SŌKSŌT 24 - LEKHARABU INTHENG (BSI)

Intepna kha Merchîkna A’nnam

¹ Rōngpu’n Moses hneng, “Ka-hnenga tlâng chunga nang leh Aaron, Nadab, Abihu khana Israel hlamkakei 70 hei leh hongke ruh; nangni kahlajap a nan-omlai kei kamukna sik a inkun ruh.

² Alak tûte inveiloa nang rōk kahnenga akahong sik che kae. Mipuihei chu tlâng chung kapha ahong kake mak sik hei kae.”

³ Moses kasesōt a mipuihei hneng Rōngpu ṭongpek leh chôndân sik rakip kha aleimanthei hei khana mi rakip hei khan, “Rōngpu’n ahri rakip kha kantlo sik,” tia anleimasôn.

⁴ Moses khan Rōngpu ṭongpek rakip kha aleimazet jo. Ajîng jîngkâra tlângkung tak a khan maichâm inkhat aleisyema Israel phung 12 hei sik a hlung 12 aleimatunga kae.

⁵ Khava sōa ama’n retherhei atir heia anmani’n Rōngpu hneng inthoina anro jo khana inlôikhômna inthoina sik sehrat ṭhahrep anleitōk jo.

⁶ Moses’n ran thisen kha a’nloa aṭimkhat thlengkam inkhat a ada jo; aṭimkhat chu maichâm hmating akathek a kae.

⁷ Khava sōa intepna lekharabu, shunga Rōngpu ṭongpek a’nsun hei kha aloa mipuihei hneng kare inshângtak a atei pek hei. Anmani’n, “Keini’n Rōngpu kha kanjui sik khana aṭongpek rakip kha kantlo sik,” anleiti.

⁸ Khava sōa Moses khan thlengkam shunga thisen kha aloa mipuihei chunga aleikathek thlōn jo hei. Ama’n aleiti, “Rōngpu’n hiva ṭongpek rakip hei hi aleipek chei pha ama leh nangni intepna chunga akirkhumna thisen kha hi kae.”

⁹ Moses, Aaron, Nadab, Abihu leh Israel hlamkakei 70 hei kha tlâng kake jo hei

¹⁰ khana Israelhei Pathen kha anvahmu jo. Akepha kha sapphir hlung kechōnna ka-ang, bōirōk vapuirei kapōhrep kae.

¹¹ Pathen khan hiva Israel hlamkakeihei hi sukset mak hei; anmani’n Pathen kha anleihmu, khana khava sō leh ankhenga anleisâk anlei in joa kae.

Sinai Tlâng Chunga Moses

¹² Rōngpu’n Moses hneng, “Tlâng chunga kahnenga hongke roh, khana nang in hinahin na-omlai, mipuihei mansena sik a ke’n kamazet jo dân rakip a’nsun inhlut hlungpek 2 kapek sik che,” ati.

¹³ Moses leh a’nṭangpui Joshua intluk jo hei, khana tlâng inthenga akake kha Moses’n aleiphut jo

¹⁴ Moses’n hlamkakeihei hneng, “Keini kanjōng inle mak hma seng rephōra hin aleihngak ruh. Aaron leh Hur in anleiompui sik chei; nankâra innâk-inse aleiom jôn’um ṭong chaina sik anhnenga leikase thei sik chei,” ati.

¹⁵ Moses kha Sinai Tlâng chunga kake jo khana sumtuk khan akatōmsi jo.

^16-17 Tlâng chunga Rōngpu omna khan vâr kadi rik-rak kha jōng kaṭum jo. Israelhei khan chu vâr kha tlâng lera hmei kasûk kapōa anleihmu. Sumtuk khan tlâng kha ni 6 katlung amakhusi, khana ni 7 ning khan Rōngpu’n Moses kha sumtuk kâra inphut aleibek jo.

¹⁸ Moses kha tlâng chunga sumtuk shunga khan leikaketou jo. Khanna khan ni 40 jân 40 leika-oma kae.