SŌKSŌT 23 - LEKHARABU INTHENG (BSI)

Ṭongtan kadik leh Ôtum kaneimak

¹ Ṭong kadikmak a’nhri kha majôm mak ruh, khan chu akadik mak sâkhi vânga akaṭhe mi inthōpui mak ruh.

² Mi katam lang in dikmak antlo pha, a-emak leh ṭongtan kadik kha akadik mak a anmahe pha juimak hei ruh.

³ Misara inkhat ṭong tanna a-om pha teitômna malârmak ruh.

⁴ “Naka-en indapa se a-emak leh shakōrtung akatlân inhmang nan-hmu’nchu, ahnenga ṭhōimale pek ruh.

⁵ Ashakōrtung aphurhrik in ade mathlûk nanhmu’nchu, shakōrtung kha akea angir nôkna sik a inthōpui ruh; dahlon hnâm mak ruh.

⁶ “Misara inkhat ṭong tanna hmun a ahong ngir pha akadik hnōmlo kha tlomak ruh.

⁷ Dikmak a mi themmô pek mak ruh, khan chu ṭhena kaneimak mi that mak ruh, ajârchu khang khava ṭōnse katlosōt tu inkhat kha ke’n masetna kapek sik kae.

⁸ Rirûk a sêr pekna lo hêrmak ruh, ajârchu rirûk pek hin akadik a inphut mi hmit amancho khana ṭhenakase hei asuk manset heia kae.

⁹ “Ramlak mihei kha tlomanrim mak hei ruh; ajârchu ram hlop mi inkhat chang kha heikhong mo kati nangni’n nanmanhret, ajârchu nangni Egypt a ram hlop mi aleikachang chei kae.

Kum Sari Tlukna leh Ni 7 Tlukna

¹⁰ “Kum ruk shunga nanhlei heia hmuchi vor ruh khana akara kha lōk hei ruh.

¹¹ Tâk kum 7 changna khachu hlei kha inhnga rasoh, khana ahong kakek heikhat kha lōkmak ruh. Khanna ahong kakek hei kha sara he’n ansâk thei sik, khana a’nhlei kha ramsha he’n ansâk thei sik. Navomhrui rahōn leh olive thing kara kha’m khanga tlo hei ruh.”

¹² “Kani vekhat a ni 6 ṭōn tlo ruh, tâk ni 7 tluk ning chu ṭōn tlomak ruh, khanga nansōk-hei, ram hlop mi nanṭōn katlohei leh nanranhei kapha’m châm a’nhnga sik hei kae.

¹³ “Rōngpu, ke’n kahri hei seng hi rangei ruh. Aralak pathenhei hneng derna neimak ruh; arahming bek um phamak ruh.

Revei Kalen Inthum

¹⁴ “Kum khat a revei 3 kei kajana hmang ruh.

¹⁵ Egypt a inphut nanhong sōksōtna Tebe thla shunga kaṭong leipek jo chei dungjuia Che philo Buhlom Revei hmang ruh. Khava ni 7 revei shunga khan che inphia buhlom ansyem heikhat sâk mak ruh. Tōk sik heikhat choiloa kei kamukna sik a hong hêrmak ruh.

¹⁶ “Sakhôm nanphut pha Thlâm Revei nit ruh. Vomhrui rahōn leh thei rahōn heia theikara namantûp pha ṭhelaia Thlâm Revei nit ruh.

¹⁷ Akum katai hiva revei 3 nitna nanpase rakip Rōngpu, nan-Pathen kei kamukna akahong sik hei kae.

¹⁸ “Nangni’n kei hneng ran inkhat inthoina nannei pha, che inphi buhlom leh heitōk mak ruh, khava revei laia inthoina a’ntōk hmethai kha ajînga jîngkâr katlung nantada mak sik kae.

¹⁹ “Akum katai Rōngpu nan-Pathen inna ahma inkeipena nantalōk karahei kha heichoi ruh. “Kemōngte achanga kete achanga apui netui vâng sōng mak ruh.

Ṭongtep leh Mansenahei

²⁰ “Ke’n, kamantluk pek chei hmun kajōna nasena nanhma nankahrung sik leh nankaṭhōi sik ngeva inkhat kahongtir pek sik chei.

²¹ Ama kha malung kahluttak a rangei ruh khana aṭong jui ruh. Ama kha indōipui mak ruh, ajârchu ama kha kajōngtir jo kae, khana ama kadōihei kha rangei mandam mak hei ning.

²² Tâk ama ṭong nanjuia khana kei ṭongpek rakip nanjui inchu, ke’n nan-inrepui heirakip re katukpek sik chei.

²³ Kan ngeva kha nanhma kase sik a kha Amorhei, Hit-hei, Periz hei, Canaanhei, Hivhei, Jebush-hei, ram a aṭhōi sik chei khana ke’n anmani kasuk manhmang sik hei.

²⁴ An-pathenhei hma inkun mak ruh emak leh kamuk mak ruh, khana anbek chônngai kha tlopek mak hei ruh. An-pathenhei kha suk manhmang hei ruh khana anhlung chopui intheng hei kha suk thleksō pet hei ruh.

²⁵ Nangni’n Rōngpu nan-Pathen kei hi nankamuk eng inchu, sâk leh in vâng kapek sik chei khana nat leh sat rakip kalosōtpek sik chei.

²⁶ Nanram shunga nuhmeihei nai inset a-emak leh akaching om mak hei ning. Ke’n hringkhōsei kapek sik chei.

²⁷ “Nan-indōipui he’n kei anṭitna sik enga katlo sik. Re na’ntukpui hei hneng malung inhmakna katlo pek sik hei, khana nankadōihei rakip kha ankahnung kamanle heia nangnia inphut kamantlân sik hei kae.

²⁸ Nankadōihei kha ṭit inhmakna shunga kada sik hei; nangni’n nanhma nannam chenna Hiv, Canaan, khana Hit-hei, kahnong kachek sik hei.

²⁹ Anmani ankhenga kum khat shunga hnongsōt mak hei ning; khanga katlo’nchu ram shung kha ramhâng hongkachang sik a kha, ramsha hong katam rei sik hei, nangni sik a hōimak ning.

³⁰ Khava kanek a, ajing ajînga kahnong sōt sik hei, nangni nanhong tamdet joa aram kha nanhlōsō pet hma seng.

³¹ Ke’n nanramri Agaba tui inkhōra inphut Mediterranean tuipui khana nêrdiram inphut Euphrates tuidung katlung kamanlensa pek sik chei. Ke’n ram shunga ka-om hei seng chunga ratha neina kapek sik chei khana nanhma nannam chenna nanhnongsōt sik hei.

³² Anmani leh khana an-pathenhei leh inhnōmtōna heite neimak ruh.

³³ Khava mihei kha nanram shunga man om mak hei ruh; nanman om he’nchu, anmani’n nangni kha kei kadōia setna anmantlo sik chei. An-pathenhei nankamuk inchu, khavakha nangni in-ôkna châng kaṭha maktak inkhat kachang sik.”