SŌKSŌT 25 - LEKHARABU INTHENG (BSI)

A’ntheng Pōn-inn sik a Tōknahei

¹ Rōngpu’n Moses hneng ahri,

² “Israel he’n kahnenga tōkna inkhat antanei sik a manthei heiroh. Tu inkhat, akapek hnōm tōknahei kha rahlâng roh.

³ Khava tōkna sik hei khachu sana, dangka, khana sum-êng;

⁴ hruipōn innem, rahmurei, vapuirei khana sahme pōnsen; khana ke hme kasen vâng ansyem;

⁵ kemōng vun rei kasen a’nsang; shavun kaṭha, acacia thing;

⁶ thaihmei sik a thaitui; innona sik a thai leh romanhnam sik a maru-marâng hei;

⁷ Thempu Kalen jakkō kabonga leh a-ôp a mârsha a carnelian leh alak hlunghei ret mankop sik hei kae.

⁸ Kei ankâra ka-om theina sik mipui he’n kei sik a a’ntheng Pōn-inn inkhat antasyem nger sik kae

⁹ Ke’n kamanhmu sik che mantlukna dungjuia khavakha leh mankopsa sik rakip hei kha syemsōt hei roh.

Ṭongtep Bôm

¹⁰ “Acacia thinga inphut bôm in-khat, adung centimetre 110 kasei, avai centimetre 66 kalen, khana a’nshâng centimetre 66 syem roh.

¹¹ Bôm kha ashung avâng sana intheng vâng katōm roh khana akimve kha sana vâng kekhum pet roh.

¹² Khava akadomna sik a sana vâng akōr 4 syem roh, khavakha ake manlia mankop hei roh; alang inkhat a akōr inhni-hni mankop roh.

¹³ Akadomna sik acacia thingtlōn 2 syem inna khahei kha sana vâng katōm hei roh

¹⁴ khana abôm vei leh changa akōrheia kathi hei roh.

¹⁵ Khava sungtlōn hei kha akōra a’ndothang sik hei kae, losōt sik changmak jo hei.

¹⁶ Khava sōa bôm shunga khan hlungpek 2 chunga dân ṭongpek inzet ke’n nang hnenga kapek sik che kha da roh.

¹⁷ Sana inthengtak vâng akamna asing adung in centimetre 110, avai in centimetre 66 syem roh.

¹⁸ Mathla kanei ranhring 2 sukmantheng jo sana vâng syem roh.

¹⁹ Akamna asing hmor et a da heiroh. Akamna asing kha leh rabek mankop thang sik a syem heiroh.

²⁰ Ranhring 2 hei kha anhmai a’nhnget sik hei, akamna asing kha anmathla antazar khum sik kae.

²¹ Hlungpheng 2 hei kha ashunga thōn heiroh khana thingbôm sing khan achunga kamna roh.

²² Khava hmun a khan Ke’n ka’nhmupui sik che, ranhring 2 hei kâra thingbôm sing chunga Israel mipuihei sik a kadân rakip kha kapek sik che kae.

Pathen hnenga Buhlom tōkna Dokhâng

²³ “Acacia thing vâng dokhâng inkhat syem roh. Adung 88 centimetre, akhang 44 centimetre khana a’nshâng 66 centimetre kae sik.

²⁴ Khava dokhâng kha sana intheng vâng katōm roh, khana akham kha sana vâng kim roh.

²⁵ Akham kha 75 milimeter a’npek akimvea syem roh, khava ahmora akimve kha sana pek mantlân roh.

²⁶ Arakir manlia ake omna heia akadomna sik akōr 4 sana vâng syem roh.

²⁷ Dokhâng kadomna sik a sungtlōn thōnna akōrhei kha akham vena mando sik kae.

²⁸ Acacia thing vânga sungtlōn hei kha syem roh khana sana vâng katōm heiroh.

²⁹ Ju inthoina hmang sik a thleng, be, khana kōkleihei, syem heiroh. Hihei seng hi sana intheng vâng syem sik kae.

³⁰ Dokhâng hi Intepna Bôm hma namatung sik kae, khana dokhâng chunga khan kahnenga buhlom intheng natōk kha daṭhak sik kae.

Thaihmei Matungna

³¹ “Thaihmei matungna kha sana intheng vânga syem roh. Angîrna leh akung kha sukmantheng jo sana vâng syem roh; aret reipâr, adônther leh aparbō hei pumkhat a rabek mankop pet sik hei kae.

³² Thaihmei matungna kha abâk 6, vei leh changa 3 et aka-om sik kae.

³³ Abâk 6 hei kha ret reipâr, dônther leh apâr, abōhei inveina almond a’nhmōm jo kapō 3 et antanei sik kae.

³⁴ Thaihmei matungna kung khan ret reipâr, adônther leh apârbō hei inveina almond a’nhmōm kapō 4 anei sik kae.

³⁵ Abâk akop 3 hei thōi et a khan dônther inkhat et aka-om sik kae.

³⁶ Dônther hei, abâk-hei khana thaihmei matungna kha sana inthenga a’nkheng a’nmat, pumkhat akachang sik hei kae.

³⁷ Thaihmei matungna sik a khan thaihmei 7 syem ina det heiroh, ahmating aser manvârna sik.

³⁸ Athleng pher leh acheiche hei kha sana intheng vâng syem roh.

³⁹ Thaihmei matungna kung leh ahmangchâk hei seng syemna sik kha sana intheng kilograme 35 hmang roh.

⁴⁰ Tlâng chunga kamanhmu che mantlukna dungjuia syemna sik insing thei roh.