SŌKSŌT 20 - LEKHARABU INTHENG (BSI)

Ṭongpek Sôm

¹ Pathen in ṭong aleihri, aṭonghei kha hihei hi kae:

² “Egypt ram a nansōk changna a inphut nanhei kaṭhōisōt kei Rōngpu, nan-Pathen eng kae.

³ “Nangni’n Kei teilo pathen lak kamuk mak ruh.

⁴ “Nangni’n marvân chunga a-emak leh raleichunga, a-emak leh ralei thōia tui shunga ka-om neinâk heikhat lim nanbinga sik a syem mak ruh.

⁵ Lim inkhatbek hnenga inkun mak ruh, ajârchu kei Rōngpu nan-Pathen eng kha kae, Ke’n akaṭhamak-hei madimtor mak eng. Kei kahōt hei sōn leh pâr chunga khang 3 leh khang 4 katlunga karâkna kapek hei.

⁶ Tâk-kha kalungsetna hi kei inlungset leh kadân kajuihei khang lishing lishing hnenga katlung.

⁷ “Nangni’n Karahming kha ṭhat-mak mantlukna langa hmangmak ruh, ajârchu kei Rōngpu nan-Pathen eng kae, tu achang inum karahming akadik mak a kahmang kha karâkna kapek sik kae.

⁸ “Châmhngat kani ser ruh khana inthenga nit ruh.

⁹ Nangni’n ni 6 nanṭōn tlona sik nannei,

¹⁰ tâk ni 7 changna khachu kahnenga a’ntōksōt châmhngatna kani inkhat kae. Khava kani ning khan chu tûte’n ṭōn atlo mak sik kae — nangni, nansahei, nansōk-hei, nanranhei, nanram shunga aka-om khōhmehei anchanga.

¹¹ Ni 6 shunga Rōngpu Ke’n raleichung, bōirōk, tuipui, khana anshunga ka-om rakip kaleisyem hei, tâk ni 7 ning khan chu châm le’nhngat eng. Khava jâra Rōngpu ke’n Châmhngat kani kha mahâmṭhat kapek khana a’nthenga kasyem jo kae.

¹² “Ke’n kapek sik chei ram khan hringkhō kaseia nan-om theina sik a nanpa leh nannu kaja hei ruh.

¹³ “Mi that mak ruh.

¹⁴ “Jông mak ruh.

¹⁵ “Inru mak ruh.

¹⁶ “Tûte inkhat dik loa maher mak ruh.

¹⁷ “Mihlop inkhat innhlō chunga nanthang manset mak ruh, anuhmei, asōk-hei, aranhei, asakōrtung hei, a-emak leh akarōi hei-inkhat chunga madu mak ruh.”

Mipuihei Ṭitna

¹⁸ Mipuihei khan khō inri leh pengkun mahring anthei khana khōjang kapōk leh hmeikhu kasōk tlâng kha anhmu, kaṭi heia innok hei khana kahlajap a leikangir hei.

¹⁹ Anmani’n Moses hneng, “Nang in kanhnenga ṭong nahri’nchu kanrangei sik; tâk Pathen in kanhnenga ṭong ahri’nchu kanṭit, kathi sik ung,” anti.

²⁰ Moses’n amasôn heia, “Ṭitmak ruh; nangni ka-enmansin sik a leh aṭong manjui ṭhakna sik cheia Pathen kha akajōng kae, nanset makna sik a kae.”

²¹ Tâk-kha mipuihei khan kahlajap a kangir ṭhak hei, Moses rōk kha Pathen omna sumtuk inthim shunga khan kahlut a kae.

Maichâm chungchânga Dânhei

²² Israelhei hneng hri sik a Rōngpu’n Moses hneng ṭong aleipek: “Rōngpu ke’n heikhonga mo marvâna inphut nanhnenga ṭong kajōng hri ti kha nanhmu jo.

²³ Kei tei loa kamuksa sik a dangka a-emak leh sana vânga nanbinga pathen lim syem mak ruh.

²⁴ Ralei vânga maichâm inkhat kei sik a syem ruh, khava chunga kemōng leh sehrat ro manvâm sik leh inlôikhômna tōk sik hei kha ro-inthoina nei hei ruh. Nangni’n kei nankamukna sik enga kaṭhensōt jo ahmun rakip a khan, kei nanhnenga kahong sik eng khana mahâmṭhat kapek sik chei

²⁵ Nangni’n kei sik a hlung maichâm nansyem sik inchu a’nkheng hlung vânga syem mak ruh, ajârchu hlung chunga thirhem nankheng jo’nchu kei sik a rahōi kachangmak nanmanchang jo hei.

²⁶ Kei sik a maichâm kha, akena sik kechōnna leh akoptōa syem mak ruh; khanga nansyem inchu, nanketou pha khan nanbibinga inlâr sik cheia kae.