkha-khat kha metre 4 adung leh centimetre 66 akhang sik kae,

¹⁷ kekim abân bâna mando hei kha mansur manmat theina sik heia ahmor 2 et intōk a mansong sik hei kae. Kekim mandona rakip a hiva thing hmor kasong aka-om et sik kae.

¹⁸ Thlang ting intonga kekim 20 syem roh

¹⁹ khana kekim inkhat thōia matungna kōklei 2 et, kekim inkhat leh inkhat thing hmor kasong 2 kha akasur inmat sik a dangka matungna kōklei 40 syem roh.

²⁰ Khang tlit a Pōn-inn sak ting intonga sik kekim 20 syem roh

²¹ khana akekim thōia amatungna 2 et sik a dangka kōklei 40 syem roh.

²² Pōn-inn chôra tlaitlâk tinga sik kekim 6 syem roh,

²³ arakir hei sik a kekim 2 syem roh.

²⁴ Hiva arakir kekim hei kha athōia inphut manmat heia achung katlunga mansur sik hei kae. Arakir 2 syemna kekim 2 hei kha hing’hin a’nsyem sik kae.

²⁵ Achang jâra kekim 8 khana an-intungna dangka kōklei 16, ti chu kekim inkhat a amatungna 2 et aka-om sik kae.

²⁶ “Pōn-inn apang inkhat a kekim hei mankeina thingtlōn 5 et ka-om sik, acacia thingtlōn 15 syem roh.

²⁷ Apang inkhat tinga kekim hei mankeina thingtlōn 5, tlaitlâk tinga, kahnung intonga, kekim hei mankeina 5 aka-om sik kae.

²⁸ Alaiṭimtak a aka-om mankeina thingtlōn khachu kekim alaitak a katlân sik, Pōn-inn ahmor inkhat a inphut inkhat a akatlung bit sik kae.

²⁹ Kekim hei kha sana vânga makhu heiroh, khahei kha mankeina thingtlōn mansurna sik a sana kōr mando heiroh, mankeina thingtlōnhei hi’m sana vânga katōm sik hei kae.

³⁰ Tlâng chunga nahnenga ṭōnmantluk kamanhmu che dungjuia Pōn-inn kha matungsōt roh.

³¹ “Hruipōn innem pinden inkhat, rahmurei, vapuirei, khana sahme kasen pat inthlur vâng a’nkhônga khan syem roh. Khavakha mathla kanei ranhring lim mankopsa roh.

³² Khavakha sana vânga a’ntōm acacia thing kacho 4, akōr mando inna khana a’ntungna dangka kōklei shunga manngir inna, makhei roh.

³³ Pōn-inn shunga khan kōikim in-gôr hei kha mansur hei inna pinden kha makhei roh, khana pinden kahnungting khan Intepna Thingbôm, ashunga hlungpek 2 ka-om kha da manhlut roh. Pinden khan Hmun Intheng kha leh Hmun Inthengpen kha akhartan heia aṭhen sik hei kae.

³⁴ Intepna Thingbôm chunga amakhuna asing kha da roh.

³⁵ Hmun Inthengpen vâng intonga Pōn-inn sak ting dokhâng kha da roh khana thaihmei matungna khan thlang ting da roh.

³⁶ “Pōn-inn hlutna tak a pinden kha rahmurei, vapuirei leh akasen shahmepat inthlur vânga a’nkhông hruipōn innem vânga syem roh khana achunga limret mankopsa roh.

³⁷ Hiva pinden makheina sik a acacia thing kacho 5 sana vânga katōm sik khana sana kōikim mando sik kae; hihei matungna sum-êng kōklei 5 syem roh.